VOV4.Bahnar - Năr 18/3, Dơnŏ anĭh chĕp pơgơ̆r Tơdrong vă jang Trung ương găh bơ̆ jang vei lăng lui khop hlôi bơ̆ jang hăm Khŭl Kơdră chĕp pơgơ̆r Đảng pơlei tơm Đà Nẵng găh tơdrong lui khop. Kiơ̆ tơbăt, dôm sơnăm au ki, rim ƀok soi, kon pơlei lui khop tơ̆ pơlei tơm Đà Nẵng hlôi yak hơdoi, tơgŭm djru tơdrong jang kiơ̆ rim trong bơ̆ jang, trong jang atŏk tơ iung mŭk drăm-tơpôl pơlei tơm, jang kiơ̆ ƀlep trong jang “Jơhngơ̆m đon ‘lơ̆ng, lui kơ jăp”.

Khŭl bơ̆ jang Dơnŏ anĭh chĕp pơgơ̆r Trung ương bơ̆ jang hăm Dơnŏ anĭh Đảng pơlei tơm Đà Nẵng

Mă kăl, rim ƀok soi, kon pơlei lui khop hơdrin vang jang rim tơdrong jang tang găn jĭ hơbŭh Covid-19; tơgŭm djru kơ hrĕng trĭu hlak jên ăn Hơnĭh mong răk vaccine tang găn jĭ hơbŭh Covid-19; tơgŭm djru lơ tơmam drăm jang pơgang kăp gĭt; lơ tơmam drăm ăn khŭl bơ̆ jang tang găn jĭ hơbŭh. Rim ƀok soi yă giĕng, kon pơlei lui khop jang kiơ̆ ‘lơ̆ng bơ̆ jang vei lăng erĭh sa tơpôl nhen: tơgŭm djru ming hơmet, ming man hnam ‘nao ăn ŭnh hnam dơnŭh;  pơjao rơbau tơnô̆ tơmam drăm tơgŭm djru ŭnh hnam tơnap tap; jang kiơ̆ ‘lơ̆ng vei lăng sơđơ̆ng tơring, sơđơ̆ng trong nơnăm.

Tơblơ̆ nơ̆r: Amazưt