VOV4.Bahnar - Jang kiơ̆ nơ̆r krao hơvơn đơ̆ng Dơnŏ anĭh Mặt trận Tổ quốc Việt Nam pơlei tơm Hà Nội, dơnŏ anĭh bơ̆ jang Đảng pơlei tơm Hà Nội hlôi pơgơ̆r tơlĕch jang vang tơra tơgop tơgum Hơnĭh mong jên “Kơ yuơ đak dơsĭ, achon dơsĭ Việt Nam" sơnăm 2022. Hăm jơhngơ̆m đon ‘mêm  kơ eng păng hơnăp jang kơtang kơ yuơ đak dơsĭ, achon dơsĭ tĕh đak, rim kang ƀô̆, bơngai jang rim dơnŏ anĭh bơ̆ jang vang tơgŭm ăn tŏ sĕt hlŏh 1 năr jên khei. Akŏp kon jên chă hơvơn ‘măng mă blŭng ‘nŏh hlŏh 130 trĭu hlak jên. Hơdrol kơ ‘nŏh, năr 1/3, Khŭl kơdră chĕp pơgơ̆r Dơnŏ anĭh Mặt trận Tổ quốc Việt Nam pơlei tơm Hà Nội hlôi tơlĕch Nơ̆r krao hơvơn tơgŭm djru Hơnĭh mong jên “Kơ yuơ đak dơsĭ, achon dơsĭ Việt Nam” sơnăm 2022 pơtrŭh ăn rim hơnĭh bơ̆ jang, hơnĭh mơdro sa păng kon pơlei lơ̆m Hơnĭh tơm. Tơdrong jang au vă atŏk kơtang jơhngơ̆m pran, jơhngơ̆m đon tơgoăt tơgoăl pôm nơ̆r hơdrĕch hơdrung; hơnơ̆ng tơƀô̆h hơdăh jơhngơ̆m đon ‘mêm kơ eng, hơnăp jang đơ̆ng kang ƀô̆, ƀô̆ đô̆i kŏng ang păng rim răih kon pơlei Hơnĭh tơm Hà Nội hăm đak sơđĭ, achon dơsĭ Việt Nam păng đei dơ̆ng kon jên vă tơgŭm djru tơ iung pơjing rim hơnĭh jang gĭt kăl, tơgop pơm sơđơ̆ng erĭh sa, mŭk drăm kơ ƀô̆ đô̆i păng kon pơlei tơ̆ tơring đak dơsĭ, achon dơsĭ kơ Tĕh đak.

Tơblơ̆ nơ̆r: Amazưt