Vang năm hop akŏm pơma dơnuh tơ̆ 17 hơnih pơdăh kơtă kơ apŭng, hăm đei vang năm đơ̆ng hlŏh 400 ‘nu bơngai tang măt ‘noh dôm bơngai lơ̆m khul kon pơlei choh jang sa.

Hăm chă pơma dơnuh dih băl tơpăt hơlăng, tang măt ăn rim hơnih jang sa să, hơp tak xah, rim bơngai lơ̆m khul kon pơlei choh jang sa hlôi pơma tơlĕch lơ nơ̆r chă apĭnh hăm Kơdră chep pơgơ̆r dêh char Gia Lai păng rim hơnih bơ̆ jang ƀơm truh. Lơ̆m au, akŏm lơ̆m 5 tơdrong tơm ‘nŏh: Hơdrĕch ‘long pơtăm, yŏng kon tơrong; tơgŭm djru kon jên tơmơ̆t jang sa; trong jang tơgŭm djru hơmet pơ ‘lơ̆ng tơnap tap ăn tơmam drăm chŏh jang sa; groi teh, tơgŭm djru ming man trong hnam pơlei pơla, cham char. Găh lơ rim nơ̆r apĭnh tơ̆ jơ pơma dơnuh hlôi đei kơdră kơpal tơl hơdăh. Minh ƀar nơ̆r apĭnh kăl pơm hơdăh hlŏh dơ̆ng, rim hơnĭh bơ̆ jang tơgoăt iŏk, tơchĕng hơlen, xek tơlang ăn.