Đơ̆ng blŭng sơnăm truh dang ei, Khŭl vei lăng drŏ kăn dêh char Phú Yên jang hơdai hăm rim tơring hơtŏk loi dơ̆ng tơdrong jang tơroi tơbăt, pơgơ̆r lơ tơdrong jang vă bơ̆jang kiơ̆ đei yua tơdrong jang 8 - bơ̆jang kiơ̆ hơtŏ băl drŏ nglo hăm drŏ kăn păng hơmet pơ ‘lơ̆ng dôm tơdrong kăl hăm drŏ kăn păng hơioh tơring kon pơlei kon kông păng groi kông. Khŭl vei lăng drŏ kăn dêh char Phú Yên hlôi pơgơ̆r tơƀôh muh măt 63 grŭp tơroi tơbăt tơpôl. Mĭnh grŭp đei 10 ‘nu ‘noh đei Bí thư Chi bộ, bơngai pơgơ̆r pơlei, kơdră khŭl vei lăng drŏ kăn, Kơdră Khŭl bơ̆jang Mặt trận păng dôm khŭl grŭp tơ̆ tơring.

Rim khei, grŭp tơroi tơbăt tơpôl pơgơ̆r tŏ sĕt hloh 1 tơdrong jang tơroi tơbăt,pơm lơ trong tơroi tơbăt, rơih iŏk dôm trong tơroi tơbăt lăp hăm rim bơngai vang jang. Grŭp tơroi tơbăt tơpôl hơnơ̆ng truh tơ̆ rim hnam kon pơlei vă dăr hơlen păng băt hơdăh jơhngơ̆m đon ‘meh vă đơ̆ng kon pơlei. Đơ̆ng rŏng ‘noh, tơgep tơdrong tơroi tơbăt hơdai hăm hơmet pơ ‘lơ̆ng dôm tơdrong tơhlăk tơhlĭn mơmat tat đơ̆ng kon pơlei lơ̆m dôm hop akŏm pơlei. ‘Ngoăih kơ dôm tơdrong nhen krao hơvơn, pơtho kon pơlei hơtŏk tơiung pơm tơlĕch, grŭp tơroi tơbăt tơpôl oei bơngơ̆t truh hơioh, veh ver kơ teh dong băl lơ̆m ŭnh hnam păng iŏk ŭnh om hrôih; tơdrong hŭt lê̆ tơdrong joăt so ưh kơ ‘lơ̆ng soi kơyang mưh đei jĭ păng tơroi tơbăt ăn kon pơlei athei năm tơ̆ hnam pơgang vă khăm păng hơmet jĭ. Oh Hồ Ngọc Kim Linh oei tơ̆ xăh Sơn Hội (apŭng Sơn Hòa) tơbăt:

Oh ‘meh vang jang lơ̆m Grŭp tơroi tơbăt ‘nâu vă hlôh băt lơ hloh păng veh ver kơ dôm tơdrong glăi. Sư gô hơnhăk ăn dôm tơdrong đei yua ‘lơ̆ng ăn tơdrong hơrih sa păng gô ăn kơ dih kâu oh hlôh băt lơ hloh, ăn kơ oh băt đei tơdrong kiơ ƀlep păng tơdrong kiơ glăi.

Kiơ̆ kơ yă Hà Thị Thìn, Kơdră Khŭl vei lăng drŏ kăn xăh Ea Trol (apŭng Song Hinh), lơ̆m hơdrin tang găn tơdrong iŏk ŭnh om hrôih pơma hơdrô̆, tang găn pơƀrơh, teh dong hơioh pơma atŭm, Khŭl vei lăng drŏ kăn xăh kŭm hăm dôm anih jang, grŭp tơpôl xăh hlôi năm tơ̆ rim pơlei vă tơroi tơbăt hơnơ̆ng rim khei, rim jăl khei:

Đơ̆ng rŏng kơ iŏk đei hla ar đơ̆ng Trung ương kŭm nhen dêh char, apŭng, ‘noh Khŭl drŏ kăn kŭm hlôi tơlĕch trong jang. Đơ̆ng rŏng ‘noh jĭ tơlĕch trong jang ăn rim pơlei găh tơdrong jang 8 đang kơ ‘noh nhôn gô hơnhăk luơ̆t năm tơ̆ pơlei vă tơroi tơbăt ăn rim pơlei kŭm đei pơjing dôm tơdrong bơ̆jang kiơ̆ hơtŏ băl drŏ nglo hăm drŏ kăn ‘noh nhôn đei pơjing tơdrong jang ‘noh pơma ưh hăm iŏk ŭnh om hrôih, pơm kiơ̆ 5 ưh tơgep lơ̆m jang kiơ̆ 3 rơgoh hloi. Mưh rim jăl khei, rim khei ‘noh nhôn kŭm đei hŏk hôp drŏ kăn ‘noh nhôn tơroi tơbăt ling lang pơm kiơ̆ hơtŏ băl drŏ nglo hăm drŏ kăn.    

Yă Nguyễn Thị Phương Liên, Phŏ Kơdră Khŭl vei lăng drŏ kăn dêh char Phú Yên tơbăt, khei ‘năr âu ki, Khŭl vei lăng drŏ kăn dêh char Phú Yên hlôi jang hơdai hăm Anih vei lăngBơngai jang Lĭnh jĭ rơka păng Tơpôl dêh char pơgơ̆r 1,2 lăm pơhrăm vă hơtŏk ‘lơ̆ng tơdrong kĕ jang ăn kang ƀô̆ rim apŭng, xăh găh hlôh vao hơmet pơ ‘lơ̆ng dôm tơdrong ƀơm truh teh dong, pơƀrơh hăm drŏ kăn hơioh tơring kon pơlei kon kông păng rgoi kông.

Khŭl vei lăng drŏ kăn dêh char Phú Yên kŭm athei rim kơdră khŭl drŏ kăn pơih să dôm tơdrong jang, trong jang hơiă kŭm nhen trong jang, trong tơlĕch jang dôm tơdrong jang păng vei lăng ‘lơ̆ng dôm tơdrong jang Grŭp tơroi tơbăt tơpôl găh Tơdrong jang 8.

Hăm tơdrong hơgăt ‘noh truh sơnăm 2025 ‘noh gô pơjing đei 63 grŭp ‘noh hrei ‘nâu hlôi pơjing đei 45 grŭp hăm 430 ‘nu bơngai vang jang. Dôm grŭp ‘nâu hlôi đei khŭl drŏ kăn pơhrăm găh dôm tơdrong hlôh vao păng tơdrong gơh tơroi tơbăt ăn kơ dôm bơngai jang tơ̆ lơ̆m grŭp.

Tơdrong tơlĕch jang tơdrong jang 8 jĭ tơdrong hiôk ‘lơ̆ng vă Khŭl drŏ kăn rim tơring păng rim anih jang ƀơm truh, khŭl kơdră tơring pơtrŭt vei lăng drŏ kăn păng hơioh bơngai kon kông, jĭ dôm bơngai oei pŭ tơdrong răm; pơtrŭt tơdrong gơh pơjao tơdrong hiôk yak tŏk, tơƀôh hơdăh hơnăp jang tơm ăn drŏ kăn, hơioh lơ̆m pơjing păng hơtŏk tơiung tơpôl, tơgop pơjing dêh char Phú Yên hơtŏk tơiung kơjăp./.