Ƀlep 20 sơnăm hơdrol, yă Đặng Thị Dẩn jĭ 1 lơ̆m dôm ŭnh hnam mă blŭng năm oei tơ̆ tơring teh Nậm Sò kiơ̆ trong jang rĭ kon pơlei oei tơ̆ tơring sơlam. Năr doh sơ̆, tơring ‘nâu oei jing teh hoh, trong nơnăm mơmat tat, ưh kơ măh teh choh jang. Tơdrong joăt oei sa, choh pơtăm ưh kơ hlôh vao pơm ăn pơngot, dơnuh hin đei hơnơ̆ng tơ̆ rim ŭnh hnam bơngai Mông, bơngai Dao. Ưh kơ ‘nhoen mơmat, hăm hơnăp jang ‘noh jĭ bơngai pơgơ̆r pơlei yă Dẩn khŏm bơ̆jang kiơ̆ tơdrong jang vă tơplih đon tơchĕng rim kon pơlei. Yă Dẩn ƀlŏk dơ̆ng: “Blŭng a kon pơlei tơ̆ âu bu bu kŭm ‘meh rơneh kon lơ, kon pơlei akhan hnam lơ kon mă ‘lơ̆ng, mă lei ƀơ̆t đei tơroi tơbăt păng ƀôh teh ưh kơ lơ kơna ƀơ̆t đei teh đak asong teh bơ̆ih, sơđơ̆ng bơih kon pơlei kŭm lăp rơneh 1-2 ‘nu kon đĕch. Găh et pơkong ‘noh kon pơlei ưh kơ iŏk mŭk tơmam lơ dơ̆ng bơih, chă klo ăn kơ kon athei tôm 18 sơnăm ‘mơ̆i mă ăn oei păng pơm kiơ̆ ‘lơ̆ng khôi luơ̆t đơ̆ng teh đak.”

Mưh kon pơlei sŭt hŭt  răh tơdrong joăt so ưh kơ ‘lơ̆ng, pơm tơm oei sa sơđơ̆ng ‘lơ̆ng, yă Dẩn hlôi năm jơ̆p tơring hơnhăk dôm tơdrong jang hơiă, pơtăm ‘long đei kơ jă tĕch măk vih hăm Nậm Sò. Drŏ kăn đảng viên âu hlôi krao hơvơn kon pơlei hơnhăk tơm chik, tơm quế, prit pơ tăm, đơ̆ng rŏng ‘noh pơih să vei rong kon tơrong, rong ka hơdang. Vang tơroi găh jơnei đơ̆ng rŏng 10 sơnăm tơklep hăm tơring sơlam hơtŏk tơiung mŭk drăm, hăm tơdrong tơgŭm tôch kơ tơnăp đơ̆ng drŏ kăn pơgơ̆r pơlei Đặng Thị Dẩn, yă Tẩn Thị Tích kon pơlei plei Nậm Sò, xăh Bản Phiệt, apŭng Bảo Thắng, dêh char Lào Cai tơroi: “Mơmat tat ‘noh mŏ Dẩn pơtho ăn kơ nhôn jang sa. Athei pơ tăm ‘long, pơ tăm quế, pơtăm chik đei tŏ sĕt jên, khŏm khŏm ŭnh hnam păi biơ̆ tŏ sĕt. Sơ̆ pơtơm vih tơ̆ âu mơmat dêh ưh kơ đei kiơ hloi”.

Đơ̆ng rŏng 20 sơnăm muih roh choh klăng, Nậm Sò dang ei tŏk bŏk tơplih ‘lơ̆ng rim năr. Dôm hnam tơ̆ng kơ jung đei ƀôh tơ̆ dôm yơ̆p bri bluh jing ‘lơ̆ng; dôm jăl trong man rơgoh, 1 tơdrong arih ‘nao tŏk bŏk đei ƀôh tơ̆ pơlei tơring sơlam âu đei tơgop ưh kơ iĕ đơ̆ng dôm đảng viên iung jang hơdrol nhen yă Dẩn.

64 sơnăm arih, 23 sơnăm mơ̆t đảng, dôm tơdrong plang jơhngơ̆m đơ̆ng drŏ kăn đảng viên bơnagi Dao Đặng Thị Dẩn hlôi tơiung dơ̆ng tơdrong hơdrin, đon lui ăn kon pơlei tơring sơlam. Lui păng mơ̆ng kiơ̆ Đảng, ƀok Hồ, rim ‘nu kon pơlei Nậm Sò hlôi păng tŏk bŏk hơdrin pơjing trong sơlam rơngei, sơđơ̆ng păng hơtŏk tơiung. Đảng viên Đặng Thị Dẩn tơroi: “Tơdrong kiơ ĭnh năm hơdrol, ĭnh pơma ‘noh jang. Ưh kơ gơh jang ‘noh ưh kơ pơma. Pơma ƀlep ‘noh mă mơ̆ng. Kon pơlei pơm kiơ̆ ‘lơ̆ng tơdrong ‘lơ̆ng ăn kơ ĭnh bơ̆jang ưh kơ băt gleh lap. Dơ̆ng tơ̆ kơ pal to lăng nhen kơ phô̆ iĕ tơ̆ thŭng thong ‘nâu. Kon pơlei 1 jơhngơ̆m đon, ĭnh hơdrin hloh dơ̆ng.”

Tơdrong hơdrin jing hơnih hơdăh lơ̆m hơtŏk tơiung mŭk drăm đơ̆ng Nậm Sò năr ‘nâu ‘noh jĭ iŏk yua đơ̆ng dôm tơdrong hơdrin ưh kơ pơ dơh, ưh kơ gleh lap, đĭ đăng yua kơ kon pơlei đơ̆ng drŏ kăn đảng viên bơngai Dao Đặng Thị Dẩn.