Adrol sơ̆, unh hnam mŏ Đinh Thị Trạm tơ̆ plei Groi, xăh Ya Hội, apŭng Đak Pơ jĭ unh hnam tơnuh. Sơnăm 2018, unh hnam mŏ Trạm đei tơgŭm tŏk iŏk jên kiơ̆ unh hnam tơnuh, hăm kơsô̆ jên 47 triu đơ̆ng Anih mong jên tơgŭm tơpôl apŭng Đak Pơ vă pơtăm 2 ha ‘long keo. Đơ̆ng kơsô̆ jên mong đei păng đon adrin đơ̆ng kơdih, truh dang ei, unh hnam mŏ đei 4 ha keo, 5 sao ƀum păng rong dơ̆ng nhŭng, rơmo.

Ƀât blŭng sơnăm 2023, đơ̆ng rŏng lơ sơnăm adrin choh jang, klo kăn mŏ Trạm man đei hnam ‘nao kơjăp ‘lơ̆ng păng sut măt lĕch đơ̆ng dôm unh hnam tơnuh tơ̆ plei Groi: “Klo inh năm jang hơtăih, inh ‘nŏh tơ̆ hnam chă mong măi jên tŏ sĕt tŏ sĕt, inh gơ̆h chơchoh hơbăn ao, chă chơchoh hơbăn ao tanh hăm đe mŏ oh vă gơ̆h klăih đơ̆ng tơnuh”

Apŭng Đak Pơ dang ei đei vă jê̆ 2000 unh hnam tơnuh păng vă jê̆ tơnuh, iŏk đei dang 15% kơsô̆ unh hnam. Vă pơjing tơdrong ‘lơ̆ng ăn unh hnam tơnuh, văjê̆ tơnuh pơm hơtŏk iŏk yoa, apŭng Đăk Pơ hlôi tơlĕch lơ trong tơgŭm kiơ̆ tơdrong “hơpăh gơ̆r văh đei yoa ƀiơ̆ kơ ăn jring ka” vă kon pơlei đei tơmam jang xa, jang tŏk klăih đơ̆ng tơnuh hin kơjăp ‘lơ̆ng. Truh dang ei, 7/8 xăh, thĭ trơ̆n lơm apŭng hlôi pơgơ̆r pơtho tơdrong jang ăn dang 1500 ‘nu bơngai, ƀơk hlŏh 21 rơbâu tŏ the ƀao hiêm y tế ăn dôm bơngai găh unh hnam tơnuh, vă jê̆ tơnuh, unh hnam đei tơdrong arih xa păh lăp, bơngai kon kông tơ̆ tơring II, III păng bơngai Yoăn arih xa tơ̆ tơring pơmat tat dêh hlŏh. 

Ƀok Huỳnh Văn Hơn – Phŏ Kơdră vei lăng kon pơlei apŭng Đăk Pơ tơroi, kŭm hăm tơdrong pran ‘lơ̆ng găh kơtao, ƀum ‘nŏh hrei ‘nâu tơring đei dơ̆ng tơdrong ‘lơ̆ng vă pơtăm ‘nhot, pơjing dôm tơmam Ocop vă pơm hơtŏk iŏk yoa ăn kon pơlei, sut pơđĭ pơngot, tơjur tơnuh hin kơjăp ‘lơ̆ng: “Tơdrong jang tơm kơ teh đak, tơjur tơnuh hin kơjăp ‘lơ̆ng tơ̆ tơring kiơ̆ đơ̆ng vang mong akŏm jên tơmam vă pơjing anih jang, hơmet pơ ‘lơ̆ng tơdrong arih ăn kon pơlei. Hơdai hăm ‘nŏh kiơ̆ đơ̆ng trong vei lăng sơđơ̆ng tơdrong arih xa tơpôl sư tơgŭm ăn kon pơlei chă rei pơtăm, rong kon tơrong, pơtho ăn kon pơlei hŭt lê̆ đon ‘mĕh gô chang, gơnang yoa, xa hơpăh đơ̆ng teh đak tơgŭm đĕch, athei băt trong choh jang xa vă hơmet pơ ‘lơ̆ng tơdrong arih xa”

Chư Păh jĭ apŭng oei đei lơ xăh pơmat tat ‘năi, hăm kơsô̆ unh hnam tơnuh oei tôch lơ. Hăm lơ trong jang, đơ̆ng roi tơbăt, pơtâp pơhrăm truh hơtŏk dôm tơdrong tơmât jên jang, sơnăm 2023, akŏm đĭ đăng kơsô̆ unh hnam tơnuh lơ̆m apŭng jur 3,82% pơtêng hăm sơnăm 2021. 

Ƀok Nay Kiên – Kơdră vei lăng kon pơlei apŭng Chư Păh ăn tơbăt: “Đơ̆ng dôm kơsô̆ jên kơ dôm Tơdrong jang tơm, đơ̆ng dôm trong jang xa đei iŏk yoa ‘lơ̆ng vă hơnhăk tơmât tơ̆ tơring kon kông ‘nŏh tơdrong jang tơjur tơnuh hin đei tơƀôh tôch hơdăh nhen, adrol sơ̆ jĭ dôm Tơdrong jang pơtăm ming ‘long chĕh phe, rơih hơdrĕch ‘nao plei ‘yăl, băt jang kiơ̆ ki thuơ̆t, tơdrong tơplih ming trong jang, tơđăh ‘long tơ̆ apŭng, chă rơih dôm kơloăi ‘long kăp gĭt, ‘long xa plei tĕch măk hlôi pơm ‘lơ̆ng truh tơdrong jang tơjur tơnuh hin”

Đơ̆ng 2021-2023, dêh char Gia Lai đĭ tơlĕch hlŏh 400 ti hlak jên vă bơ̆ jang dôm tơdrong jang tơm kơ teh đak. ‘Ngoăih kơ jên tơgŭm tơpăt đơ̆ng teh đak, Gia Lai oei tơmât jang hơdai akŏm jên đơ̆ng lơ tơdrong jang; Lơ tơring đei trong jang rơgei, đei yoa, lăp hăm yăn âu, pơjing tơdrong ‘lơ̆ng vă bơngai tơnuh pơih xă tơdrong jang xa, rong kon tơrong, pơm hơtŏk iŏk yoa, jang tŏk klăih đơ̆ng tơnuh hin kơjăp ‘lơ̆ng. Kơsô̆ unh hnam tơnuh tơ̆ dêh char đơ̆ng 12,09% sơnăm 2021 jur pă 8,11% ƀât hơtuch sơnăm 2023. Lơ̆m nŏh, kơsô̆ unh hnam tơnuh jĭ bơngai kon kông jur đơ̆ng 25,58% sơnăm 2021 pă 17,05% ƀât hơtuch sơnăm 2023, jang đei păng lơ hlŏh tơdrong hơgăt tơjur unh hnam tơnuh tơ̆ tơring kon kông, jô̆ păh lăp loi 3% 1 sơnăm kiơ̆ tơdrong hơgăt tơnuh lơpang đơ̆ng 2022-2025.

Ƀok Trường Trung Tuyến – Phŏ Kơdră Anih vei lăng hơdrĕch kon kông dêh char Gia Lai tơroi, lơ̆m sơnăm 2024, dêh char Gia Lai adrin tơjur unh hnam tơnuh dang 2%, kơsô̆ unh hnam tơnuh bơngai kon kông jur 3%, dar dĕh hơmet pơ ‘lơ̆ng păng pơm hơtŏk tơdrong arih xa ăn kon pơlei.

“Jơnŭm pơgơ̆r kon pơlei dêh char hôp păng pơdrơ̆ng nơ̆r ăn tơdrong tơchơ̆t, pơjao tơdrong hơgăt ăn dôm apŭng, dôm anih jang kơpal mưh tơlĕch tơdrong jang tơm kơ teh đak tơjur tơnuh hin kơjăp ‘lơ̆ng, ‘nŏh athei pơgơ̆r bơ̆ jang mă ‘lơ̆ng, đei yoa vang tơgop tih ăn tơdrong tơjur tơnuh hin tơ̆ tơring kon kông. Dang ei nhôn oei adrin roi tơƀôh ăn Anih vei lăng kon pơlei dêh char tơlĕch trong jang mă hơdăh mưh bơ̆ jang tơdrong ‘nâu. Lơ̆m nŏh athei akŏm jên tơmam pơ ‘nhŏ ăn dôm tơdrong jang sơnăm âu ki hlôi jang ‘lơ̆ng, kơsô̆ jên, tơmam âu gô tơgŭm ăn tơring kon kông tơplih ‘lơ̆ng, tơgŭm ăn unh hnam tơnuh tơ̆ tơring kon kông đei tơdrong ‘lơ̆ng vă tŏk klăih đơ̆ng tơnuh hin tơ̆ hơnăp kơnh”