VOV4.Bahnar - Kiơ̆ pơkăp dơnŭh lơ pang, hrei au dehe char Gia Lai oei đei 12,09% ŭnh hnam dơnŭh. Lơ̆m au găh lơ ŭnh hnam dơnŭh ‘nŏh kon pơlei kon kông. Rim tơring lơ̆m dêh char hlôi păng tŏk bŏk tơlĕch jang lơ trong jang pơjing jang sa, tơgŭm djru tơdrong jang, tơplĭh jơhngơ̆m đon tơchĕng, trong jang sa, vă tơgŭm ăn kon pơlei hơdrin yak hlŏh dơnŭh hin kơ jăp.

Lơ ŭnh hnam kon kông tŏk iŏk jên răt rong kon tơrong, pơjing jang sa iŏk yau kơ jăp, yak hlŏh dơnŭh hin

Pơgê hrôih năm răih kơ jăr kơsu ăn kŏng ty, đơ̆ng rŏng ‘nŏh năm jang mir chehphe, kơsơ̆ brŏk tơ̆ hnam hơmik chă hiĕm ăn rơmo yŏng ‘nao su, mă lei mŏ Rơ Lan Iêk oei tơ̆ pơlei Krêl, tơring Ia Krêl, apŭng Đức Cơ jei tôch chhôk hơ iă hăm tơdrong pơ joăl au. Mŏ tơroi, klo lôch hơchăng hrôih, mĭnh ‘nu mŏ rong ‘me 3 ‘nu kon hơ ‘lơ̆p tŏk bŏk oei hŏk pơhrăm. Sơ̆, 4 ‘nu mĕ kon mŏ hơnơ̆ng ư̆h kơ măh tăh sa tơdrong jang ăn kơ đe ƀơ̆t lăt đei ƀơ̆t lăp ư̆h, mir pơgar chehphe ‘nŏh kră krŭt. Sơnăm 2018, mŏ Iêk tŏk iŏk 50 trĭu hlak jên đơ̆ng Hơnĭh mong jên tơgŭm djru tơpôl vă pơtăm ming chehphe. Sơnăm đơ̆ng rŏng, mŏ đei kŏng ty ksu tơ̆ tơring au ăn kơ mŏ pơm kŏng nhân, đơ̆ng nŏh đei tơgŭm man ăn hnam oei. Mă đơ̆ng jên khei kŏng nân ksu ư̆h kơ lơ, mă lei mŏ jei đei kon jên răt sa, răt đei rơmo yŏng. Mŏ Iêk chơt hơ iă tơbăt, sơnăm sơ̆, ŭnh hnam mŏ kĕ yak hlŏh dơnŭh hin:“Păh kŏng ty tơgŭm ăn kơ ĭnh 70 trĭu hlak jên pơm hnam đơ̆ng sơnăm 2020. Rong ‘me kon hơ ‘lơ̆p hŏk pơhrăm, ba hơdrin chă jang kŏng nhân, năm răih kơ jăr ksu hơnơ̆ng”.

Ŭnh hnam dơnŭh tơ̆ apŭng Đức Cơ đei tơdrong jang sa

Ŭnh hnam mŏ Iêk ‘noh mĭnh lơ̆m kơsô̆ 53 ŭnh hnam oei tơ̆ tơring Ia Krêl, apŭng Đức Cơ ‘nao yak hlŏh dơnŭh hin lơ̆m sơnăm 2021. Khei năr au ki, vă tơgŭm djru ăn rim ŭnh hnam yak hlŏh dơnŭh hin kơ jăp, rim hơnĭh bơ̆ jang tơring pơgơ̆r lơ lăm hŏk pơtho tơbăt kih thuơ̆t păng tơlĕch mĭnh ƀar trong jang chehphe, atŏk kơtang jing ‘lơ̆ng ăn ‘long pơtăm. Dơnŏ anih mong jên tơgŭm djru tơpôl apŭng năm bơ̆ jang trŭh tơ̆ tơring vă kon pơlei ƀônh đei tŏk iŏk kon jên. Kơdră chĕp pơgơ̆r tơring iung jang hơdoi hăm dôm bơngai đei kon pơlei yom lơm pơlei pơla chă pơrô̆ hơvơn kon pơlei ư̆h kơ tĕch tĕh, mă lei hơdrin chă hŏk pơhrăm trong jang sa vă kĕ yak hlŏh dơnŭh hin. Ƀok Rơ Mah Quách, Kơ iĕng Bí thư Chi bộ, Thôn trưởng pơlei Krêl, tơring Ia Krêl, tơbăt:“Tơdrong tơnap tap hlŏh hrei au ‘nŏh groi tĕh roi năr roi iĕ, ŭnh hnam kon hơ ‘lơ̆p mĭnh ƀar găr. Chŭn mir iĕ kơna jang sa iŏk đei jei tŏ sĕt. Chăl hle hrei au, đe hơ iŏh ‘nŏh hơdrin hŏk pơhrăm vă yak hlŏh dơnŭh hin. Hŏk đĭ lăm tơsĭn, lăm jĭt ƀar ‘nŏh gơ̆h jang tơ̆ rim kŏng ty, ăp đei hŏk, đei ƀăng lei mă tơchă đei tơdrong jang”.

Tơring Ia Krêl, apŭng Đức Cơ đei hlŏh 2.100 ŭnh hnam kon pơlei, tơ̆ 10 pơlei. Lơ̆m au, 35% măt bơngai kon pơlei ‘nŏh bơngai kon kông. Ŭnh ham dơnŭh lơ̆m tơring oei đei trŭh 13,4%. Yă Nguyễn Thị Thúy Loan, Kơdră chĕp pơgơ̆r Dơnŏ anĭh vei lăng kon pơlei tơring Ia Krêl, tơbăt, sơnăm 2022, tơring tơlĕch jang keh đang tơ jur 2,2% ŭnh hnam dơnŭh, hơtŏ hăm 47 ŭnh hnam:“Atŏk kơtang pơrô̆ pơrôp, pơtho tơbăt vă tơplĭh jơhngơ̆m đon tơchĕng, trong jang sa lơ̆m kon pơlei, jang kiơ̆ khoa hŏk kih thuơ̆t gơ̆h hơgei lơ̆m rong kon tơrong păng chŏh jang sa. Mă ƀar ‘nŏh hăm ŭnh hnam dơnŭh, chŭn mir ư̆h kơ đei ‘nŏh gô tơchă ăn tơdrong jang. Rim kŏng ty trŭh jei tơbăt ăn; pơjing rơvơn hlŏh ăn rim ŭnh hnam dơnŭh, măkăl hăm 47 ŭnh hnam dơnŭh lơ̆m trong tơlĕch jang yak hlŏh dơnŭh hin lơ̆m sơnăm 2022 đei sơng iŏk tơdrong tơgum djru”.

Kiơ̆ tơdrong tơchơ̆t dơnuh lơ pang, dang ei Gia Lai oei đei 12,09% ŭnh hnam dơnŭh. Lơ̆m au đei trŭh 88% ŭnh hnam dơnŭh ‘nŏh bơngai kon kông. Jang kiơ̆ Tơdrong jang tĕh đak găh tơ jur dơnŭh kơ jăp ‘lơ̆ng, đơ̆ng sơnăm 2016 trŭh sơnăm 2021, dêh char Gia Lai hlôi tơmơ̆t jên jang hlŏh 1.270 ti hlak jên, tơlĕch jang rim tơdrong jang tơgum djru ŭnh hnam dơnŭh hŏk tơdrong jang, tơplih ‘long pơtăm, kon tơrong ... Kiơ̆ Trong Pơ prŏ jang 314/KH-UBND ‘nao đei Dơnŏ anĭh vei lăng kon pơlei dêh char Gia Lai tơlĕch ăn lơ̆m vă đĭ khei 2 au ki, sơnăm au, dêh char hơdrin tơjur 2% ŭnh hnam dơnŭh lơ̆m dêh char, 3% ŭnh hnam dơnŭh bơngai kon kông. Ƀok Phạm Trần Anh - Kơ iĕng Kơdră Dơnŏ anĭh vei lăng Tơdrong jang-Bơngai rơka păng Tơpôl dêh char Gia Lai tơbăt, hơnĭh au gô yak hơdoi hăm rim tơring vă jang keh đang trong tơlĕch jang tơ jur dơnŭh sơnăm 2022 kơ dêh char: “Dơnŏ anĭh vei lăng Tơdrong jang, bơngai rơka gô jang tơgŭm ăn kơdră kơpal pơjing trong jang hơdăh, tơgum djru ŭnh hnam dơnŭh yak hŏh dơnŭh hin. Adoi iŏk yua ‘lơ̆ng hơ iă tơdrong tơgŭm djru đơ̆ng Trung ương; hơdrin iung jang hăm rim hơnĭh bơ̆ jang măt trân, chĭnh trĭ, tơpôl vă hơvơn tơdrong vang chă tơgŭm djru đơ̆ng hơnĭh mơdro sa, đơ̆ng kon pơlei pơla, tơpôl vă tơmơ̆t jên jang ăn bơngai dơnŭh atŏk tơ iung jang sa”.

Bơngai chih: Nguyễn Thảo

Tơblơ̆ nơ̆r: Amazưt