Dôm năr vă đĭ sơnăm 2022, mŏ Kpă Xê Ra, rơneh sơnăm 1993, pơlei Ia Mua, tơring Bầu Cạn, apung Chư Prông oei tom pơm keh đang hnam ‘nao sơng Têt. Hnam man hmă, să lăp 60m2, mă lei mŏ jei tôch chhôk ‘nă. Kơ yuơ sơnăm 2023, đei hnam ‘nao, adoi jing khei ‘năr ŭnh hnam mŏ yak hlŏh lơ̆m ŭnh hnam dơnuh. Mă loi, tơdrong pơm đei hnam oei tơƀô̆h hơdăh mŏ hlôi băt iŏk yua kon jên tŏk iŏk dơ̆ng. Mŏ Xê Ra chơt hơ iă pơma:“Sơnăm au jing sơnăm mă blŭng unh hnam yak hlŏh dơnuh. ‘Nau iŏk đei đơ̆ng klo akăn nhi hơdrin jang sa păng tơdrong tơgŭm djru đơ̆ng kon jên teh đak ăn tŏk iŏk. Ba ư̆h khan năm ba hloi, mă lei năm ba dar deh kơna oei đei kon jên vă vei lăng năng tông chehphe, jang sa. Ba hiôk chơt dêh. ”

Băt iŏk yua kon jên tŏk iŏk, ‘nhŏng Rơ Mah Bya, rơneh sơnăm 1972, oei lơ̆m koeng 6, thĭ trân Chư Prông jei chơt hơ iă kĕ yak hlŏh dơnuh hin. ‘Nhŏng tơbăt, ‘măng mă blŭng ‘nhŏng pơ̆n chă tŏk iŏk kon jên ‘nŏh lơ̆m sơnăm 2008, hăm kon jên lăp tôm răt mĭnh tŏ rơmo. Lăng ƀô̆h rong kon tơrong đei iŏk yua kơjăp, đơ̆ng rŏng ‘nhŏng tŏk iŏk dơ̆ng, Rơmah Bya tŏk iŏk 30 trĭu hlak jên, đơ̆ng ŏh 50 trĭu hlak jên vă vei lăng năng tông chehphe, chă rong pơbe. Dang ei, lăng dơ̆ng hlŏh 10 sơnăm iŏk yua kon jên tŏk iŏk, ‘nhŏng ƀô̆h tơdrong pơ̆n đơ̆ng kơ dĭh sơnăm ‘nŏh sơ̆ hlôi hơnhăk ba ăn kơ ‘nhŏng ‘lơ̆ng hơ iă tơpă mơ̆n:“Ba chă tŏk iok kon jên tĕh đak đơ̆ng lơ sơnăm kơ au bơih. 'Măng mă blŭng tŏ sĕt, đơ̆ng rŏng ‘nŏh roi lơ, kơ yuơ ba ƀô̆h kon jên au jĭ tôch trŏ lăp hăm ŭnh hnam dơnuh nhen ba. Dôm sơnăm au ki, gơnơm kon jên ‘nau, ba pơm đei hnam man, rong đei rơmo, pơbe păng răt mŭk drăm lơ̆m ŭnh hnam”.

Kiơ̆ đơ̆ng Dơnŏ anih Mong jên tơgum djru Tơpôl dêh char Gia Lai chĭh jô̆, đơ̆ng rŏng 20 sơnăm bơ̆ jang, hơnih mong jên hlôi bơ̆ jang jơ̆p jang trŭh hlŏh 220 tơring, lơm pơđĭ 17 apŭng, thĭ xah, pơlei tơm tơ̆ dêh char Gia Lai. Atŭm hăm ‘nŏh, đei hlŏh 3.300 khul pơkom păng ăn tŏk iŏk jên. Hăm trong chă pơrô̆ pơrôp ‘lơ̆ng hơ iă, rim trong jang pơkom ‘nŏh jing khul pơm gơng tơrŏh kloh klĕch ăn kon jên jang tơgum djru đơ̆ng teh đak trŭh tơ̆ tơpang ti bơngai dơnuh. ‘Moi kiơ̆ 17 tơdrong jang ăn tŏk iŏk lơ, hơnĭh au hlôi ăn asong hlŏh 225.000 ‘măng ŭnh hnam dơnuh, vă jê̆ dơnuh tŏk iŏk đei 16.800 ti hlak jên. Kơdră chĕp pơgơ̆r Dơnŏ anih mong jên Tơgum djru Tơpôl dêh char Gia Lai Lê Văn Chí tơbăt, hrei au, hơnih mong jên tŏk bŏk hơdrin iung jang hơdrol pơtrŭh kon jên bơ̆ jang dêh char pơtrŭh ăn ‘moi kiơ̆ Hơnih mong jên Tơgŭm djru Tơpôl vă ăn ŭnh hnam dơnuh păng dôm ŭnh hnam đei iŏk yua ăn teh đak chă tŏk iok:“Dơnŏ anih mong jên Tơgŭm djru Tơpôl dêh char Gia Lai chă hơvơn rim kon jên jang au to vă pơ̆ih să ăn ŭnh hnam dơnuh, rim bơngai anai lơ̆m dêh char chă tŏk iŏk. Hơnih au jei gô vă iung jang hơdoi hăm rim hơnih bơ̆ jang, rim khul jang chĭnh trĭ tơpôl vă pơtrŭh kon jên tŏk iŏk au trŭh hăm dôm bơngai tơgăl gơ̆h tŏk iŏk. Vei lăng kon jên tŏk iŏk, pơtho tơbăt, chă pơrô̆ hơvơn ŭnh hnam tŏk iŏk hơdrin tŏk iŏk tơmơ̆t jang sa mă trŏ lăp. Chă pơtho khan ăn dôm ŭnh hnam tŏk iŏk tơmơ̆t jên jang mă trŏ mă ƀlep, tơgop tơgŭm ăn bơngai dơnuh păng rim ŭnh hnam đei iŏk yua ăn tĕh đak, dôm ŭnh hnam teh đak tơgŭm au to atŏk tơ iung jang sa, sơđơ̆ngh erĭh sa păng hơdrin yak hlŏh dơnuh hin kơ jăp”.

Rŏ năng vă sơkơ̆t hơdăh, lơ̆m prăt dôm sơnăm au ki, kon jên tĕh đak ăn tŏk iŏk hlôi jang ‘lơ̆ng hơnăp jang, pơjing hơvơn kơtang hăm tơdrong erĭh sa, jang sa tơ̆ Gia Lai, mă kăl lơ̆m tơring kon kông. Lơ̆m khei năr kơnh, ‘nau jei gô hơnơ̆ng jing mĭnh lơ̆m trong jang tơm vă tơring tơlĕch jang jơnei rim trong jang tơgŭm djru tơjur dơnuh, tơ iung pơjing tơring tơrang ‘nao; adoi jing boăl yak hơdoi kơ bơngai dơnuh, tơgŭm ăn đe sư hơdrin chă jang sa, pơjing đei tơdrong erĭh sa phĭ tơtŏ dơnŏ ‘lơ̆ng dơ̆ng kơjăp păng hơnŭk hơnoa hlŏh dơ̆ng.