Kiơ̆ Ƀao hiêm Xah hô̆i dêh char Gia Lai, jô̆ truh khei 7/2023, jâ̆p dêh char Gia Lai đei pơhlom 1 trĭu 290 rơbâu ‘nu bơngai (90% kơsô̆ măt kon pơlei) vang răt ƀao hiêm hơmet jĭ jăn, tŏk hloh  5% pơtêng hăm khei năr âu sơnăm sơ̆. Lơ̆m noh, kon pơlei kon kông răt ƀao hiêm hơmet jĭ jăn đei hloh 75%. 

Vă pơtoi hơtŏk kơsô̆ bơngai gơh đei vei lăng jơhngơ̆m jăn, Jơnŭm jang vei lăng kon pơlei dêh char Gia Lai hlôi tơlĕch Tơchơ̆t kơsô̆ 48 gah tơgŭm jên đŏng ƀao hiêm hơmet jĭ jăn ăn bơngai tơnap tap lơ̆m dêh char đơ̆ng sơnăm 2023-2025. Kiơ̆ kơ noh, đơ̆ng blŭng sơnăm truh dang ei, dêh char Gia Lai đei hloh 170 rơbâu ‘nu păng hŏk tro kon kông đei tơgŭm jên răt ƀao hiêm hơmet jĭ jăn. Atŭm hăm noh, dôm jăl jang hơtŏk tơroi tơbăt truh tơring ataih yaih, tơring kon pơlei kon kông vă kon pơlei băt hơdăh găh tơdrong răt ƀao hiêm hơmet jĭ jăn.