Dêh char Gia Lai dang ei đei hlŏh 38.500 unh hnam tơnuh, đei 90% lơ̆m kơsô̆ âu ‘nŏh jĭ bơngai kon kông. Vă tơgŭm ăn kon pơlei kon kông tơnuh hin đei tơdrong arih xa sơđơ̆ng ‘lơ̆ng, Gia Lai tơlĕch lơ trong asong tŏk iŏk jên.

Lơ̆m 6 khei blŭng sơnăm 2023, Anih mong jên tơgŭm ăn tơpôl dêh char Gia Lai đĭ asong tŏk iŏk truh 964 ti hlak jên, hăm hlŏh 25.000 unh hnam tŏk iŏk, lơ̆m noh đei hlŏh 13.000 unh hnam kon kông, kơsô̆ jên tŏk iŏk đei vă jê̆ 500 ti, iŏk đei vă jê̆ 52% kơsô̆ jên asong tŏk iŏk.

Vă jê̆ 1000 unh hnam đei tŏk iŏk dang 50 ti vă tơplih tơdrong jang, tĕh oei, tĕh choh jang xa păng hnam oei… Jên đei tŏk iŏk vang tơgop tơgŭm ăn dôm unh hnam tơnuh, vă jê̆ tơnuh păng unh hnam kon kông tơ̆ Gia Lai hơmet pơ ‘lơ̆ng pơmat tat lơ̆m tơdrong arih xa, jang atŏk tơiung mŭk drăm, pơm hơtŏk tơdrong arih xa păng tŏk klăih đơ̆ng tơnuh hin kơjăp ‘lơ̆ng.