VOV4.Bahnar - Kơ sơ̆ 09/9, Dơ nŏ anih vei lăng kon pơ lei dêh char Gia Lai pơ gơ̆r pơ tôch 20 sơ năm tơ lĕch tơ drong asong tŏk iŏk jên tơ gŭm tơ pôl hăm bơ ngai tơ nuh păng dôm bơ ngai kăl đei tơ gŭm nai kiơ̆ tơ drong Tơ chơ̆t 78 đơ̆ng Khul kơ dră tĕh đak. 

Jơ hop akŏm tơ̆ Gia Lai

Bơ̆ jang kiơ̆ tơ drong Tơ chơ̆t 78 đơ̆ng Khul kơ dră tĕh đak, 20 sơ năm âu ki, rim anih mong jên tơ gŭm tơ pôl đei pơ jing khul grŭp truh tơ̆ jơ̆p pơ lei pơ la, kueng kơ phô̆ tơ̆ dêh char Gia Lai, hăm 220 anih pơm hla ar, hlŏh 3.300 Grŭp ‘mơ ‘met păng tŏk iŏk jên, tơ gop tơ gŭm ăn hlŏh 225.000 unh hnam tơ nuh, unh hnam vă jê̆ tơ nuh tŏk klăih đơ̆ng tơ nuh hin.

Đĭ đei hlŏh 783.500 ‘nu bơ ngai kăl đei tơ gŭm đei tŏk iŏk jên hăm jên kon tŏ sĕt vă jang xa; 63.000 ‘nu hŏk tro, sinh viên mơ mat tat đei tŏk iŏk jên vă hŏk pơ hrăm; tơ gŭm man 14.000 tŏ hnam ăn unh hnam tơ nuh, man 212.000 tŏ đak tơ nglang păng anih mong râm rĕk, hơ met rơ gŏh cham char. Đơ̆ng 2021 -2025, dêh char Gia Lai athei rim anih jang đei ƀơm truh hơ nơ̆ng tơ lĕch trong asong tŏk iŏk jên hăm jên kon tŏ sĕt ‘moi kiơ̆ dôm trong jang đơ̆ng tơ ring găh tơ drong tơ plih ming trong jang mŭk drăm, pơ jing tơ ring tơ rang ‘nao.

Dơ̆ng: Tơ blơ̆