Vă jang đei đon pơhnŏng truh sơnăm 2025, hlŏh 90% bơngai đơ̆ng 15 sơnăm tŏk tơ̆ kơpal gơ̆h đŏk, gơ̆h chih nơ̆r yoăn, dêh char Gia Lai oei tơlĕch lơ trong jang, lơ̆m nŏh đei pơtho đŏk păng chih chư ăn kon pơlei tơ̆ tơring kon kông, đei kon pơlei văjê̆ truh 1 puăt akŏm đĭ đăng kơsô̆ kon pơlei lơ̆m dêh char. Kiơ̆ trong jang đơ̆ng Tơdrong jang tơm kơ tĕh đak atŏk tơ-iung mŭk drăm, tơpôl tơ̆ tơring kon kông păng groi kông jăl I (2021-2025), dêh char Gia Lai pơih 735 lăm pơtho đŏk-chih chư ăn văjê̆ 23.500 ‘nu bơngai tơ̆ 176 xăh.

Hơdrô̆ sơnăm ‘nâu, Anih vei lăng pơtho pơhrăm dêh char Gia Lai vă jang hơdoi hăm Anih vei lăng hơdrĕch kon kông păng dôm anih jang đei ƀơm truh, roi tơƀôh ăn Anih vei lăng kon pơlei dêh char tơlĕch jên ăn dôm tơring vă pơih 217 lăm pơtho ăn hlŏh 6500 ‘nu bơngai. Anih vei lăng pơtho pơhrăm dêh char Gia Lai, tơroi: ‘Nâu jĭ tơdrong jang tôch đei yoa ăn kon pơlei kon kông pơma atŭm păng Gia Lai pơma hơdrô̆ vă pơm hơtŏk đon hlôh vao ăn kon pơlei, đơ̆ng nŏh pơm tơjur tơnuh, hơtŏk tơdrong arih xa ăn kơdih kâu.