VOV4.Bahnar - Dôm sơ năm âu ki, gơ nơm đei tŏk iŏk jên hăm jên kon tŏ sĕt, hlŏh 225.000 unh hnam tơ nuh, unh hnam vă jê̆ tơ nuh păng dôm bơ ngai kăl đei tơ gŭm tơ̆ dêh char Gia Lai đei tơ mam vă jang xa, tưk tơ iung tơ drong choh jang, yak hlŏh tơ nuh hin păng klăih đơ̆ng tơ nuh hin kơ jăp ‘lơ̆ng. Jên asong tŏk iŏk hăm jên kon tŏ sĕt hlôi pơih trong tơ gŭm ăn bơ ngai tơ nuh đei tơ drong arih xa sơ đơ̆ng.

Unh hnam ‘nhŏng Rơ Châm Tích, jĭ 1 lơ̆m dôm unh hnam tơ̆ plei Lung Prông, xăh Ia Kriêng, apŭng Đức Cơ đei tơ drong arih xa tơ plih ‘lơ̆ng đơ̆ng rŏng kơ tŏk iŏk jên hăm jên kon tŏ sĕt. Đơ̆ng tôch mơ mat tat, hnam oei pơm pơ gia, unh hnam sư hlôi klăih đơ̆ng tơ nuh, man hơ met hnam kơ jăp ‘lơ̆ng. ‘Nhŏng Rơ Châm Tích, tơ roi truh tơ drong đei yoa đơ̆ng kơ sô̆ jên đei tŏk iŏk hăm jên kon tŏ sĕt đơ̆ng kơ dih kâu thoi âu: “Đơ̆ng đei tŏk iŏk jên tơ̆ anih mong jên tơ gŭm tơ pôl, unh hnam nhôn đei tơ gŭm tôch lơ lơ̆m tơ drong jang xa, vei lăng pơ gar 'long điêu, chĕh phe. Ƀât tam đei tŏk iŏk jên ki đei lơ tơ drong mơ mat tat, lơ̆m sơ năm 2017 inh pơ tăm chĕh phe, đơ̆ng rŏng kơ 'nŏh inh pơ tăm 'long điêu, đei iŏk yoa kŭm sơ đơ̆ng 'lơ̆ng”

Đơ̆ng kơ sô̆ jên đei tŏk iŏk hăm jên kon tŏ sĕt, lơ unh hnam kon pơ lei kon kông tơ̆ Gia Lai tŏk klăih đơ̆ng tơ nuh hin

Mŏ Kpă H’Nen oei tơ̆ Kueng 9, thĭ trơ̆n Phú Thiện iŏk unh om đang, đei mĕ ƀă chĕng song 5 sao chŭn vă jang xa. Yoa chŭn iĕ, mă đơ̆ng klo kăn tôch pơ nam choh jang ră mă lei tơ drong arih xa ƀât lăp oei kơ măh, athei chă pơ pơ̆ rim năr. Gơ nơm tơ drong tơ gŭm đơ̆ng ‘nhŏng ŏh, rông ƀôt, khul kơ dră tơ ring, đei tŏk iŏk 30 triu đơ̆ng Anih mong jên tơ gŭm tơ pôl apŭng, mŏ răt dơ̆ng tĕh mir, pơ tăm ƀum. Mŏ Kpă H’Nen ăn tơ băt, truh dang ei unh hnam kla vă tôm jên hre, tơ drong arih xa kŭm sơ đơ̆ng ƀiơ̆ bơih: “Adrol ki unh hnam Nen tôch mơ mat tat, đơ̆ng đei tŏk iŏk jên tĕh đak, ƀôh tơ drong arih xa nhôn dang ei păi ƀiơ̆ kơ sơ̆ lơ tơ pă.”

Kiơ̆ Anih mong jên tơ gŭm tơ pôl dêh char Gia Lai, anih âu hlôi tơ lĕch đei 17 tơ drong asong tŏk iŏk jên tih, hăm kơ sô̆ jên asong tŏk iŏk hlŏh 16.800 ti, jên asong tŏk iŏk truh khei 9 sơ năm ‘nâu đei vă jê̆ 5.800 ti, hăm dang 400 rơ bâu unh hnam đei tŏk iŏk vă jang xa, vang tơ gop ‘lơ̆ng ăn tơ drong jang tơm kơ tĕh đak găh tơ jur tơ nuh hin, pơ jing tơ ring tơ rang ‘nao tơ̆ dêh char. Ƀok Lê Văn Trí, Kơ dră chĕp kơ̆l Anih mong jên tơ gŭm tơ pôl kơ dêh char Gia Lai ăn tơ băt, tơ̆ hơ năp kơnh, anih adrin vă đĭ đăng bơ ngai tơ nuh păng dôm bơ ngai kăl đei tơ gŭm đei tŏk iŏk jên tĕh đak hăm jên kon tŏ sĕt ngăl, jang kiơ̆ dôm trong jang đơ̆ng tơ ring tơ lĕch găh tơ plih ming trong jang mŭk drăm păng pơ jing tơ ring tơ rang ‘nao:

“Lơ̆m 20 sơ năm tơ lĕch jang kiơ̆ Tơ drong tơ chơ̆t 78 hlôi tơ ƀôh hơ dăh tơ drong pơ gơ̆r păng trong vei lăng jên tôch đei yoa. Anih mong jên tơ gŭm ăn tơ pôl dêh char Gia Lai vă jang hơ doi hăm dôm anih jang kơ pal, dôm khul jang chinh trĭ tơ pôl vă tơ lĕch jên asong tŏk iŏk trŏ bơ ngai, akŏm jang ‘lơ̆ng tơ drong vei lăng jên đei tŏk iŏk, roi tơ ƀôh ăn unh hnam, tŏk iŏk jên ‘nŏh vă jang xa, pơ tho ăn unh hnam iŏk yoa jên mă trŏ tơ drong jang, đei yoa ‘lơ̆ng vang tơ gop tơ gŭm ăn bơ ngai tơ nuh păng dôm bơ ngai kăl đei tơ gŭm nai atŏk tơ iung tơ drong jang xa, pơm sơ đơ̆ng tơ drong arih păng tŏk klăih đơ̆ng tơ nuh hin kơ jăp.”

Hrei ‘nâu, Gia Lai đei 91 xăh jang kĕh tơ drong pơ jing tơ ring tơ rang ‘nao, mă lei hlŏh 46% kơ sô̆ kon pơ lei bơ ngai kon kông, tơ drong arih xa, mŭk drăm oei tơ ƀâp lơ mơ mat tat. Hăm tơ drong oei đei tơ pă ‘nâu, jên asong tŏk iŏk hăm jên kon tŏ sĕt oei hơ nơ̆ng jing tơ drong tôch đei yoa vă tơ gŭm ăn dôm pơ lei pơ la đei dơ̆ng tơ drong ‘lơ̆ng vă jang xa. Dôm khul grŭp, tơ pôl dơ̆ng tang, ưh lăp hơ nhăk jên truh trŏ bơ ngai đĕch, mă oei tơ gŭm ăn kon pơ lei băt trong jang xa, tơ gŭm băl jang tŏk dơ̆ng.

Hoàng qui: Chih

Dơ̆ng: Tơ blơ̆