Đơ̆ng rŏng 3 sơnăm oei lơ̆m hnam phak, brŏk tơ̆ hnam tơ̆ plei Dôr 1, xăh Glar, apŭng Đak Đoa, khei 10/2023 âu ki, ‘nhŏng Trôl đei grŭp pơm hla ar asong tŏk iŏk jên tơ̆ xăh, kŭm hăm khul kơdră tơring drơ̆ng nơ̆r chih măt păng tơgŭm pơm hla ar tŏk iŏk 50 triu hlak jên. Đei jên, ‘nhŏng ŏh 10 triu hlak jên răt 2 tŏ rơmo, vă rong iŏk ich pơm mơ̆r, rong yŏng hai. 40 triu oei đei dơ̆ng, ‘nhŏng hơmet ming 2 ha chĕh phe. ‘Nhŏng tơroi, kơdih kâu tôch bơnê yoa đei tơgŭm thoi âu: “Inh jĭ bơngai pơm glăi luơ̆t, mă lei oei hơnơ̆ng iŏk đei tơdrong tơgŭm đĕch. Inh vă iŏk jên âu jang chĕh phe. Inh hơmĕng rim tơdrong jang xa hiôk sơđơ̆ng vă jăh kla jên ăn teh đak hrôih hlŏh”.

Oei hăt sơ̆k chĕh phe ƀĕnh cham xă, mŏ Lê Thị Tuyết Nhung tơ̆ khul 2, thôn 3, xăh Nam Yang, apŭng Đak Đoa tơroi, 2 tân chĕh phe âu, mŏ ‘nao răt iŏk đơ̆ng kon pơlei lơ̆m xăh, gơnơm đơ̆ng kơsô̆ jên đei tŏk iŏk tơ̆ Anih mong jên tơgŭm tơpôl. Đunh kơ âu 2 khei, đơ̆ng rŏng kơ brŏk đơ̆ng hnam phak, mŏ tôch pơngơ̆t yoa ưh kơbăt vă jang xa thoi yơ, yoa hrơ mơlou kơ đe hai, yoa ưh kơ đei jên vă jang xa hai, ‘nŏh đei khul kơdră tơring păng công an tơgŭm pơm hla ar ăn mŏ tŏk iŏk 100 triu hăm jên kon tŏ sĕt vă jang xa. Hăm tơdrong hơbĕch hơbal đơ̆ng kơdih, mŏ iŏk kơsô̆ jên ‘nâu vă pơtăm păng răt chĕh phe.

Mŏ Nhung tơroi: “Inh tơchĕng vă iŏk jên âu pơtăm chĕh phe, mă 2 ‘nŏh vă tĕch mơdro rim năr. Đei jên ‘nâu inh tôch sơđơ̆ng, vă adrin jang xa mă ‘lơ̆ng. Păng hơmĕng kơsô̆ jên âu gơ̆h tơgŭm ăn dôm bơngai nhen thoi inh đei trong jang xa, hơmet ming tơdrong arih xa.”

Thiếu tá Trần Thị Luận- Phŏ Khul jang kiơ̆ Luơ̆t sek phak păng tơgŭm tư phap, vei lăng tơdrong mât oei xa hơdai dơ̆ng hăm tơpôl, Công an apŭng Đak Đoa tơroi: Đơ̆ng rŏng đei tơdrong Tơchơ̆t 22/2023/QĐ-TTg đơ̆ng Thủ tướng teh đak đei tơlĕch tơ̆ dêh char, đơ̆ng khei 10 truh khei 12/2023, Công an apŭng Đak Đoa hơnơ̆ng jang hơdoi hăm Anih mong jên tơgŭm tơpôl chă hơlen năng, chih măt vă tơgŭm ăn bơngai ‘nao brŏk đơ̆ng hnam phak lơ̆m dang 5 sơnăm vih tơ̆ âu tŏk iŏk jên jang xa. Kiơ̆ đơ̆ng noh, đĭ đei 45 'nu bơngai đei tơgŭm lơ̆m sơnăm 2023, hăm kơsô̆ jên jô̆ păh lăp đơ̆ng 70 truh 100 triu hlak jên 1 'nu. Tơchĕng adrol lơ̆m sơnăm 'nao 2024, tơdrong 'nâu gô hơnơ̆ng jing tơdrong gơnang yoa, chă tơgŭm ăn bơngai bơ̆h ƀơm pơm glăi sơđơ̆ng jơhngâm mât hơdai hăm tơpôl păng jang tŏk lơ̆m tơdrong arih xa:

“Inh tơchĕng ‘lơ̆ng hăm tơdrong Anih mong jên tơgŭm tơpôl đei trong tơgŭm, mă loi jĭ đe kăn ƀô̆ tơ̆ anih asong tŏk iŏk jên jang tôch tơnăp, hơnơ̆ng vei lăng grup  asong tŏk iŏk jên, tơgŭm pơm hơmet hal ar. Đei bơngai pơm kĕh hla ar lơ̆m 1,  2 năr đĕch, đe kăn ƀô̆ pơm hơmet vă tơtom tơlĕch jên ăn dôm bơngai âu tŏk iŏk vă jang xa”.

Dôm khei hơtuch sơnăm 2023 âu ki, tơ̆ dêh char Gia Lai oei đei dôm jĭt ‘nu bơngai ‘nao brŏk đơ̆ng hnam phak kŭm đei asong tŏk iŏk jên ‘năi. Ƀok Nguyễn Triều Quang-Phŏ Kơdră Anih mong jên tơgŭm tơpôl dêh char tơroi: bơ̆ jang trŏ trong jang, ưh đei hŭt hơchăng bu tơ̆ rŏng, đơ̆ng tŏk bŏk khei 10/2023, anih mong jên pơtơm tơlĕch trong asong tŏk iŏk âu.

Lơ̆m hlŏh 1 khei, đĭ tơlĕch hlŏh 4 ti hlak jên, ăn vă jê̆ 100 ‘nu bơngai tŏk iŏk. Mă tơpă ăn ƀôh, kơsô̆ jên âu đei yoa vă choh jang xa, tĕch mơdro iĕ păng hŏk tơdrong jang. Tơ̆ hơnăp kơnh, kŭm hăm hơnơ̆ng pơm hla ar asong tŏk iŏk, anih mong jên vă jang hơdoi hăm dôm anih jang kơpal, khul grŭp tơpôl, khul kơdră tơring pơlung, tơgŭm ăn bơngai tŏk iŏk, iŏk yoa jên đei yoa ‘lơ̆ng, pơjing tơdrong ‘lơ̆ng vă đe sư jang tŏk lơ̆m tơdrong arih xa.

“Khei ‘năr âu ki, Anih mong jên tơgŭm tơpôl hlôi jang hơdai tôch kơjăp hăm dôm khul jang chinh trĭ, tơpôl, iŏk pơm hla ar păng kŭm hăm khul kơdră tơring, công an, hơlen năng rim tơdrong, băt hơdăh tơdrong ‘mĕh vă đơ̆ng bơngai ‘nao brŏk đơ̆ng hnam phak. Tơ̆ hơnăp kơnh, anih mong jên vă hơnơ̆ng hơlen năng, tơlĕch trong jang đơ̆ng Anih vei lăng kon pơlei dêh char vă bơ̆ jang tơdrong ‘nâu ‘lơ̆ng hlŏh”.

Tơdrong asong tŏk iŏk jên hăm bơngai ‘nao brŏk đơ̆ng hnam phak kiơ̆ Tơdrong tơchơ̆t kơsô̆ 22/2023/QĐ-TTg ‘năr 17/8/2023 đơ̆ng Thủ tướng teh đak jĭ tơdrong jang tôch ‘lơ̆ng, ƀĕnh jơhngâm đon ‘mêm mơnat. Tơdrong tơlĕch jang hrôih păng bơ̆ jang đei yoa ‘lơ̆ng tơ̆ dêh char Gia Lai hlôi tơgop tưk tơiung đei jơhngâm đon ‘lơ̆ng nŏh, vă tơgŭm ăn dôm bơngai bơh ƀơm pơm glăi gơ̆h đei anih gơnang sơđơ̆ng dơ̆ng kơjăp lơ̆m tơdrong arih xa păng đei tơdrong ‘lơ̆ng vă jang tŏk./.