Hloh 3 khei kơ âu, hơnơ̆ng ăh 6 jơ kơmăng đơ̆ng ‘năr mônh truh ‘năr pơđăm rim giĕng, Lăm pơtho hŏk đŏk – chih chư tơ̆ Hnam trưng Jăl kơđeh Ngô Quyền (phương Chi Lăng, pơlei tơm Pleiku unh tơ̆k hơdăh păng ang jơva nơ̆r pơre đŏk chư đơ̆ng dôm bơngai hŏk. Lăm hŏk đei 30 ‘nu hŏk tơ̆ pơlei Ia Lang, phương Chi Lăng, pơlei tơm Pleiku. Đơ̆ng rŏng kơchăng chih đang dôm chư mă kô pơtho chih lơ̆m kơƀang, pơmai H’Thiếu, bơngai mĕ hăm 3 ‘nu kon hŏk tơ̆ lăm âu tơroi:  “Adrol âu ki, unh hnam inh hin dơnuh tơnap tap, ƀă lôch hơchăng, tơdrong erih unh hnam ưh kĕ đei noh inh ưh đei năm hŏk, noh ưh kơ băt chư. Yơ̆ng âu ki, đei kơdră thôn, phương păng găh hnam trưng truh hơlêm hơvơn, inh pơkăp khŏm mă năm hŏk vă băt kơ chư. Dôm năr blŭng năm hŏk chih chư tơnap tap dêh, mă lei inh ‘meh gơh đŏk, băt chih noh gô adrin hŏk pơhrăm”

Tơ̆ lăm hŏk, yă H’Lung (57 xơnăm, adoi oei tơ̆ pơlei Ia Lang, phương Chi Lăng) duh tŏk bŏk oei pơhrăm chih kơsô̆ tơm. Yă H’Lung tơroi, kơyươ xơnăm hlôi ‘lŏ, noh tơdrong hŏk ưh gan chăm nhen đe mơlôh lơ̆m lăm, chŏng mă hăm pơkăp khŏm mă pơhrăm vă kơdih po ưh đei kơtul chơdư, yă hlôi pơ-‘nam truh hŏk tơ̆ lăm. Dang ei, yă hlôi băt đŏk, băt chih hơnăn kơdih po bơih: “Inh ưh kơ băt chư, ưh kơ băt chă jô̆ hơlen, đei năm hŏk vă băt chư, kơdih chih hơnăn po noh inh chơt hơ-iă dêh, hmach bơnê kơ kô pơtho hlôi pơtho chư ăn kơ inh păng rim bơngai”

Kiơ̆ kô pơtho Dương Thị Kiếu – Hnam trưng Jăl kơđeh Ngô Quyền, phương Chi Lăng, pơlei tơm Pleiku, kiơ̆ tơdrong chă hơlen pơgia đơ̆ng hnam trưng ăn ƀôh, pơlei Ia Lang đei pơhlom 100 ‘nu bơngai ưh kơ băt chư.

Ăh đei hơvơn năm hŏk tơ̆ lăm, lơ bơngai pơngơ̆t kơ đon, mơlâu kơlih hlôi ‘lŏ xơnăm, minh ƀar ‘nu nai noh nhơ nhrơ̆ kơyuơ ưh hlôh vao noh hli ưh kơ gơh hŏk. Mă lei, đơ̆ng rŏng năm truh tơ̆ lăm lơ̆m dôm năr, rim bơngai jing lăp, noh chă pơxô̆ băl năm hŏk kơdrâ̆m hloh: “Lăm hŏk mă lơ noh bơngai ‘lŏ xơnăm, xơ̆ ưh đei năm hŏk, truh hŏk tơ̆ âu, chư hăm đe yĕt noh tơnap tap hloh, mă lei đe yĕt nhan kơ pơhrăm mă hơyuh ‘năr tơngiĕt, dăh mă ‘mi noh đe yĕt adoi năm hŏk tôm tơ̆ lăm. Dang ei rim bơngai adoi băt chih chư 100%, găh đŏk pơre noh kloh klĕch đei hloh 50% bơih”

Adoi nhen thoi noh, Hnam trưng Jăl kơđeh Lê Lai (xăh Chư Á, pơlei tơm Pleiku) jing minh lơ̆m 7 anih pơtho pơhrrăm lơ̆m pơlei tơm đei rơih jang xơnong pơtho đŏk păng chih chư ăn kon pơlei tơring kon kông kiơ̆ Tơchơ̆t kơ teh đak găh hơtŏk mŭk drăm – tơpôl tơring kon kông păng groi kông jăl xơnăm 2021-2030.

Ƀok thâi Lê Minh Tùng – Kơdră hnam trưng Jăl kơđeh Lê Lai ăn tơbăt, hnam trưng hlôi jang atŭm hăm Anih jang vei lăng kon pơlei xăh Chư Á păng dôm thôn, pơlei hơlen lăng kơsô̆ bơngai kon kông tam mă băt đŏk, băt chih chư lơ̆m xơnăm đơ̆ng 15 truh 60, vă hơvơn kon pơlei năm hŏk pơhrăm: “Hnam trưng adoi akŏm khul jang chă hơvơn bơngai năm hŏk đơ̆ng 15 truh 60 xơnăm păng truh dang ei noh đei 23 ‘nu kiơ̆ hŏk tơ̆ lăm xut ưh kơ băt chư. Tơdrong pơkăp xut ưh kơ băt chư đei axong jing 2 jăl, jăl mă 1 đei 3 ki, hơtŏ hăm 42 giĕng, dang rim ki noh đei 315 jơ pơtho, jăl mă  2 klăh axong jing 2 ki, hơtŏ hăm jăl lăm 4 păng lăm  5 noh keh đang tơdrong hŏk pơhrăm”

Lơ̆m xơnăm âu, Anih Pơtho Pơhrrăm dêh char Gia Lai gô jang atŭm hăm Anih jang găh Hơdrung bơngai kon kông păng dôm anih jang đei tơrĕk tơgŭm ăn Anih jang Vei lăng kon pơlei dêh char axong jên mong ăn dôm tơring vă pơih 217 lăm hŏk ăn hloh 6.500 ‘nu bơngai. Ƀok Nguyễn Văn Đông – Kơdră Anih Pơtho hŏk Jăl kơđeh, Mâm non, lơ̆m Anih Pơtho Pơhrrăm dêh char Gia Lai ăn tơbăt: “ ‘Nâu jing tơdrong jang pơyua ăn tơdrong erih kon pơlei kon kông pơma atŭm păng ăn Gia Lai pơma adrô̆ đei hơtŏk tơdrong hlôh vao vă đơ̆ng noh klaih đơ̆ng hin dơnuh, hơtŏk pơ-‘lơ̆ng tơdrong erih kơ po. Dang ei tơdrong pơkăp jang âu hlôi đei axong ăn dôm apŭng, thĭ xăh, pơlei tơm, minh ƀả anih jang hlôi akŏm bơngai hŏk vă đe yĕt pơjuăt hăm tơdrong hŏk pơhrrăm. Lơ̆m khei năr truh, tơdrong jang gô đei pơih xă păng tơlĕch pơtho hŏk lang xă hloh tơ̆ dôm tơring”.

Kiơ̆ tơlĕch jang Tơchơ̆t pơm jang kơ teh đak găh hơtŏk mŭk drăm – tơpôl tơring kon kông păng groi kông jăl xơnăm 2021-2025, dêh char Gia Lai pơih đei 735 lăm pơtho đŏk – chih chư ăn jê̆ 23.500 ‘nu bơngai tơ̆ 176 xăh.