VOV4.Bahnar - Dêh char Gia Lai ‘nao pơ gơ̆r Lêh hơ pong, pơ dong ƀŭ 18 kơ ting lĭnh lôch dŏng teh ‘noh lĭnh iung jang tơ gŭm păng bơ ngai joăt jang kơ Việt Nam lôch hơ chăng tơ̆ Campuchia tơ̆ pơ sat Lĭnh lôch dŏng teh đak kơ apŭng Đức Cơ (Gia Lai). Tơ̆ jơ pơm lêh, kơ dră chĕp kơ̆l Anih vei lăng kon pơ lei dêh char Gia Lai pơ ma hơ dăh: Đe kang ƀô̆, khŭl linh năm jang tơ gŭm păng bơ ngai joăt jang kơ Việt Nam hlôi hơ dai hăm kon pơ lei Campuchia nuih mơng iung tơ blăh, plang hơ dâu, tơ gŭm kon pơ lei Campuchia iŏk đei rơ ngei, klăih đơ̆ng tơ drong răm pơ lôch rŭng. Tơ drong hŭt hơ kâu đơ̆ng đe lĭnh lôch dŏng teh đak ‘noh jĭ tơ drong hiong răm tôch kơ tih tên, pơm ăn tơ drong ơh hmach ăn kon pơ lei lơ̆m teh đak.

Dôm kơ ting lĭnh lôch dŏng teh đak ‘nâu yua đơ̆ng Đội K52 (Anih tơm pơ gơ̆r khŭl linh dêh char Gia Lai) tơ chă, akŏm lơ̆m pơ yan tŏ sơ năm 2021 - 2022. ‘Nâu jĭ pơ yan tŏ ‘măng mă 21, Đội K52 jang tơ drong jang akŏm kơ ting lĭnh lôch dŏng teh đak tơ̆ teh đak Campuchia. Kiơ̆ kơ ‘noh, Khŭl hlôi chih iŏk đei 77 tơ drong kơ tơ̆ng ang găh hơ nih ƀŭ dôm lĭnh lôch dŏng teh đak, pơ gơ̆r tơ chă tơ̆ 22 hơ nih đei tơ roi pơ sat lĭnh lôch dŏng teh đak păng pơ gơ̆r iŏk akŏm đei 18 kơ ting lĭnh lôch dŏng teh đak.

Thuem: Tơ blơ̆