Lơ̆m kơsô̆ 22 kơ̆l linh lôch tang tĕh đak đei sir akŏm, chih tơvih tơ̆ tĕh đak pơyan phang 2022-2023, đei 8 kơ̆l linh chă ƀôh tơ̆ dêh char Stung Treng. Tơ̆ Ratanakiri păng Preh Vihear, 1 dêh char chă ƀôh 7 kơ̆l linh lôch tang tĕh đak. Truh dang ei, Khul K52 Gia Lai hlôi chă ƀôh, sir akŏm păng chơ brŏk đei 1.468 kơl linh păng bơngai juăt jang đơ̆ng Việt Nam lôch tang lơ̆m khei ‘năr tơblăh sơ̆. 

Tơ̆ jơ pơm lêh, kơdră chĕp kơ̆l dêh char Gia Lai, dôm anih jang kơpal, khul grŭp tơpôl, dơ̆ng tang ăn đĭ đăng kon pơlei, khul linh tơblăh kơ dêh char Gia Lai čhưu jơhngâm sơng đe linh lôch tang ăn tĕh đak vih dơ̆ng tơ̆ pơlei, đei ƀŭ hơmet ‘lơ̆ng hơiă. Hăm jơhngâm kŭp yom, dôm bơngai tang măt hlôi pơyơ̆r pơkao, sŏh plang nhang, tơƀôh jơhngâm đon ‘mêm bơnê tôch ai đơ̆ng kon pơlei Việt Nam hăm dôm ‘nu kon hơ ‘lơ̆p gơ̆h hơgei kơ tĕh đak, iung tơblăh kơtang, chu plang hŭt hơkâu yoa tơdrong rơngei hiôk hian kơ 2 hơdrĕch hơdrung Việt – Campuchia.