VOV4.Bahnar - Năr 26/9, Jơnŭm chư pơglang ƀrê apŭng Đak Pơ, dêh char Gia Lai iung jang hơdoi hăm Khul jang Ƀơm trŭh Tơpôl Australia (ASIF) tơ̆ Việt Nam hơlen, pơjao 5 hơnĭh jang pơm đak koai găh tơdrong vă jang “Đak koai rơgŏh pơjao pơlei” ăn kon pơlei tơ̆ apŭng Đak Pơ, dêh char Gia Lai.

Đak rơgŏh đơ̆ng tơdrong jang “Đak koai pơjao pơlei"

Kiơ̆ kơ ‘nŏh, 5 đak koai koer đei pơjao ăn tơ̆ 5 pơlei găh tơring  Yang Bắc, apŭng Đăk Pơ. Kon jên koer đak koai au kơ jă đơ̆ng 80 trŭh 120 trĭu lơ̆m 1 hơnĭh đak koai. Tơ̆ jơ pơjao, kang ƀô̆ Jơnŭm Chư pơglang ƀrê apŭng hăm Khŭl jang ASIF hlôi pơtho kon pơlei trong iŏk yua adoi nhen vei lăng đak koai. Tơdrong vă jang “Đak koai rơgŏh pơjao pơlei” đei tơlĕch jang đơ̆ng sơnăm 2021-2023 kơ yuơ Khŭl jang ASIF iung jang hơdoi hăm Jơnŭm chư pơglang ƀrê dêh char Gia Lai iung jang, gô tơlĕch tơgŭm ăn 200 tŏ đak koai lơ̆m dêh char Gia Lai.

Tơblơ̆ nơ̆r: Amazưt