Plei Kret Krot, xăh Hra, apŭng Mang Yang adrol sơ̆ đei hlŏh 1 puăt unh hnam kon pơlei yak trong glăi, kiơ̆ lui Hà Mòn, pơm tơ hiong tơdrong sơđơ̆ng. Dôm sơnăm âu ki, kŭm hăm tơdrong tơjră, sut hŭt lê̆ lui ưh kơ trŏ âu, khul kơdră tơring dar deh pơjing, tơmât đảng viên ‘nao, hơmet kơjăp anih jang chinh trĭ. Đơ̆ng tơring ưh đei đảng viên, dang ei lơ̆m pơlei đĭ đei 9 ‘nu đảng viên bơih. Anih chĕp kơ̆l đảng xăh Hra pơjao ăn rim đảng viên tơ̆ pơlei vei lăng 1 grŭp unh hnam. Kiơ̆ kơ ‘nŏh, đảng viên năm hơdrol lơ̆m tơdrong jang xa, atŏk tơiung mŭk drăm, pơjing tơdrong arih xa ‘lơ̆ng rơgei tơ̆ pơlei, bơ̆ jang ‘lơ̆ng dôm trong jang đơ̆ng đảng, teh đak, adrin krao hơvơn, roi tơbăt, pơtho tơƀôh ăn rim unh hnam jang kiơ̆. Kiơ̆ đơ̆ng noh chă ƀôh, pơjing trong pơtho pơhrăm vă iŏk tơmât dôm bơngai rơgei đei đon ‘lơ̆ng mât jang Đảng.

‘Nhŏng Sin- đảng viên tơ̆ plei Kret Krot, xăh Hra ăn tơbăt: “Đảng viên pơm kiơ̆ ‘lơ̆ng trong jang đơ̆ng Đảng, teh đak. Jĭ 1 ‘nu đảng viên tơnăp ‘lơ̆ng lơ̆m pơlei blŭng a ‘nŏh jang yă kiơ kŭm athei jang mă trŏ vă kon pơlei lăng păng pơm kiơ̆”.

Lơ̆m xăh Hra apŭng Mang Yang dang ei đei vă jê̆ 2.000 unh hnam kon pơlei, 63% kơsô̆ kon pơlei ‘nŏh jĭ bơngai kon kông. Lơ̆m xăh đei 15 chi ƀô̆, 177 ‘nu đảng viên. Lơ̆m noh, 3 pơlei ưh sơđơ̆ng chinh trĭ adrol sơ̆ hlôi pơjing đang anih jang đảng. Hlŏh 1 puăt kơsô̆ bơngai jang tơ̆ pơlei ‘nŏh jĭ đảng viên. Xăh adrin truh sơnăm 2025 kơsô̆ âu truh 80%. Anih jang đảng, đảng viên đei pơtho pơ ‘lơ̆ng, jang roi tŏk ‘nŏh ji tơdrong tôch đei yoa ăn tơdrong sơđơ̆ng tơ̆ rim pơlei.

Yă Nguyễn Thị Huệ- Phŏ Kơdră Jơnŭm pơgơ̆r xăh Hra, ăn tơbăt: “Đơ̆ng rŏng đei tơdrong pơjao đơ̆ng Anih chĕp kơ̆l Đảng ‘nŏh inh jang lơ̆m Khul chĕp kơ̆l đảng jur vei lăng pơlei, adrin jang đĭ jơhngâm. Mă 1 pơtho ăn chi ƀô pơgơ̆r hŏk hôp mă trŏ hăm nơ̆r pơtho 12 đơ̆ng Anih pơgơ̆r Trung ương păng Nơ̆r pơtho 03 đơ̆ng Anih pơgơ̆r đảng apŭng Mang Yang; chă tơgŭm ăn chi ƀô̆ găh tơdrong chĕp kơl pơgơ̆r, bơ̆ jang dôm tơdrong tơ̆ tơring; tơgŭm ăn đảng viên lơ̆m chi ƀô̆ băt hơdăh tơdrong jang đơ̆ng kơdih hăm tơring”.

Vei sơđơ̆ng chinh trĭ, tơdrong arih xa kơ kon pơlei tŏk hơnơ̆ng. Sơnăm 2023, iŏk yoa jô̆ păh lăp kiơ̆ kơ̆l bơngai tơ̆ xăh đei hlŏh 40 triu hlak jên, kơsô̆ unh hnam tơnuh pă 13,6%, jô̆păh lăp 1 sơnăm jur đơ̆ng 5 - 7%. Ƀok Đinh Văn Tâm- Phó Bí thư Đảng xăh Hra, apŭng Mang Yang ăn tơbăt: “Lơ̆m khei ‘năr tơjê̆ âu nhôn pơjing tơdrong ‘lơ̆ng, hơnơ̆ng pơgơ̆r hŏk hôp chi ƀô̆ găh rim tơdrong, nhôn ăn 1 ‘nu bơngai jang ăn teh đak jur pơm Phó Bí thư chi ƀô̆, kŭm hăm chi ƀô̆ pơjing trong jang tơm. Pơtih gia nhen pơtho pơhrăm, atŏk tơiung đảng, đang kơ ‘nŏh jĭ sut pơđĭ pơngot, tơjur tơnuh hin, bơ̆ jang tang găn tơdrong lui Hà Mòn”.

Anih jang chinh trĭ đei hơmet kơjăp, dar dĕh pơm hơtŏk tơdrong ‘lơ̆ng, đei yoa, vang tơgop vei kơjăp tơdrong sơđơ̆ng chinh trĭ, pơm tơplih rim tơdrong lơ̆m tơdrong arih xa kơ kon pơlei tơ̆ xăh Hra.