Năr 21/10, Anih jang Măt trâ̆n tôh kuôk Việt Nam dêh char Gia Lai pơgơ̆r Hop akŏm pôk bơnê hăm Kơdră Anih jang măt trâ̆n tôh kuôk tơ̆ xăh păng Kơdră Anih jang Măt trâ̆n gơh rơgei kơ dêh char Gia Lai jăl xơnăm 2017-2022. 

Rŭp găh tơdrong hop akŏm.

Gia Lai dang ei đei 220 Kơdră Anih jang Măt trâ̆n tôh kuôk Việt Nam tơ̆ xăh păng 1576 Kơdră Anih jang Măt trâ̆n. Chĕp vei xơnong jang tơnăp hăm tơpôl, 5 xơnăm kơ âu, rim kang ƀô̆ măt trâ̆n hlôi hăt hot jang hadoi hăm dôm anih jang tơ̆ tơring tơroi tơbăt, hơvơn kon pơlei vang tơgop, tơgŭm vă man hnam oei, tơgŭm trong jang xa ăn unh hnam hin dơnuh, plang teh vă trong nơnăm tơ̆ tơring pơxĕl 'nao; tơroi hơvơn kon pơlei kon kông tơplih đon kơchĕng trong pơm jang vă tơjur hin dơnuh kơjăp xơđơ̆ng. Lơ kang ƀô̆ đei dôm trong jang tơnăp rơgei, đei jơnei lơ̆m tơdrong tơroi tơbăt, jang hadoi lơ̆m tơpôl kon pơlei vă chĕp vei jơhngơ̆m pran tơguăt tơguăl kon pơlei. Ƀơ̆t 'măng âu, Anih vei lăng kon pơlei dêh char Gia Lai păng Anih jang Măt trâ̆n tôh kuôk Việt Nam dêh char Gia Lai pôk ƀăng hmach bơnê ăn 92 tơ 'ngla jang rơgei đei jơnei.