Kiơ̆ tơdrong hơgăt, vă vei lăng 10.000 hek tar bri tơ̆ xăh Ia Mơr, apŭng Chư Prông, Anih vei lăng bri tang găn Ia Meur kăl kơ đei 17 ‘nu bơngai jang. Mă lei, lơ̆m lơ sơnăm âu ki, lơ̆m anih jang lăp đei 12 ‘nu. Bơ̆ jang ưh kơ jô̆ kơ ‘năr gơmăng tơ̆ tơring ‘noh hơnih tơtŏ găh tơdrong pơm glăi luơ̆t bri ‘long kơ dêh char, mă lei jên khei kơ kang ƀô̆, bơngai jang tơ̆ âu lăp dang 5 truh 7 triệu hlak jên 1 ‘nu 1 khei. Ƀok Đinh Văn Khẩn - Kơdră anih vei lăng Bri tang găn Ia Meur, 1 lơ̆m kơsô̆ 5 ‘nu kơ anih jang, chih hla ar apĭnh pơdơh jang lơ̆m sơnăm 2022, mă lei tam mă đei asong ăn, tơbăt:  “Tơdrong jang vei lăng bri hrei ‘nâu mơmat tat, tơ̆ Anih vei lăng bri Ia Mơr ‘noh sa roi mơmat tat hloh dơ̆ng, jê̆ dơnâu đak Ia Mơr. Đei 3 thong đak tơm ming man đĭ lơ̆m bri, oei kon pơlei ‘noh ƀôh thoi noh ‘noh ‘meh đei teh choh jang sa. 2 ƀiên chê̆ pơdơh bơih. Dang ei mă pơdơh ‘noh ưh kơ đei bơngai jang”.

Gleh hrat, jên khei tŏ sĕt, bơngai jang vei lăng bri oei hơnơ̆ng athei tơ jră hăm tơdrong krê hơmơt. Ƀok Đinh Mạnh Phong- Kơdră Anih vei lăng bri tang găn Chư Sê tơbăt, hrei ‘nâu, jô̆ păh lăp 1 ‘nu bơngai jang đei hơnăp jang vei lăng 1 tơƀôt, hơtŏ dang 1000hek tar bri. Bri kông đa hơtăih kơ hơnih kon plei oei, hơtăih hơtŏ. Bơngai tơtông bơ̆n ‘long, tơgar iŏk teh gô tơdrŭt plơ̆ mưh đei chă ƀôh, mă lei bơngai jang vei lăng bri đa ưh kơ kĕ: “Mĭnh ƀar ‘nu ‘nhŏng oh đei khŭl tơ tông bơ̆n ‘long bri hil, teh, ƀơm ưh kơ ‘lơ̆ng truh jơhngơ̆m đon bơ̆ jang. Tơdrong gơh jang đơ̆ng dôm anih jang vei lăng bri tŏ sĕt dêh, lăp đei chă ƀôh ‘noh tơroi tơbăt đĕch. Nhen anih jang nhôn, kiơ̆ tơdrong hơgăt ‘noh hơbăn ao, tơmam tơgŭm ‘noh iŏk tơ̆ anih jang, kon jên ‘noh tŏ sĕt dêh, athei chă ‘mơ ‘met tôch ai đĕch”.

Tơ̆ dêh char Gia Lai dang ei đei 22 anih vei lăng bri, hăm vă jê̆ 500 kang ƀô̆, bơngai jang, pơtêng hăm tơdrong hơgăt vei lăng bri ‘noh oei ưh kơmăh hloh 200 ‘nu. Bơngai vei lăng bri đĭ ưh kơ măh, mă lei 2 sơnăm âu ki, đei hloh 20 ‘nu hlôi pơdơh kơ jang, dôm jĭt ‘nu nai đei ‘meh vă pơdơh mơ̆n.

Ƀok Nguyễn Văn Hoan- Phŏ Kơdră Anih vei lăng găh choh jang sa păng hơtŏk tơiung tơring tơrang tơbăt, anih jang hlôi tơlĕch lơ trong jang vă gơ̆t jơ̆ng bơngai jang vei lăng bri, mă lei găh lơ chă pơlung băl đĕch: “Ƀơ̆t măt, nhôn pơlung kang ƀô̆ bơngai jang ‘mêm kơ tơdrong jang, hơdrin jang vă vei sơđơ̆ng tơdrong jang vei lăng bri, hơdai hăm pơm tơdrong hiôk hloh pơ lơh băl kang ƀô̆ jang bơ̆ jang tơ̆ tơring hơtăih vih jê̆ ƀiơ̆ vă tơjur khei ‘năr athei năm hơtăih, pơm tơdrong hiôk ăn ‘nhŏng oh gơh yua dôm trong jang tơgŭm ‘nao vă ‘nhŏng oh sơđơ̆ng bơ̆jang.”

Hrei ‘nâu, Anih vei lăng găh choh jang sa păng hơtŏk tơiung tơring tơrang Gia Lai hơnơ̆ng jang tơgŭm ăn Anih vei lăng kon pơlei dêh char apĭnh trung ương set hơlen, hơmet ming trong tơgŭm, tơplih ‘lơ̆ng hơnih bơ̆jang hăm khŭl vei lăng bri.