Tơ̆ teh đak buăl Campuchia, lơ̆m sơnăm ‘nâu, đội K52 dêh char Gia Lai hlôi dăr hơlen, tơchă lơ̆m 101 phum, pơlei găh 3 dêh char Ratanakiri, Stung Treng, Prét Vi Hia. Chih iŏk đei 81 tơdrong kơtơ̆ng ang păng iŏk akŏm đei 18 kơting lĭnh lôch dŏng teh đak, hơtŏk akŏp kơ sô̆ hlôi akŏm, chơ vih tơ̆ teh đak đơ̆ng sơnăm 2001 truh dang ei ‘noh 1446 kơting lĭnh lôch dŏng teh đak. Kŭm lơ̆m sơnăm 2022, Đội K52 hlôi tơchă, iŏk akŏm đei 28 kơting lĭnh lôch dŏng teh đak tơ̆ dôm tơ ring lơ̆m dêh char.

Tơ pôl Đội K52 chơt hơiă đei pôk hơ păh mê đai jang jơnei dơ̆ng mă Pêng đơ̆ng Kơdră teh đak

Đĭ đăng dôm kơ ting lĭnh lôch dŏng teh đak tă kơ đei dôm tơ ring kŭm hăm dôm anih jang kơpal pơgơ̆r lêh hơpong pơ dŏng ƀŭ 1 trong ‘lơ̆ng. Dêh char Gia Lai băt hơdăh tơdrong jang sơnăm 2023 hơdrin tơchă iŏk akŏm đơ̆ng 40 truh 60 kơting lĭnh lôch dŏng teh đak. Hơnơ̆ng jang kiơ̆ tơdrong jang tơchă, iŏk akŏm kơting lĭnh lôch dŏng teh đak lĭnh jang tơgŭm păng bơngai joăt jang Việt Nam lôch hơchăng kiơ̆ rim jơ hnơr tơblăh tơ̆ Campuchia, drơ̆ng nơ̆r dôm trong jang pơgơ̆r bơ̆jang kiơ̆ vă tơchă, iŏk akŏm păng băt hơdăh kơting lĭnh lôch dŏng teh đak oei ưh kơ đei kơtơ̆ng ang dôm sơ năm đơ̆ng rŏng iŏk đei ‘lơ̆ng hloh.