Đơ̆ng rŏng lơ sơnăm hrat hrĭn hăm tơdrong hin dơnuh, unh hnam pơmai RơLan Siu H’Hằng, oei tơ̆ pơlei Tu 1, xah Ia Ga, apŭng Chư Prông hlôi klaih đơ̆ng hin dơnuh tơpă bơih. Pơmai H’Hằng ăn tơbăt, unh hnam pơmai đei 3ha ‘long ƀăch đan, păng pơmai adoi đei lơ tơdrong vă pơm jang. Mă lei kơyuơ ưh đei jên jang, noh lơ̆m lơ sơnăm tơnap tap chă hơrih xa mă ưh kơ kĕ tŏk ƀiơ̆. Đunh kơ âu 3 sơnăm, unh hnam pơmai đei tơgŭm tŏk iŏk 50 trĭu hlj đơ̆ng jên mong tơchơ̆t tơgŭm ăn unh hnam hin dơnuh, pơmai hlôi jang đei dôm tơdrong po hơpơi ‘meh. Gơnơm chă jô̆ hơlen jang xa tơnăp, dang ei, pơmai đei iŏk yua đơ̆ng 40 truh 50 trĭu hlj 1 sơnăm đơ̆ng tơdrong pơm jang: “Hơdrol ki unh hnam ƀơm lơ toanpt ap, ‘meh răt kon yŏng păng hơdrĕch ‘long pơtăm măưh đei jên. Đơ̆ng rŏng đei asong tŏk iŏk jên đơ̆ng anih mong jên tơgŭm tơpôl, noh tŏk iŏk 50 trĭu hlj, răt 1 tŏ rơmo, pơtăm kaphê, păng jang pơgar ‘long ƀăch đan. Dang ei, đei yua đơ̆ng 40 – 50 trĭu hlj 1 sơnăm”.

Nhen thoi ăi, sơnăm âu, unh hnam Ksor Tứ tơ̆ pơlei Choanh, xah Uar, apŭng Krông Pa chơt hơ-iă kơlih đei hnam ‘nao. ‘Nhŏng ăn tơbăt, đunh kơ âu 3 sơnăm, gơnơ̆m đei tŏk iŏk 40 trĭu hlj đơ̆ng jên mong tơgŭm tơpôl, ‘nhŏng pơtăm kơtao, răt rơmo, vă hơtŏk pơm jang. Đơ̆ng rŏng 3 sơnăm, ‘nhŏng kla đĭ hre, man đei hnam păng đei khul rơmo 5 tŏ. ‘Nhŏng chơt hơ-iă tơroi: “Hơdrol ki unh hnam inh, oei lơ̆m hnam hyah hyok. Teh đak tơgŭm jên tŏk iŏk pơm jang, noh inh pơm đei hnam ‘nao. Dang ei inh sơđơ̆ng bơih, inh akŏm jơhngơ̆m pơm jang hơtŏk mŭk drăm”

Dang ei, hre hrông kơ Anih mong jên tơgŭm Tơpôl pơm jang tơ̆ Gia Lai tơ̆ tơring noh hloh 6.700 tih hlj, hăm 153.925 bơngai tŏk iŏk. Hơdrô̆ sơnăm 2023, Anih mong jên tơgŭm Tơpôl pơm jang tơ̆ Gia Lai đei kơsô̆ hre ăn tŏk iŏk noh 1.700 tih hlj, hăm hloh 41.500 ‘nu bơngai tŏk iŏk. Lơ̆m noh, kơsô̆ bơngai tŏk iŏk lơ̆m unh hnam hin dơnuh, unh hnam kon pơlei kon kông gơh đei asong tŏk iŏk kiơ̆ Tơchơ̆t 11/NQ-CP đơ̆ng Jơnŭm pơgơ̆r teh đak nhen ăn tŏk iŏk hnam oei tơpôl, tŏk iŏk hơtŏk mŭk drăm – tơpôl ăn kon pơlei kon kông noh hloh 13.000 unh hnam. Ƀok Đinh Văn Nghĩa – Phŏ Kơdră Anih Mong jên tơgŭm Tơpôl dêh char Gia Lai ăn tơbăt: “Anih Mong jên tơgŭm Tơpôl dêh char hơnơ̆ng lăng tơgĭt tơdrong tơlĕch tơgŭm tŏk iŏk ăn kon pơlei kon kông tơ̆ dôm tơring. Nhôn hlôi jang atŭm kơjăp hăm dôm jăl jang, anih jang păng tơring vă chă hơlen băt tơdrong kăl jên jang đơ̆ng dôm unh hnam hin dơnuh, unh hnam tơjê̆ hin dơnuh, unh hnam kon pơlei kon kông păng unh hnam mă teh đak tơchơ̆t tơgŭm nai, vă tơlĕch asong jên tŏk iŏk ăn dôm tơring kiơ̆ kơ tơdrong tơnap tap păng tơdrong kăl kơ kon pơlei gơh trŏ ƀlep păng jang đei jơnei”.

Jên asong tŏk iŏk đơ̆ng Anih mong jên tơgŭm Tơpôl hlôi tơgop tơgŭm dôm unh hnam hin dơnuh, unh hnam tơjê̆ hin dơnuh păng unh hnam kon pơlei kon kông tơ̆ Gia Lai kĕ sek tơlang keh kong tơdrong tơnap tap lơ̆m hơrih xa, hơtŏk mŭk drăm, hơtŏk pơm jang klaih đơ̆ng hin dơnuh kơjăp sơđơ̆ng.