Kiơ̆ ƀok Huỳnh Quang Thái- Kơdră vei lăng kon pơlei apŭng Chư Pưh, tơ ‘ngla tơmât jên jang man Hnam kơmăy unh điên kial Ia Le 1, ‘nŏh Công ty tơmât jên atŏk tơiung unh điên kial Cao nguyên 1, hlôi bơ̆ jang păng iŏk đei tơdrong drơ̆ng nơ̆r hăm 3 lơ̆m 4 unh hnam đei hnam oei, tơmam ƀơm ưh ‘lơ̆ng đơ̆ng dôm jrăng tourbin kial.

Tơdrong drơ̆ng nơ̆r ‘nŏh anih jang vă tơgŭm ăn dôm unh hnam man hnam lăp hăm hnam kơjăp ‘lơ̆ng tơ̆ tơring tơrang, hnam man jê̆ tơring oei xa kơ kon pơlei; man trong, tuh tơmo hơga vă yak vih vât hiôk hian; pơm lăp hăm tơdrong ‘mĕh vă găh unh điên, đak yoa. Ƀok Huỳnh Quang Thái ăn tơbăt, dang ei kơdră chĕp kơ̆l Anih vei lăng kon pơlei apŭng pơjao ăn dôm anih jang kơpal kơ apŭng hơlen năng vă tơlĕch jang. Dôm unh hnam oei đei dơ̆ng đei tĕh choh jang xa, ƀơm ưh ‘lơ̆ng gô đei set hơlen, tơgŭm kiơ̆ tơdrong hơgăt.