Lơ̆m pơkăp blŭng xơnăm 2022, Kơdră Kuôk hô̆i Vương Đình Huệ akhan: Kuôk hô̆i, Anih juăt jang kơ Kuôk hô̆i gô kơchăng hloh dơ̆ng, yak hadoi kơjăp hloh hăm Jơnŭm pơgơ̆r teh đak, rim anih jang kơ teh đak vă tom hơlen, tơchơ̆t dôm tơdrong mă po đei xơnong. Pơma yak hadoi hăm jang, đơ̆ng rŏng 1 xơnăm tơlĕch Tơdrong chih akŏm khôi lươ̆t Kuôk hô̆i jăl jang 15, rim anih jang kơ Kuôk hô̆i, Jơnŭm pơgơ̆r teh đak păng rim anih jang đei tơrĕk hlôi keh đang 81/137 xơnong jang chih akŏm khôi lươ̆t, keh đang tơdrong hơlen akŏm, pơjing ‘nao (đei hloh 59% xơnong jang kơ tôm jăl jang), pơm trong tơchơ̆t khôi lươ̆t vă Khul Kơpal teh đak, jơnŭm pơgơ̆r tơring iŏk yua hơbĕch, kơjăp đei jơnei lơ̆m pơkăp tang găn păng tơjră pơrang jĭ, vei xơđơ̆ng tơdrong erih, jơhngơ̆m jăn kon pơlei, tơgŭm anih jang mŭk drăm, bơngai jang găn hloh tơnap tap păng vei xơđơ̆ng pơyua ăn tơpôl; hơtŏk tơdrong hơmet pơ-‘lơ̆ng păng hơtŏk tơ-iung mŭk drăm – tơpôl kơjăp xơđơ̆ng đơ̆ng rŏng pơrang jĭ COVID-19.

Mă kăl, atŭm hăm ƀar ‘măng hop akŏm kiơ̆ pơkăp, ăh blŭng xơnăm, Kuôk hô̆i pơgơ̆r ‘Măng hop akŏm ưh đei pơkăp ‘măng mă mônh vă hơlen, tơchơ̆t lơ tơdrong gĭt kăl, tơrĕk truh tơdrong hơmet pơ-‘lơ̆ng, hơtŏk tơ-iung teh đak lơ̆m “pơkăp pơm jang ‘nao”. Tơdrong pơgơ̆r ‘măng hop akŏm ưh đei pơkăp mă mônh đei lăng jing tơchơ̆t hnưr erih kơ Kuôk hô̆i Việt Nam lơ̆m 76 xơnăm kơ âu, xơkơ̆t đon kơchĕng, kơ ‘nôh chĭn trĭ kơ anih jang kơpal hloh kơ Teh đak adoi nhen adrin tơplih ‘nao, pơm jang kơyươ tơdrong pơyua ăn kon pơlei.

Hop akŏm “ưh đei pơkăp” vă xek tơlang dôm tơdrong kăl. Tơdrong tơpă ăn ƀôh mưh Kuôk hô̆i ưh đei atŭm hăm Jơnŭm pơgơ̆r teh đak đei dôm tơchơ̆t jang tenh kuăng gô pơm hiong trong jang hiôk kơ teh đak. Dôm tơdrong pơma đam ăh ‘Măng hop akŏm ưh đei pơkăp ưh adrô̆ pơm kiơ̆ ƀlep pơkăl tơ̆ anăp ăn xơnăm 2022, xơnăm 2023, mă oei jing kăp gĭt ăn pơđĭ jăl jang păng dôm xơnăm đơ̆ng rŏng. Tôm tơdrong hơmet păng pơgơ̆r ‘măng hop akŏm adoi tơbang ƀôh hơdăh păng tơdrong hơmet đơ̆ng hrôih, đơ̆ng ataih.

Anih hơdăh hloh jing tơdrong mă Kuôk hô̆i hơlen Tơchơ̆t kơsô̆ 43/2022 năr 11/01/2022 găh pơkăp jên hu hăm pơhlom 350.000 tih hlj, hơtŏ hăm hloh 8% GDP vă tơgŭm iŏk jang Tơchơ̆t hơmet pơ-‘lơ̆ng păng hơtŏk tơ-iung mŭk drăm – tơpôl, tơgop hơtŏk GDP xơnăm 2022 đei 8,02%, jơnei lơ lơ̆m hloh 10 xơnăm kơ âu, lơ̆m khul dôm teh đak hơtŏk tơ-iung pran lơ̆m kơpal teh.

Nhen nơ̆r ƀok Tổng Thư kĭ, Kơdră Anih jang Kuôk hô̆i Bùi Văn Cường tơroi: Tơchơ̆t đei tơbang lơ̆m minh hop akŏm kăp gĭt hloh, tam mă lăh đei hăm lơ tơdrong kơ ‘nôh khŏm jang đei đơ̆ng đe kơdră Đảng, Kuôk hô̆i, Khul Kơpal teh đak, rim Anih jang tơm, rim tơring păng bơngai jang tang măt ăn Kuôk hô̆i. Tơchơ̆t noh pơih trong ăn pơkăp jang gĭt kăl, lơ̆m noh dôm tơchơ̆t, hla bar pơm jang hiôk hian hloh, klăh axong hơdăh hloh ăn rim anih jang tơm, rim anih jang, rim tơring mă đơ̆ng xơ̆ tam mă lăh iŏk yua. Kuôk hô̆i oei pơjao ăn Anih juăt jang kơ Kuôk hô̆i tơchơ̆t dôm tơdrong kăp gĭt kơdih, mă kăl pha hăm lươ̆t lơ̆m khei năr Kuôk hô̆i ưh đei hop akŏm vă tom jang hadoi hăm Jơnŭm pơgơ̆r teh đak. Đon bơnôh păng tơdrong jơnei kơ ‘măng hop akŏm ưh đei pơkăp ‘măng mă mônh, Kuôk hô̆i jăl 15 hlôi pơjing jơhngơ̆m pran ‘nao, trong pơm jang ‘nao.

Jên tơmơ̆t đei lơ hloh pơkăp, yak hloh pơtêng hăm pơkăp; jên axong jang, hre hrông đei hơlen kơjăp; GDP xơnăm 2022 tŏk 8,02%, kơjung hloh lơ̆m jăl xơnăm 2011-2022; dôm tơdrong axong jang tih đei vei xơđơ̆ng... Dôm kơtơ̆ng ang kăp gĭt ăn tơlĕch tơchơ̆t ăh jê̆ đĭ xơnăm đei lơ tơdrong hơ iă, jing tơdrong pran kăp gĭt ăn tơchơ̆t jang 5 xơnăm, roi kăp gĭt hloh ăh mă teh đak yak ăh xơnăm dơnơm kơ jăl jang lơ̆m pơm kiơ̆ Tơchơ̆t Hop akŏm ‘măng mă 13 kơ Đảng.

Kŭp yom hloh ƀơ̆t tơdrong tơ-iung đei ƀôh hăm tôm tơdrong jang hăm lơ tơdrong hơdăh noh ăh bơ̆n vih hơlen lăng tơdrong jang kơ xơnăm 2022 tơpôl apŭng plenh teh tơxŭl tơxăl, tam mă lăh ƀôh, tơnap hloh pơtêng hăm mă ăh tơchơ̆t Pơm jang hơtŏk mŭk drăm – tơpôl xơnăm 2022. Hăm lơ tơdrong tơxŭl tơxăl lơ̆m kơpal teh, tơdrong pơngơ̆t huach kư̆ kă tŏk lơ; kơjă đak xăng đak dâu, tơmam pơm jang tŏk jur ưh xơđơ̆ng, pơrăm tih tên truh lơ tơdrong jang; lơ tơdrong tơhlăk đunh khei năr kăl đei xek tơlang; lơ̆m kơplăh noh, pơrang jĭ, ‘mi kial đak hơbông pơrăm hli hlơt, pơrăm tih tên hăm tơdrong pơm jang tĕch pơdro păng tơdrong erih kon pơlei.

Tơroi kơ dôm tơdrong tơrĕk truh ưh kơ ‘lơ̆ng tơ̆ kơpal vă ƀôh hơdăh dôm tơdrong đei jơnei mă bơ̆n jang đei noh tơgăl kơ kŭp bơnê. Tơdrong hơmet pơ-‘lơ̆ng tơnăp găh tơdrong jang mŭk drăm tơbang đei tơdrong pơgơ̆r keh kong đơ̆ng Jơnŭm pơgơ̆r teh đak adoi nhen rim anih jang; tơdrong kơ ‘nôh, khŏm mă jang đei jơnei đơ̆ng tôm anih jang chĭn trĭ, đơ̆ng kon pơlei, khul jang mŭk drăm. Păng mă kăl noh tơdrong yak hadoi, tơgŭm tơtom, đei jơnei đơ̆ng Kuôk hô̆i kiơ̆ tơchơ̆t “kăp gĭt, xơnong kăl, tơdrong kơdih”.

Tơnap tap adoi oei lơ, chŏng mă đon lui hăm tơdrong hop akŏm ƀôh hơdăh, ăh đei bơngai tang măt Kuôk hô̆i tơbang: Apŭng plenh teh tŏk bŏk xơkơ̆t Việt Nam nhen minh um pơtih ang hơdăh kơ anglŏ xơnăm đơ̆ng rŏng kơ COVID-19 păng tơdrong tŏk pran đơ̆ng rŏng kơ pơrang jĭ hơbuh hli. Đon lui tơpă, hăm tơdrong tơguăt tơguăl, pơdrơ̆ng lăp đon đơ̆ng tôm anih jang chĭn trĭ, tơdrong tơgŭm pơm kiơ̆ đơ̆ng tôm kon pơlei păng rim anih jang mŭk drăm, hăm tơdrong pơgơ̆r gơh rơgei, tơnăp đơ̆ng Đảng, tơdrong kơchăng, yak hadoi đơ̆ng Kuôk hô̆i păng tơdrong pơgơ̆r kơjăp đơ̆ng Jơnŭm pơgơ̆r teh đak, tơpă bơ̆n gô jang đei jơnei keh kong dôm tơchơ̆t tŏ xĕt năr lơ̆m xơnăm 2023, adoi nhen tơchơ̆t đunh khei năr ăn anô̆ anăp kơnh.