Teh groi krông krang hăm tŏ pơđang hlơ hlĕng pơyan phang jei ưh kơ kĕ găn ga tơdrong iơ-iơ̆r iơ-iăr “mir pơgar mận ƀô̆ đô̆i-kon pơlei” kơ ‘nhŏng Tếnh Ngọc Thái, tơrintg Chiềng Tương, apŭng Yên Châu (Sơn La). ‘Nau hơnăn krao joăt joe mă ‘nhŏng Thái adoi nhen kon pơlei lơ̆m pơlei tơroi tơbăt găh mir mận đei kang ƀô̆, ƀô̆ đô̆i Kơđông ƀô̆ đô̆i vei lăng sơlam teh đak Chiềng Tương tơgŭm djru:“Sơ̆ ba pơtăm hơƀo, teh krông krang kơna hơƀo plei ưh kơ lơ. Đơ̆ng rŏng ‘nŏh đei kang ƀô̆ Kơđông ƀô̆ đô̆i vei lăng sơlam teh đak Chiềng Tương tơgŭm pơtăm ‘long mận, truh dang ei hlôi phĕ đei 3 ‘măng bơih. Pơtăm mận plei ăl, tĕch măt hloh kơ pơtăm hơƀo, ŭnh hnam đei kon jên vă tơmơ̆t jang lang să, chă pơm hnam. Sơnăm sơ̆, ŭnh hnam phĕ tĕch đei 150 triu hlak jên, sơnăm au ‘long mận plei hơdrơ̆k pơyan jei tĕch đei 20 triu hlak jên bơih”.

Dôm pơyan plei ‘ngam tơ̆ groi đơ̆ng mă Kơđông ƀô̆ đô̆i vei lăng sơlam teh đak Chiềng Tương tơlĕch jang tơgŭm kon pơlei tơplih ‘long pơtăm tơ̆ groi teh krông krang, iŏk đơ̆ng chă pơtăm ‘long mận tơplih mir jang hơƀo hơngrăng hơngrônh. Ưh khan kơ dih chă rơ̆ih păng chă pơtăm, rim ƀô̆ đô̆i hlôi yak hơdoi hăm kon pơlei prăt pơyan phĕ hloi. Đại úy Vì Văn Lun, Kơdră Khul pơrô̆ pơrôp kon pơlei, Kơđông ƀô̆ đô̆i vei lăng sơlam teh đak Chiềng Tương tơroi tơbăt:“Nhôn hlôi tŏk mơ̆t rim ŭnh hnam, năm dăr lăng hloi tơ̆ mir, chă ƀơk ăn dơđăh hơdrĕch ‘long păng pơtho ăn kon pơlei vei lăng năng tông ‘long pơtăm. Ba chơt hơ iă dêh kơ yuơ ƀôh kon pơlei jang sa đei iŏk yua kơjăp, tơdrong erih sa đei sơđơ̆ng dơ̆ng kơjăp”.

Kang ƀô̆, ƀô̆ đô̆i jei jing dôm bơngai ƀă, bơngai ‘nhŏng “dơ̆ng pang” ăn rim jơhnơr hŏk tro 2 tơring sơlam teh đak Chiềng Tương hăm Lóng Phiêng, apŭng Yên Châu (Sơn La).  Ŭnh hnam dơnuh, đei 3 ‘nu hơ-‘lơ̆p, lơ̆m au kon hơdruch kơ ‘nhŏng Vì Văn Tuyền, tơring Lóng Phiêng, apŭng Yên Châu ưh kơ pŭn ai jo jăn, pơm ăn tơdrong erih sa kơ ŭnh hnam đĭ tơnap tap bơih sa roi tơnap tap hloh dơ̆ng. Mưh trong năm tơ̆ hnam trương kơ rim ‘nu kon hơ-‘lơ̆p ưh ngăl mơlôh mơlônh, kon drŏ kăn hơlam kơ ‘nhŏng Vì Văn Tuyền pŭn ai đei kang ƀô̆, ƀô̆ đô̆i Kơđông ƀô̆ đô̆i vei lăng sơlam teh đak Chiềng Tương iŏk rong ‘moi kiơ̆ trong jang “Ba oh năm tơ̆ hnam trương”. ‘Nhŏng Vì Văn Tuyền tơbăt:“Ŭnh hnam tôch tơnap tap, pŭn ai đei kơđông ƀô đô̆i tơgŭm djru kon hơ ‘lơ̆p, tơgŭm ŭnh hnam đei kon jên năm hŏk, jên sŏng sa kơ kon hơ ‘lơ̆p ... vă kon hơ ‘lơ̆p đei năm hŏk, đei sŏng sa, hơbĕn ao hrŭk tơnŏ”.

Hloh 7 sơnăm au, tơdrong jang “Ba oh năm tơ̆ hnam trương đei rim kang ƀô̆, ƀô̆ đôi Kơđông ƀô̆ đô̆i vei lăng sơlam teh đak Chiềng Tương tơlĕch jang. Mĭnh khei, kang ƀô̆, ƀô̆ đô̆i vang chă tơra tŏ sĕt kon jên khei păng chă hơvơn rim bơngai đei jơhngơ̆m đon ‘lơ̆ng vang chă tơgŭm ăn 7 ‘nu hŏk tro hăm kon jên 500.000 hlak jên lơ̆m 1 ‘nu 1 khei, dĭng truh đe oh hŏk đang lăm 12. ‘Ngoăih kơ ‘nŏh, hơnih oei krao hơvơn lơ̆m khul ƀô̆ đô̆i jang kiơ̆ Tơdrong jang Khul Ƀô̆ đô̆i vang ba oh năm tơ̆ hnam trương, tơgŭm djru 14 ‘nu hŏk tro hăm kon jên 1 triu 200.000 hlak jên lơ̆m 1 khei. Yă Phạm Thị Dinh, Kơ iĕng Kơdră vei lăng Hnam trương Jăl kơđeh Lóng Phiêng A, apŭng Yên Châu tơbăt, trong jang au jĭ tôch gĭt kăl, tơgop atŭm hăm hnam trương chă pơrô̆ hơvơn hŏk tro năm hŏk, vei kơjăp măt bơngai hŏk tro năm hŏk; chă hơlêm, pơtrŭt đe hŏk tro tơnap tap tơring sơlam teh đak hơdrin hŏk pơhrăm:“Hnam trương nhôn đei 8 ‘nu hŏk tro sơng iŏk đei tơdrong tơgŭm djru. Đơ̆ng mă đei rim kang ƀô̆, ƀô̆ đô̆i kơđông au dơ̆ng pang tang măt tơgŭm djru, hlôi tơgŭm ăn rim ŭnh hnam tơnap tap ăn kon hơ ‘lơ̆p năm hŏk; rim đe oh jei hơdrin hŏk pơhrăm hloh dơ̆ng, pơnam hŏk pơhrăm hloh dơ̆ng. Lơ ŏh hlôi hŏk gơ̆h, đei tơchơ̆t jing bơ̆ jang keh đang rim sơnăm, đei Kơdră chĕp pơgơ̆r hnam trương pôk ăn Hla bơar hôn bơnê”.

"Kơđông ‘nŏh hnam, sơlam teh đak ‘nŏh pơlei pơla, kon pơlei rim hơdrung ‘nŏh ‘nhŏng oh pôm mĕ ƀă"-Nơ̆r ‘nŏh jing jơhngơ̆m pran tơgŭm ăn khul kang ƀô̆, ƀô̆ đô̆i Kơđông ƀô̆ đô̆i vei lăng sơlam teh đak Chiềng Tương  kơrŭn đĭ jơhngơ̆m yak hloh tơnap tap vă jang keh đang ‘lơ̆ng tơdrong bơ̆ jang, vei lăng năng tông trong sơlam teh đak, jrăng sơlam teh đak; adoi, ling lang tơklep kơjăp, tơjê̆ kon pơlei, hlôh vao kon pơlei, vă tơgŭm djru kon pơlei.

Kiơ̆ đơ̆ng thiếu tá Nguyễn Công Lưu, Chinh trĭ viên Kơđông ƀô̆ đô̆i vei lăng sơlam teh đak Chiềng Tương, mĭnh tơdrong jang ‘lơ̆ng hơ iă đei tơlĕch jang jei tơklep kơjăp hăm tơdrong jang kiơ̆ Nơ̆r athei jang kiơ̆ 05 đơ̆ng Hơnih tơm Chinh trĭ găh “Atŏk kơtang hŏk pơhrăm păng pơm kiơ̆ jơhngơ̆m đon ‘lơ̆ng păng trong bơ̆ jang hơgei kơ Ƀok Hô”:“Khul kơdră chĕp pơgơ̆r Đảng, Khul kơdră chĕp pơgơ̆r kơđông hlôi tơlĕch jang dăr lăng hơlen dôm tơdrong lơ̆m tơring, tơ iung pơjing rim trong hŏk pơhrăm păng jang kiơ̆ Ƀok Hô trŏ ƀlep, iŏk đei jơnei lơ̆m 2 tơring sơlam teh đak Lóng Phiêng, Chiềng Tương. Nhôn tơ iung pơjing trong jang tơklep hăm tơdrong bơ̆ jang rim năr, rim giĕng, hơdrin jang keh đang ‘lơ̆ng rim tơdrong jang vei lăng sơđơ̆ng tơring sơlam teh đak lơ̆m tơring”.

Dôm trong jang ‘lơ̆ng hơ iă, gĭt kăl hlôi pơjing đei jơhngơ̆m đon lui kiơ kơjăp, ‘mêm kơ eng kơtang đơ̆ng kon pơlei rim hơdrung tơring sơlam teh đak hăm dôm kang ƀô̆, ƀô̆ đô̆i; ‘nau jing tơdrong hơlêm, pơtrŭt ƀô̆ đô̆i vei lăng sơlam teh đak bơ̆ jang keh đang tơdrong jang vei lăng tơdrong pơm tơm kơdih, tơdrong sơđơ̆ng tơring sơlam teh đak kơ Teh đak, tơgop tơ iung pơjing tơring sơlam teh đak pran kơjăp iăp kơtang, sơđơ̆ng dơ̆ng kơjăp tôm toong.