Ŭnh hnam yă Võ Thị Ngọc Nhị jĭ 1 lơ̆m dôm ŭnh hnam arih sa ‘lơ̆ng kơ xăh An Bình ưh kơ đei teh dong băl lơ̆m ŭnh hnam, ƀok yă mĕ ƀă arih ‘lơ̆ng, kon sâu băt chu yom. Yă Nhị đei tơdrong tơgŭm tơnăp đơ̆ng klo sư kơna đei jơ năr vang jang tơdrong jang drŏ kăn tơ̆ tơring, tơgop kŭm hăm drŏ kăn xăh An Bình vei lăng ăn mŏ oh drŏ kăn lơ̆m xăh.

Yă Võ Thị Ngọc Nhị tơbăt: “Hnam nhôn ‘noh klo pơma hơ kăn mơ̆ng, hơkăn pơma klo mơ̆ng, mĕ ƀă pơma kon hơ ‘lơ̆p mơ̆ng, kon hơ lăp băt ‘mêm kơ mĕ ƀă. Mưh lĕch tơ̆ ‘ngoăih đe kon kŭm ƀôh dôm ŭnh hnam nai ưh kơ đei hiôk hian nhen ŭnh hnam kơdih. Ŭnh hnam bơ̆n hiôk hian ‘noh rông ƀôt kŭm pơ ư kơ bơ̆n, kŭm chhôk ‘nă hăm đe. Mưh lai yơ ĭnh tơ̆ hnam ‘noh tơdrong jang ĭnh jang đĭ. Oei mưh lai yơ ĭnh athei năm hôp ‘noh tơ roi hăm klo ĭnh ‘noh sư kŭm tơ gĕch brŏk bơngơ̆t por ‘nhot ăn kơ đe kon.”

Lei lăi ‘noh jĭ ŭnh hnam yă Trần Thị Sạn oei tơ̆ xăh An Bình. Ŭnh hnam sư arih sa hăm tơdrong jang pơtăm ôi. Sư vang jang lơ̆m grŭp drŏ kăn ưh kơ đei teh dong băl lơ̆m ŭnh hnam iŏk đơ̆ng pơjing truh dang ei. Yă Sạn ‘ngoăih kơ tơdrong pơvei hiôk lơ̆m ŭnh hnam oei pơtho kon sâu chu yom hăm ƀok yă, mĕ ƀă, đei tơdrong pơ vei ‘lơ̆ng hăm rông ƀôt, hơdai hăm tơroi tơbăt, krao hơvơn đe mŏ oh lơ̆m khŭl vang jang kiơ̆ vă pơ jing ŭnh hnam ưh kơ đei teh dong băl, arih hiôk chơt:

“Lơ̆m ŭnh hnam nhôn, ĭnh athei pơtho kon hơ ‘lơ̆p, klo ĭnh ưh kơ gơh teh dong băl lơ̆m ŭnh hnam ‘noh mưh lĕch tơ̆ ‘ngoăih bơ̆jang ĭnh mă krao hơvơn mŏ oh lơ̆m khŭl drŏ kăn. Ĭnh kŭm tơroi tơbăt ưh kơ teh dong lơ̆m ŭnh hnam. Mŏ oh drŏ kăn athei tơklep hơdai păng ‘nĕ kơ lê̆ klo teh dong.”

Tơdrong jang “Grŭp drŏ kăn ưh kơ đei teh dong lơ̆m ŭnh hnam” tơ̆ tổ 8, ấp Thanh Bình, xăh An Bình, apŭng Châu Thành đei 21 ‘nu vang jang. Lơ̆m 8 sơnăm âu, tơdrong jang tôch kơ đei yua. Blŭng a lơ̆m grŭp đei 3 ‘nu đei ƀôh teh dong lơ̆m ŭnh hnam mă lei mŏ oh oei kơ dơ̆, mơ lâu ưh kơ pơ̆n tơroi ăn kơ đe kơ na chĭu pŭ hơdrô̆. Đơ̆ng rŏng tơdrong jang đei pơjing, kiơ̆ đơ̆ng hŏk pơhrăm hơnơ̆ng mŏ oh hlôi hlôh vao ‘lơ̆ng hloh lơ̆m tơdrong hơmet pơ ‘lơ̆ng dôm tơdrong đei ƀôh teh dong lơ̆m ŭnh hnam nhen: vang chă tơroi, pơtho akhan kơ klo ưh kơ gơh yua tơdrong glăi teh dong, gơnang kơ khôi luơ̆t tơ hli. Truh dang ei, grŭp tơdrong jang “Grŭp drŏ kăn ưh kơ đei toh dong lơ̆m ŭnh hnam” ưh pă đei ƀôh bơngai đei teh dong lơ̆m ŭnh hnam. Păng lơ̆m dôm sơnăm tơ jê̆ âu, tơdrong teh dong lơ̆m ŭnh hnam lơ̆m xăh hlôi tơ jur, ưh kơ đei ƀôh dôm ‘măng teh dong kơtang bơ̆ih. Yă Huỳnh Thanh Tuyền, Kơdră Khŭl vei lăng drŏ kăn xăh An Bình, apŭng Châu Thành, dêh char Tây Ninh tơbăt, iŏk đơ̆ng pơjing truh dang ei, grŭp drŏ kăn ưh kơ đei teh dong lơ̆m ŭnh hnam đei tơdrong bơngơ̆t truh tơgŭm ‘lơ̆ng đơ̆ng dôm kơdră tơring kơna tơdrong đei ƀôh teh dong lơ̆m ŭnh hnam hlôi đei hơmet ‘lơ̆ng, ưh kơ đei dôm tơdrong teh dong lơ̆m ŭnh hnam kơ tang, tơgop ăn tơdrong hơtŏk tơiung mŭk drăm tơpôl, hơtŏk ‘lơ̆ng tơdrong arih sa tơmam drăm, păng jơhngơ̆m đon lơ̆m ŭnh hnam:

“Iŏk đơ̆ng pơjing sơnăm 2015 truh dang ei, grŭp drŏ kăn ưh k đei teh dong lơ̆m ŭnh hnam kơ xăh đe mŏ đei hơtŏk ‘lơ̆ng đon hlôh vao păng tơdrong băt pơma sa ‘lơ̆ng hơiă lơ̆m ŭnh hnam đơ̆ng mĕ ƀă păng kon hơ ‘lơ̆p, ƀok yă, mĕ ƀă. Kiơ̆ đơ̆ng noh, mŏ oh băt tơmơ̆t yua lơ̆m yan âu, đei trong pơma sa ‘lơ̆ng hơiă hơgei ƀiơ̆, pơma dơnuh băt kơ pal, băt hơla. Hơdai hăm ‘noh, grŭp tơdrong jang ưh kơ đei teh dong lơ̆m ŭnh hnam gô bơ̆jang kiơ̆ dơ̆ng lơ tơdrong tơm păng trong jang ‘nao nhen krao hơvơn mŏ oh lơ̆m grŭp vang jang tơgop jên song băl vă  tơgum ăn bơngai jang lơ̆m khŭl đei tơdrong hiôk vei rong, tĕch mơdro iĕ hăm kơ sô̆ jên đơ̆ng  3 triệu truh 5 triệu hlak jên.”

Teh dong băl lơ̆m ŭnh hnam ‘noh jĭ tơdrong ưh hơiă lơ̆m tơpôl, pơm blĕk kơ đon ăn kon bơngai, pơm tơlĕch lơ tơdrong răm ăn kon bơngai, mă loi ‘noh jĭ hăm drŏ kăn, hơioh. Tơdrong teh dong băl lơ̆m ŭnh hnam tơ̆ 1,2 tơring tam mă găn đei, păng tam mă đei ƀôh tơplih ‘lơ̆ng, mă loi ‘noh jĭ hăm kon pơlei kon kông. Tơdrong ‘nâu jĭ tơdrong bơngơ̆t truh đơ̆ng đĭ đăng tơpôl. Kơlih thoi noh, tơdrong jang “Grŭp drŏ kăn ưh kơ đei teh dong băl lơ̆m ŭnh hnam” đơ̆ng Khŭl drŏ kăn xăh An Bình, apŭng Châu Thành, dêh char Tây Ninh đei pơjing, vă tơgop pơjing tơdrong oei sa ‘lơ̆ng hơiă, ƀrư̆ ƀrư̆ pơjing ŭnh hnam hiôk chơt.