Bơngai chih hla ar tơroi Lê Quốc Minh, Kơdră jang lơ̆m Trung ương Đảng, Kơdră vei lăng Khul chih hla ar tơroi Việt Nam, Phŏ Kơdră chĕp kơ̆l Ban Tuyên giáo Trung ương, Kơdră vei lăng kơsơ̆p Hla ar tơroi Nhân dân ăn tơbăt: Kiơ̆ đơ̆ng rim ‘măng pơgơ̆r thi chih hla ar tơroi lơ̆m teh đak, tơdrong hơiă hlŏh jĭ tơdrong chih hla ar tơroi Trung ương păng tơring roi vă dang ăi băl. Lơ yaih A jei kơ  Hla ar tơroi tơ̆ tơring dăh mă anih chih hla ar tơroi iĕ. Vă rim ƀai chih vang thi chih ‘lơ̆ng hơiă ngăl. Mĭnh tơdrong hơiă dơ̆ng ‘nŏh anih chih hla ar tơroi tơ̆ tơring dang ei tơmât jên ăn Ƀăo điên tư roi lăp ‘lơ̆ng. Dôm Anih radio pơdăh um rup tơ̆ tơring kŭm gơ̆h chih, pơm lơ ƀai tôch ‘lơ̆ng.

Găh tơdrong pơgơ̆r Hơpăh tơmam ăn Hla ar chih tơroi lơ̆m teh đak ‘măng mă 18, Bơngai chih hla ar tơroi Lê Quốc Minh akhan: “Sơnăm ‘nâu Lêh hơpăh tơmam ăn Hla ar chih tơroi kơ teh đak đei pơgơ̆r tôch gĭt kăl, kiơ̆ trong jang kơdih. Nhôn iŏk bơngai đei yaih pơm tơm. Bơngai tŏk iŏk yaih ƀôh čhôk jơhngâm păng hưch hanh hăm tơmam mă đe sư iŏk đei. Jô̆ hloi bơngai năng kŭm ƀôh tôch hưch hanh yoa dôm tơdrong jơnei mă bôl boăl kơdih jang đei. Trong pơgơ̆r ‘nao gô tơiung đei jơhngâm ‘nă halăn dôm bơngai tam mă iŏk đei yaih păng pôk hơtŏk dôm bơngai iŏk đei yaih vă bơ̆n ƀôh Tơdrong ‘lơ̆ng đơ̆ng Hla ar tơroi kơ teh đak, tơgăl hăm tơmam hơpăh gĭt kăl hlŏh ăn khul chih hla ar tơroi kơ teh đak Việt Nam”.

Kiơ̆ Bơngai chih hla ar tơroi Lê Quốc Minh, Kơdră vei lăng Khul chih hla ar tơroi Việt Nam, hla ar tơroi chăl hle hrei ‘nâu athei đei lơ tơdrong tơplih ‘nao păng gơ̆h hơgei. Hơpơi ‘mĕh dôm anih chih hla ar tơroi bơ̆ jang đei yoa ‘lơ̆ng tơdrong tơplih hăm kơmăy sô̆, tơplih ‘nao gơ̆h hơgei, đei trong chih roi hơiă păng mă loi jĭ athei năng kăl truh tơdrong ‘lơ̆ng vă gơ̆t jơ̆ng bơngai đŏk lăng, sơng bơngai đŏk lăng truh, vei kơjăp hơnăp jang năm hơdrol lơ̆m tơdrong pơtruh nơ̆r roi tơbăt, pơhlôh đon ăn tơpôl. Khei ‘năr âu ki, mă đơ̆ng tơƀâp lơ pơmat tat, pơlong nol, mă lei Khul hơnơ̆ng jang đang ‘lơ̆ng dôm tơdrong jang đei tơlĕch păng đei lơ tơdrong ‘lơ̆ng hơiă.

Đơ̆ng noh vang tơgop jang đang ‘lơ̆ng tơdrong jang chinh trĭ đơ̆ng Khul chih hla ar tơroi Việt Nam khei ‘năr âu ki: “Đơ̆ng blŭng jăl jang truh dang ei, Đảng khul, Khul kơdră chĕp kơ̆l păng đe Kơdră pơgơ̆r Khul mât 1 jơhngâm, drơ̆ng pôm nơ̆r lơ̆m tơdrong chĕp kơ̆l pơgơ̆r rim khul grŭp, tơdrong jang đơ̆ng rim khul grŭp lơ̆m teh đak đei lơ tơdrong hơiă, tơplih ‘lơ̆ng; tơtom băt hơdăh tơdrong 'mĕh vă đơ̆ng bơngai chih hla ar tơroi, akŏm jơhngâm sek tơlang 'lơ̆ng đon tơchĕng, mât mĭnh jơhngâm.”

Khul chih hla ar tơroi Việt Nam dang ei đei hlŏh 25.000 ‘nu bơngai oei bơ̆ jang tơ̆ 307 khul grŭp. Đơ̆ng blŭng jăl jang truh dang ei, Anih pơtho pơhrăm ming tơdrong chih hla ar tơroi đơ̆ng Khul pơgơ̆r đei hlŏh 256 lăm pơtho pơhrăm ăn vă jê̆ 9.000 ‘nu bơngai chih hla ar tơroi lơ̆m teh đak. Atŭm hăm ‘nŏh ăn tơbăt, dôm khul grŭp đơ̆ng trung ương truh tơ̆ tơring pơjing đei hlŏh 250 Khul sek tơlang tơdrong glăi găh jơhngâm đon bơngai chih hla ar tơroi Việt Nam păng mât bơ̆ jang roi đunh roi ‘lơ̆ng, sek tơlang tơtom, tơpăt ‘lơ̆ng 1,2 tơdrong pơm glăi luơ̆t păng jơhngâm đon bơngai chih hla ar tơroi.

‘Nao âu, tơ̆ jơ bơ̆ jang hăm Khul chih hla ar tơroi Việt Nam, Kơdră chĕp kơ̆l Ban Tuyên giáo Trung ương Nguyễn Trọng Nghĩa pơma hơdăh: tơ̆ hơnăp kơnh, Đảng Khul bơngai chih hla ar tơroi Việt Nam athei hơnơ̆ng năng kăl truh tơdrong pơtho pơhrăm chinh trĭ, đon tơchĕng vă bơngai chih hla ar tơroi băt hơdăh chih hla ar tơroi ‘nŏh jĭ jang kăch mang, bơngai chih hla ar tơroi jĭ linh năm hơdrol lơ̆m tơdrong vei lăng đon tơchĕng, jŏh ayo kơ dŏ xoang đơ̆ng Đảng; hơnơ̆ng tưk tơiung ‘lơ̆ng hơnăp jang, tơdrong jang, bơ̆ jang đei yoa dôm tơdrong jang chinh trĭ đei Đảng, Teh đak păng kon pơlei lui, pơjao ăn.

“Khul bơngai chih hla ar tơroi Việt Nam athei jing anih lui hơđơ̆ng, dơ̆ng kơjăp găh tơdrong jang vă dôm anih chih hla ar tơroi hơnơ̆ng adrin, chă hơlen, tơplih ‘nao, tơpă jing kênh tơroi trŏ ƀlep, tơtom, ‘moi kiơ̆ rim tơdrong đei tơ̆ yăn âu kơ teh đak, rim tơdrong đei lơ̆m tơdrong arih xa, đơ̆ng noh bơ̆ jang đei hơnăp jang tơƀôh trong chong glung, pơjing tơdrong drơ̆ng pôm nơ̆r lơ̆m tơpôl, vei kơjăp hơnăp jang jĭ tơdrong kơtơ̆ng ang tơm trŏ ƀlep, tơgăl hăm đon lui đơ̆ng kon pơlei. Rim ƀai chih jĭ tơƀôh hơdăh tơdrong juăt ‘lơ̆ng, pơtho tơƀôh ăn tơpôl. Rim bơngai chih hla ar tơroi athei jing 1 ‘nu linh jang găh đon tơchĕng hăm "măt hơdăh, jơhngâm đon tơpăt ‘lơ̆ng, chih gơ̆h hơgei", hơbĕch hơbal lơ̆m tơdrong jang, pơ̆n tơjră plơ̆ dôm tơdrong glăi, vei kơjăp kơdih kâu tơ̆ hơnăp rim tơdrong pơhlŭ...”

Ƀlep ƀât tơbăt 99 sơnăm Năr Hla ar tơroi kăch mang Việt Nam, Kơdră chĕp kơ̆l Ban Tuyên giáo Trung ương Nguyễn Trọng Nghĩa hmach thơthou ăn Khul chih Hla ar tơroi Việt Nam roi đunh roi tơgăl hăm Khul jang chinh trĭ - tơpôl – tơdrong jang gĭt kăl kơ teh đak, jĭ “bơbŭng hnam atŭm” pơchôl băl, mât mĭnh ƀơ̆r đon đơ̆ng rim bơngai chih hla ar tơroi lơ̆m teh đak.