6 khei blŭng sơnăm 2024, Khul chư pơglang ƀrê rim dêh char hlôi chă hơvơn đei hloh 360 ti hlak jên, pôk tơmam drăm ăn hloh 1 triu ‘nu bơngai dơnuh, vă jê̆ dơnuh, bơngai tơnap tap, bơngai jo jăn đơ̆ng ƀrơ̆m phao pơgang pơm ăn, ŭnh hnam đei iŏk yua ăn teh đak, ŭnh hnam răm tŏ ‘mi kial, pơrang jĭ pơrăm.

Bơ̆ jang tang găn tŏ ‘mi kial pơrăm hlôi tơgŭm ăn hloh 25.000 ‘nu bơngai hăm akŏp kon jên hloh 7 ti 500 triu hlak jên. Tơ̆ hop akŏm, yă Bùi Thị Hòa, Kơdră chĕp pơgơ̆r Khul chư pơgang ƀrê Viêt Nam hôn bơnê dôm tơdrong hơdrin, dôm tơdrong bơ̆ jang ‘lơ̆ng đơ̆ng rim hơnih Khul pơting dih băl kơsô̆ 6. Adoi athei Khul chư pơgang ƀrê rim dêh char hơnơ̆ng tơplih ‘nao trong jang, rim ‘măng chă pơrô̆ hơvơn ‘mêm mơnat, tơgum djru dôm bơngai tơnap tap hơdrin lơ̆m hơrih sa, jang sa đei iŏk yua kơjăp.