Mă hơdăh, Anih vei lăng kon pơlei dêh char Kon Tum klăih song hloh 1.145 tấn phe tơgŭm hloh 15.300 ‘nu hŏk tro hăm kơsô̆ tơgŭm 15kĭ phe 1 khei păng khei ‘năr tơgŭm ‘noh 5 khei lơ̆m hŏk ki I, sơnăm 2024-2025.

Tơ̆ tơchơ̆t klăih song phe tơgŭm ăn hŏk tro hŏk ki I, sơnăm hŏk 2024-2025, Anih vei lăng kon pơlei dêh char Kon Tum pơjao kơ Anih vei lăng pơtho pơhrăm pơgơ̆r, jang hơdai hăm Anih mong răk Teh đak tơring găh Tu Tây Nguyên păng 10 apŭng, pơlei tơm lơ̆m dêh char pơgơ̆r sơng iŏk vă chă asong, iŏk yua phe ăn kơ hŏk tro vei sơđơ̆ng ƀlep bơngai, kơsô̆ păng ‘lơ̆ng. Tơdrong asong phe tơgŭm ăn kơ hŏk tro athei jang đang păng tơroi tơbăt pơtôch jang kiơ̆ ăn Anih vei lăng kon pơlei dêh char Kon Tum hơdrol kơ ‘năr 20/10/2024.