VOV4.Bahnar - Akŏm đĭ đăng kơ sô̆ jên hơ păh tơ mam têt păng phe, vei lăng tơ drong arih xa ăn dôm bơ ngai đei kŏng, bơ ngai jang ƀât Tết Nguyên đán Nhâm Dần ‘nŏh hlŏh 9.280 ti hlak jên ăn hlŏh 57,81 triu ‘nu bơ ngai. Ƀât Tết Nguyên đán Nhâm Dần, rim tơ ring pơ truh tơ mam têt đơ̆ng Kơ dră tĕh đak tôch tơ tom ăn hlŏh 1,56 triu ‘nu bơ ngai đei kŏng hăm kăch mang.

‘Ngoăih kơ tơ mam đơ̆ng dôm anih jang kơ Trung ương, dôm tơ ring kơ chăng tơ lĕch jên mong kơ dih păng jên đơ̆ng tơ ra tơ gop vă hơ păh tơ mam ăn dôm bơ ngai đei kŏng. Tơ drong jang tơ gŭm, hơ met têt ăn bơ ngai tơ nuh, bơ ngai đei tơ pôl tơ gŭm păng bơ ngai jang mơ mat tat ƀât Tết Nguyên đán đei dôm tơ ring tôch tơ rĕk. Dôm tơ ring oei pơ gơ̆r năm ngôi, hơ păh tơ mam ăn dôm khul linh bơ̆ jang tơ̆ tơ ring sơ lam ƀât têt, dôm bơ ngai jĭ ăl, bơ ngai oei hơ met jĭ COVID-19.

Dơ̆ng: Tơ blơ̆