VOV4.Bahnar - Hlŏh 94.000 ‘nu bơngai lơ̆m Khŭl Bơngai măt tol lơ̆m tĕh đak đei tơgŭm djru ăn asong tŏk iŏk jên tơmơ̆t jang sa, tĕch mơdro. ‘Nau tơdrong kơtơ̆ng ang đei tơroi tơbăt tơ̆ Hop akŏm pơtôch 30 sơnăm Tơdrong jang tŏk iŏk jên đơ̆ng Hơnĭh mong jên tĕh đak găh tơdrong jang jăl jang 1992-2022, pơgơ̆r tơ̆ pơlei tơm Đà Nẵng pơgê năr 7/9.

Khei năr au ki, đơ̆ng Hơnĭh mong jên tĕh đak xek tơlang tơdrong jang păng Hơnĭh mong jên Tơgum djru tơpôl, rim Khŭl bơngai măt tol Việt Nam hlôi hơlen hơdăh, tơgŭm ăn hlŏh 94.000 ‘nu bơngai măt tol tŏk iŏk vă jê̆ 52 ti hlak jên vă jang sa, rong kon tơrong, tĕch mơdro tơmam drăm ... Ƀok Phạm Viết Thu, Kơdră chĕp pơgơ̆r Trung ương Khŭl bơngai măt tol Việt Nam tơbăt: Lơ bơngai măt tol tŏk iŏk jên tơmơ̆t jang sa iŏk yua kơ jăp, roi năr roi đei pơdrŏng, ŭnh hnam dơnŭh tơjur kơtang. ‘Ngoăih tơgŭm ăn kon jên, Khŭl bơngai măt tol Việt Nam iung jang hơdoi hăm Dơnŏ anĭh Măt trân Tổ quốc tơ iung pơjing ming man ‘nao păng ming hơmet vă jê̆ 2.000 pơbŭng hnam ‘mêm mơnat, tơgŭm ăn bơngai măt tol đei hnam oei sơđơ̆ng.

Tơblơ̆ nơ̆r: Amazưt