VOV4.Bahnar - Đơ̆ng rŏng pơ tôch hop akŏm ưh ê ‘măng mă 1, Kơ dră Kuô̆k hô̆i Vương Đình Huệ athei, Khul kơ dră tĕh đak, Thủ tướng tĕh đak păng dôm anih jang đei ƀơm truh hăt hot tơ lĕch jang hrĕnh, tơ tom dôm tơ drong tơ chơ̆t đei drơ̆ng nơ̆r, hơ met pơ ‘lơ̆ng tơ drong “ƀât blŭng ngơ ngơ̆i, hơ tuch sơ năm hăt hot”.

Hăm đon jang tơ năp hăm tĕh đak, kon pơ lei păng bơ ngai tăh hla, ‘măng mă hop akŏm ưh kơ ê ‘măng mă 1, Kuô̆k hô̆i jăl 15 hlôi drơ̆ng nơ̆r ăn 1 kơ luơ̆t păng 4 tơ drong tơ chơ̆t hăm tơ drong drơ̆ng nơ̆r tôch kơ jung. Tơ drong tơ chơ̆t găh jên jang vă tơ gŭm tơ lĕch jang tơ drong jang tơ iung ming păng jang tŏk mŭk drăm, tơ pôl ‘nŏh jĭ 1 lơ̆m dôm tơ drong tơm lơ̆m hop akŏm âu. Kơ dră Kuô̆k hô̆i Vương Đình Huệ akhan, vă tơ lĕch jang tơ tom, đei yoa dôm trong jang găh jên hu, Kuô̆k hô̆i athei Khul kơ dră tĕh đak, dôm anih jang kơ pal, ‘moi kiơ̆ trong jang đơ̆ng Đảng, dôm tơ drong tơ chơ̆t đơ̆ng Kuô̆k hô̆i, vei kơ jăp tơ drong jang mŭk drăm lơ̆m tĕh đak, hơ tŏk tơ drong đei yoa, kơ sư̆k pơ jei, kơ chăng kơ dih, kơ sư̆k kĕ chĭu, druh kiơ̆ tơ drong jang mŭk drăm, pơm lăp hăm tơ drong ‘mĕh vă kơ plăh dang ei păng ning mônh kơnh, hơ met kơ jăp dôm trong jang 5 sơ năm đơ̆ng 2021-2025 hlôi đei Kuô̆k hô̆i drơ̆ng nơ̆r păng Tơ drong jang tơm găh tang găn jĭ COVID-19.

Kơ dră Kuô̆k hô̆i Vương Đình Huệ

Kơ dră Kuô̆k hô̆i Vương Đình Huệ pơ ma: “Tơ drong tơ chơ̆t đơ̆ng Kuô̆k hô̆i oei pơ jao ăn Khul kơ dră tĕh đak, dôm anih tơm, anih jang kơ trung ương păng tơ ring lăng kiơ̆ hơ năp jang kơ dih vă tơ lĕch jang tơ drong tơ chơ̆t âu; hơ tŏk hơ năp jang đơ̆ng bơ ngai chĕp kơ̆l, pơ gơ̆r bơ̆ jang trŏ hăm đon tơ chĕng, tơ drong vă jang, rơ đăh rơ đong, đei yoa ‘lơ̆ng, năng kăl tơ drong hơ len năng, pơ tho tơ ƀôh đơ̆ng blŭng vă huei đei tơ drong glăi, xa pơ gâm, pơ jĭp, pơ huach kư̆ kă păng sek tơ lang tơ păt dôm tơ drong glăi, mă loi jĭ ƀât mă tơ lĕch lơ jên jang lơ̆m khei ‘năr tŏ sĕt đĕch”

Tơ drong tơ chơ̆t đơ̆ng Hop akŏm ưh ê 'măng mă 1, Kuô̆k hô̆i jăl XV hlôi chih hơ dăh Nơ̆r tơ chơ̆t đơ̆ng Anih tơm Chinh trĭ găh tơ dỏng jang tang găn jĭ COVID-19 đơ̆ng 2022-2023 păng Tơ drong jang tơ iung ming, jang tŏk mŭk drăm tơ pôl. Hăm tơ drong tơ chơ̆t âu, Kơ dră Kuô̆k hô̆i Vương Đình Huệ ăn tơ băt, Kuô̆k hô̆i athei Khul kơ dră tĕh đak, Thủ tướng tĕh đak pơ tho ăn dôm anih tơm, anih jang kơ pal, tơ ring tơ rang jăh tơ lĕch jang hrĕnh, pran kơ tang păng hơ tŏk tơ drong ƀet văc xin păng ƀet pơ klăm dơ̆ng ăn bơ ngai 'lŏ, tơ chĕng hơ len păng đei trong jang mă lăp, khoa hŏk vă ƀet văc xin ăn bơ ngai hơ la kơ 18 sơ năm, mă loi jĭ đe hơ iŏh.

Kơ dră Kuô̆k hô̆i Vương Đình Huệ athei: “Năng kăl nơ̆r pơ tho, dăr lăng, hơ met kơ jăp ki luơ̆t, hơ tŏk đon bơ̆ jang, chih hơ dăh hơ năp jang ăn rim bơ ngai, mă loi jĭ hơ năp jang đơ̆ng bơ ngai chĕp kơ̆l, ƀơm truh tơ drong jang tơ iung ming păng jang tŏk mŭk drăm, tơ pôl păng tang găn jĭ, tơ tom chă ƀôh, sek tơ lang tơ păt dôm tơ drong yoch xa pơ jĭp, pơ huach kư̆ kă, tơ drong glăi; akŏm khul jang, bơ̆ jang tôch ai, pơih xă tơ drong dăr hơ len pơm hơ dăh hơ năp jang, tơ chĕng hơ len, pơ jao, ƀơk hla ar phep, pơ ma nuh găh kơ jă, tơ roi tơ băt, pôk pơ ư, pơ gơ̆r jang xa, jang đei tơ mam ‘lơ̆ng păng hơ len năng tơ drong tĕch mơ dro Kit set hơ len jĭ COVID-19 đơ̆ng Công ty Việt Á; hơ năp jang đơ̆ng khul grŭp, rim bơngai đei ƀơm truh vă pơm hơ dăh tơ drong glăi”.

Jơ bơ̆ jang lơ̆m hop akŏm

Vă dôm tơ drong tơ chơ̆t đơ̆ng Hop akŏm ưh ê ‘măng mă 1, Kuô̆k hô̆i jăl XV mât lơ̆m tơ drong arih xa, Kơ dră Kuô̆k hô̆i Vương Đình Huệ athei, Khul kơ dră tĕh đak, Thủ tướng tĕh đak, Anih chĕp kơ̆l pơ gơ̆r Kuô̆k hô̆i, Anih vei lăng hơ drĕch kon kông, dôm anih jang kơ Kuô̆k hô̆i, dôm anih jang kơ pal kơ tĕh đak, dôm Khul tang măt Kuô̆k hô̆i, dôm bơngai tang măt Kuô̆k hô̆i jăh pơ gơ̆r bơ̆ jang hrĕnh, tơ tom dôm kơ luơ̆t, Tơ drong tơ chơ̆t 'nao đei drơ̆ng nơ̆r jăh hơ tŏk tơ drong đei yoa păng mât lơ̆m tơ drong arih xa, hơ met pơ 'lơ̆ng tơ drong “Ƀât blŭng sơ năm ngơ ngơ̆i, hơ tuch sơ năm hăt hot”.

Kơ dră Kuô̆k hô̆i Vương Đình Huệ akhan, hăm tơ drong pơ gơ̆r đang ‘lơ̆ng Hop akŏm ưh ê ‘măng mă 1, bơ̆n đei ƀai hŏk kăp gĭt vă dôm hop akŏm “ưh ê” gơ̆h bơ̆ jang jing “thoi hmă” đơ̆ng Kuô̆k hô̆i vă pơm lăp tôch tơ tom hăm dôm tơ drong kăl tơ̆ yăn âu. Đon jang tơ năp păng tơ drong jang đei đơ̆ng Hop akŏm ưh ê ‘măng mă 1, Kuô̆k hô̆i jăl XV hlôi pơ jing đei jơ hngâm pran ‘nao, tơ drong ‘lơ̆ng ‘nao, kŭm hăm dôm tơ drong tơ gŭm ‘nao đei tơ lĕch, tơ drong pơ gơ̆r jang mă pran đơ̆ng Khul kơ dră tĕh đak, tơ drong vang bơ̆ jang đơ̆ng dôm anih jang kơ pal păng anih jang chinh trĭ, tơ drong tơ gŭm, 1 jơ hngâm đon đơ̆ng kon pơ lei, khul tĕch mơ dro, bơ̆n lui gô jang đei tơ drong jang atŏk tơ iung mŭk drăm, tơ pôl sơ năm 2022 păng đĭ jăl jang đơ̆ng 2021-2025, tĕh đak gô hơ nơ̆ng jang tŏk pran kơ jăp, tơ drong arih xa kơ kon pơ lei gô roi tŏk, đon lui đơ̆ng kon pơ lei roi kơ jăp hlŏh dơ̆ng.

Dơ̆ng: Tơ blơ̆