VOV4.Bahnar - Giĕng âu ki, ƀlep ƀât năm bơ̆ jang mă blŭng kơ sơ năm ‘nao Nhâm Dần, Kơ dră Kuô̆k hô̆i Vương Đình Huệ păng dôm kơ dră chĕp kơ̆l Kuô̆k hô̆i tơ ƀâp, pơ jao tơ drong jang ăn dôm bơ ngai tang măt jang kơ tă lơ̆m Kuô̆k hô̆i, kăn ƀô̆, bơ ngai jang tơ̆ Anih jang kơ Kuô̆k hô̆i. Pơ ma lơ̆m jơ tơ ƀâp, Kơ dră Kuô̆k hô̆i Vương Đình Huệ akhan, hơ pơi ‘mĕh pran kơ jăp, hơ pơi ‘mĕh jang tŏk pran ‘lơ̆ng, tơ iung đon adrin đơ̆ng hơ drĕch hơ drung, gô chang lơ̆m tơ drong tŏk pran ‘lơ̆ng, lơ̆m nŏh đei jang tŏk găh trong pơ gơ̆r. 

Tơ̆ jơ tơ ƀâp, Kơ dră Kuô̆k hô̆i Vương Đình Huệ roi tơ băt ‘măng năm hmach thơ thou Tết Nguyên đán đơ̆ng Kơ dră Kuô̆k hô̆i kŭm hăm khul jang tơ̆ 6 dêh char găh Pơ băh păng tơ drong jang đơ̆ng dôm Phŏ kơ dră Kuô̆k hô̆i. Akhan, sơ năm âu ki, hăm lơ tơ drong jang, ƀĕnh tơ drong pơ ngơ̆t, mă lei kiơ̆ đơ̆ng nơ̆r roi tơ băt hrĕnh đơ̆ng dôm Kơ dră jang lơ̆m Anih chĕp kơ̆l pơ gơ̆r Kuô̆k hô̆i, kon pơ lei, bơ ngai tăh hla, tơ chĕng ‘lơ̆ng tơ drong jang đơ̆ng Kuô̆k hô̆i. Dôm bơ ngai tang măt Kuô̆k hô̆i, kăn ƀô̆, bơ ngai jang tơ̆ Anih jang kơ Kuô̆k hô̆i gơ̆h lăp đon hăm tơ drong ‘nâu, mă lei ưh gơ̆h hŭt đon kơ chăng, lăp đon hăm dôm tơ drong hlôi jang đei.

Kơ dră Kuô̆k hô̆i ăn tơ băt, sơ năm 2022 hơ nơ̆ng jing sơ năm tôch gĭt kăl, sơ năm mă blŭng bơ̆ jang kiơ̆ Tơ drong tơ chơ̆t đơ̆ng Trung ương, dôm tơ drong Tơ chơ̆t đơ̆ng Kuô̆k hô̆i. Kơ dră chĕp kơ̆l Đảng, Tĕh đak, bơ ngai tăh hla, kon pơ lei tôch tơ rĕk păng hơ nơ̆ng hơ mĕng hăm tơ drong jang đơ̆ng Kuô̆k hô̆i, kơ na athei kơ chăng hơ met ming jơ hngâm đon, pơm ăn dôm tơ drong ưh ê, jing tơ drong hmă vă pơm lăp hăm tơ drong ‘mĕh vă lơ̆m tơ drong arih xa.

“Ƀok Hô sơ̆ pơ ma, Kuô̆k hô̆i bơ̆n tơ ƀôh ăn tơ drong tơ guăt 1 ƀơ̆r đon kơ đĭ đăng hơ drĕch hơ drung păng đon adrin tôch ai đơ̆ng hơ drĕch Việt Nam. Đon pơ hơi pran kơ jăp, hơ pơi jang tŏk ‘lơ̆ng, đon pơ hnŏng tôch dêh đơ̆ng hơ drĕch hơ drung, athei gô mơ̆ng đơ̆ng dôm tơ drong jang tŏk gĭt kăl, lơ̆m nŏh đei jang tŏk găh trong pơ gơ̆r. Kơ na, hơ năp jang đơ̆ng Kuô̆k hô̆i oei tôch lơ. Pơm thoi yơ vă gơ̆h đei khôi luơ̆t ‘lơ̆ng, drơ̆ng 1 nơ̆r, rơ đăh rơ đong, ƀônh hlôh vao. Athei pơm lăp tơ drong ‘mĕh vă jang tŏk tĕh đak hrĕnh, kơ jăp hlŏh dơ̆ng păng mât jang hơ doi hăm apŭng plenh tĕh ‘lơ̆ng hlŏh dơ̆ng. ‘Nŏh jĭ tơ drong bơ̆n athei tơ rĕk truh. Rim bơ ngai tang măt Kuô̆k hô̆i, kăn ƀô̆, bơ ngai jang, rim anih jang pha ra băl athei tơ chĕng truh tơ drong ‘nâu. Bơ̆n chih pơ jing luơ̆t, pơ jing trong pơ gơ̆r ‘nŏh jĭ vă pơih trong ăn tơ drong jang tŏk”.

Kơ dră Kuôk hô̆i Vương Đình Huệ pơ ma lơ̆m jơ tơ ƀâp

Kơ dră Kuô̆k hô̆i Vương Đình Huệ athei, găh tơ drong dăr lăng, đơ̆ng rŏng kơ Tết Nguyên đán, dôm Kơ dră chĕp kơ̆l khul dăr lăng athei bơ̆ jang đĭ kơ sư̆k vă bơ̆ jang đei 4 tơ drong dăr lăng đơ̆ng Kuô̆k hô̆i hlôi tơ lĕch; atŭm hăm ‘nŏh hơ len năng 107 tơ drong jang lơ̆m Tơ drong bơ̆ jang đơ̆ng Đảng khul Kuô̆k hô̆i bơ̆ jang kiơ̆ tơ drong Tơ chơ̆t đơ̆ng Hop akŏm mă XIII kơ Đảng păng 137 tơ drong jang chih pơ jing luơ̆t kiơ̆ Nơ̆r tơ chơ̆t 19 đơ̆ng Anih tơm Chinh trĭ păng tơ drong jang chih pơ jing luơ̆t lơ̆m jăl jang kơ Kuô̆k hô̆i 15. Tơ ƀôh dơ̆ng tơ drong đei yoa ‘lơ̆ng đơ̆ng tơ drong jang dăr lăng kơ Kuô̆k hô̆i vă pơm ‘lơ̆ng ăn tĕh đak chĕp kơ̆l pơ gơ̆r kiơ̆ khôi luơ̆t xã hội chủ nghĩa kơ kon pơ lei, đơ̆ng kon pơ lei, kiơ̆ Kơ dră Kuô̆k hô̆i Vương Đình Huệ, kon pơ lei athei đei xa yoa dôm tơ drong jơ nei đơ̆ng jang tŏk mŭk drăm, tơ pôl, đơ̆ng tơ plih ‘nao. Găh nŏh dơ̆ng, rim tơ drong tơ chơ̆t đơ̆ng Kuô̆k hô̆i găh dôm tơ drong kăl kơ tĕh đak athei năng tơ drong đei yoa kơ tĕh đak, đei yoa ăn hơ drĕch hơ drung kăl hlŏh, athei jang hơ drol hlŏh.

Hăm tơ dỏng tơ chơ̆t dôm tơ drong gĭt kăl hlŏh kơ tĕh đak, Kơ dră Kuô̆k hô̆i Vương Đình Huệ tơ tă, rim tơ drong tơ chơ̆t đơ̆ng Kuô̆k hô̆i, tơ drong gĭt kăl kơ tĕh đak athei năng tơ dỏng đei yoa kơ tĕh đak, kơ hơ drĕch hơ drung kăl hlŏh, athei jang hơ drol hlŏh. Năng kiơ̆ tơ drong đei yoa kơ tĕh đak, kơ hơ drĕch hơ drung vă bơ̆n bơ̆ jang, set hơ len, tơ lĕch tơ drong tơ chơ̆t, lơ̆m tơ drong đei yoa kơ tĕh đak, kơ hơ drĕch hơ drung đei tơ drong đei yoa kơ kon pơ lei păng anih tĕch mơ dro.

Kơ dră Kuô̆k hô̆i Vương Đình Huệ lui, hăm tơ drong juăt ‘lơ̆ng hơ iă lơ̆m 76 sơ năm âu ki đơ̆ng Kuô̆k hô̆i Việt Nam, dôm tơ drong jơ nei mă Kuô̆k hô̆i jăl XV hlôi iŏk đei lơ̆m sơ năm mă blŭng kơ jăl jang, dôm bơ ngai tang măt Kuô̆k hô̆i, kăn ƀô̆, bơ ngai jang tơ̆ Anih jang kơ Kuô̆k hô̆i vă hơ nơ̆ng tơ guăt 1 ƀơ̆r đon, tơ iung đon rơ gei đơ̆ng tơ pôl, vă gơ̆h jang đang ‘lơ̆ng tơ drong jang đei Đảng, tĕh đak, kon pơ lei pơ jao ăn, tơ gop jơ hngâm pơ jing tĕh đak Việt Nam roi đunh roi pơ drŏng, pran kơ jăp, kon pơ lei roi đunh roi phĭ tơ nŏ, hiôk chơt, tơ găl hăm đon lui, đon hơ mĕng đơ̆ng Đảng, tĕh đak, bơ ngai tăh hla păng kon pơ lei.

Dơ̆ng: Tơ blơ̆