‘Nao âu, tơ̆ Hnam Kuô̆k hô̆i, Anih chĕp kơ̆l pơ gơ̆r Kuô̆k hô̆i hop akŏm tơ lĕch tơ drong jang dăr lăng đơ̆ng Kuô̆k hô̆i sơ năm 2023, pơih pơ dăh trư̆k tuyê̆n hăm 49 Khul tang măt Kuô̆k hô̆i kơ dôm dêh char, pơ lei tơm (plt). Kơ dră Kuô̆k hô̆i Vương Đình Huệ, Phŏ Kơ dră Kuô̆k hô̆i Trần Quang Phương pơ gơ̆r hop akŏm.

Pơ ma lơ̆m hop akŏm, dôm bơ ngai tang măt akhan, khei ‘năr âu ki, tơ drong jang dăr lăng đơ̆ng Kuô̆k hô̆i đei tưk hơ tŏk păng đei tơ drong tơ plih ‘nao, roi đunh roi đei yoa, iŏk đei lơ tơ drong gĭt kăl, đei bơ ngai tăh hla păng kon pơ lei tơ chĕng ‘lơ̆ng. Vă hơ tŏk tơ drong đei yoa đơ̆ng bơ̆ jang dăr lăng, kiơ̆ Phŏ Kơ dră chĕp kơ̆l Jơ nŭm pơ gơ̆r kon pơ lei plt Hồ Chí Minh Nguyễn Văn Dũng athei hơ tŏk tơ drong dăr lăng trŏ tơ drong tơm:

“Pơ jing tơ drong dăr lăng ‘moi kiơ̆ tơ̆ yăn âu, pơm hơ tŏ ‘lơ̆ng ăn rim tơ drong jang dăr lăng. Lơ̆m hla ar chih tơ drong dăr lăng, tơ chơ̆t găh tơ drong dăr lăng athei đei nơ̆r hơ găt mă rơ đăh, chih tơ băt jơ năr, hơ năp athei bơ̆ jang đơ̆ng dôm anih jang, khul grŭp, rim bơ ngai đei ƀơm truh. Athei đei tơ drong dăr lăng kiơ̆ tơ drong jang găh tơ mât jên jang kơ tĕh đak, tơ drong hrŭ ‘mong chưk pơ ‘ngoăih tĕh.”

Hop akŏm tơ lĕch Tơ drong jang dăr lăng đơ̆ng Kuô̆k hô̆i sơ năm 2023

Vă tơ lĕch jang đei yoa tơ drong dăr lăng đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i lơ̆m sơ năm 2023, Kơ dră Kuô̆k hô̆i Vương Đình Huệ athei, dôm anih jang kơ Kuô̆k hô̆i, anih jang kơ pal chih hơ dăh, pơm hơ tŏk tơ drong đei yoa đơ̆ng dăr lăng ‘nŏh jĭ 1 tơ drong jang tôch gĭt kăl, tơm dơ nơm lơ̆m tơ drong tơ plih ‘nao khul grŭp păng tơ drong jang đơ̆ng Kuô̆k hô̆i Việt Nam ‘moi kiơ̆ đon kơ chĕng, trong jang đơ̆ng Đảng găh pơ jing Teh đak chĕp kơ̆l pơ gơ̆r kiơ̆ luơ̆t XHCN kơ Kon pơ lei, đơ̆ng Kon pơ lei, yoa Kon pơ lei.  

Hơ tŏk tơ drong dăr lăng đơ̆ng Kuô̆k hô̆i lơ̆m tơ drong jang tang găn xa pơ jĭp, pơm glăi, pơ huach kư̆ kă; năng kăl tơ drong tang găn xa pơ jĭp, pơm glăi, pơ huach kư̆ kă, chih hơ dăh ‘nâu jĭ tơ drong athei jang hơ nơ̆ng, gĭt kăl păng đei pơ gơ̆r lơ̆m rim tơ drong, rơ đăh rơ đong, trŏ tơ drong kăl; akŏm lơ̆m dôm tơ drong ƀônh pơm glăi, đei tơ pôl tơ rĕk găh xa pơ jĭp, pơm glăi, đon tơ chĕng ưh ‘lơ̆ng găh chinh trĭ, jơ hngâm đon, trong arih xa.

Kơ dră Kuô̆k hô̆i Vương Đình Huệ athei, hơ met pơ ‘lơ̆ng trong jang hơ doi đơ̆ng Kuô̆k hô̆i hăm dôm anih jang đảng, Mặt trận Tổ quốc Việt Nam, dôm khul jang chinh trĭ, tơ pôl lơ̆m tơ drong dăr lăng vă tưk tơ iung tơ drong dăr lăng đơ̆ng rim anih jang, vang akŏm jơ hngâm tưk tơ iung, pơm hơ tŏk tơ drong ‘lơ̆ng, đei yoa vă vei lăng ‘lơ̆ng tơ drong chĕp kơ̆l pơ gơ̆r; jăh hơ len năng, chih akŏm păng tơ chĕng hơ len, tơ lĕch nơ̆r athei hơ met ming, chih tơ lĕch dơ̆ng 1,2 tơ drong hơ găt đơ̆ng luơ̆t lơ̆m tơ drong jang dăr lăng. Pơ gơ̆r ‘lơ̆ng tơ drong iŏk kơ phĭu lui dăh ưh hăm dôm kơ chư̆k yoa Kuô̆k hô̆i pôk hơ tŏk, kĭ ăn.

Kơ dră Kuô̆k hô̆i Vương Đình Huệ dăr lăng tơ drong jang pơm trong gre kơ dâu hrĕnh Bến Lức - Long Thành

Kơ dră Kuô̆k hô̆i pơ ma hơ dăh, tơ plih ‘nao, hơ tŏk tơ drong đei yoa đơ̆ng bơ̆ jang dăr lăng ‘nŏh jĭ tơ drong hlôi, tŏk bŏk đei Kuô̆k hô̆i, Anih chĕp kơ̆l pơ gơ̆r Kuô̆k hô̆i bơ̆ jang păng đei ƀôh kiơ̆ đơ̆ng dôm tơ drong tơ plih ‘nao đon kơ chĕng păng trong bơ̆ jang vă tơ gop pơm hơ tŏk tơ drong ‘lơ̆ng, sĭt kơ tang, đei yoa đơ̆ng Khul kơ dră pơ gơ̆r tĕh đak.

“Dăr lăng athei ‘moi kiơ̆ jơ hngâm đon ‘mĕh tơ iung pơ jing; kơ plăh “pơ jing” păng “tơ jră” ‘nŏh pơ jing oei kăl hlŏh, athei jang đunh đai; tơ jră ‘nŏh jang mă pran kơ tang, truh um, jang mă tơ tĕnh; athei tưk tơ iung đei dôm trong jang ‘lơ̆ng, dôm trong jang hơ iă, pôk pơ ư bơ ngai jang ‘lơ̆ng, tơ drong ‘lơ̆ng; hơ len năng mă tôm, tơ păt ‘lơ̆ng vă tơ tom hơ met ming trong pơ gơ̆r, rim khôi luơ̆t, hơ nơ̆ng hơ tŏk tơ drong đei yoa đơ̆ng pơ gơ̆r bơ̆ jang, tơ gop ăn tơ drong jang atŏk tơ iung mŭk drăm, tơ pôl păng pơ jing tĕh đak. Chih pơ jing luơ̆t ‘nŏh vă pơ jing tơ drong ‘lơ̆ng păng jang tŏk, tơ drong dăr lăng kŭm thoi nŏh.

Kơ dră Kuô̆k hô̆i pơ ma hơ dăh, Kuô̆k hô̆i hơ nơ̆ng tơ plih ming kơ dih, yoa thoi nŏh, rim anih jang kơ Kuô̆k hô̆i athei bơ̆ jang mă ‘lơ̆ng tơ drong dăr lăng kơ dih, rim bơ ngai tang măt Kuô̆k hô̆i athei băt hơ len năng tơ drong jang đơ̆ng kơ dih mưh bơ̆ jang tơ drong jang, hơ năp jang đơ̆ng kơ dih tơ̆ hơ năp bơ ngai tăh hla, athei “pơih đei 1 chăl ‘nao tơ pă, đei ƀĕnh tơ drong hơ mĕng ‘lơ̆ng lơ̆m tơ drong jang Kuô̆k hô̆i” nhen thoi tơ drong hơ mĕng đơ̆ng Tổng Bí thư Nguyễn Phú Trọng pơ ma ƀât blŭng Hop akŏm mă mônh, Kuô̆k hô̆i jăl XV.

Đơ̆ng rŏng kơ hop akŏm, Kơ dră Kuô̆k hô̆i Vương Đình Huệ păng khul jang đơ̆ng Trung ương hlôi hơ len năng, dăr lăng tơ drong jang kiơ̆ dôm tơ drong tơ chơ̆t đơ̆ng Kuô̆k hô̆i hăm tơ drong tơ mât jên jang pơm trong gre kơ dâu hrĕnh Bến Lức - Long Thành păng cham gre păr Long Thành. Vă jang kĕh trŏ khei ‘năr hơ găt, hăm kơ dră chĕp kơ̆l dêh char Đồng Nai, Kơ dră Kuô̆k hô̆i Vương Đình Huệ athei, dêh char Đồng Nai akŏm jơ hngâm tôch ai, sek tơ lang kĕh tơ drong chưk pơ ‘ngoăih tĕh, pơ jao ăn anih tơ mât jên jang, ƀơk hla ar yoa tĕh; hơ nơ̆ng tơ rĕk truh tơ drong tơ mât jên jang man pơ kĕh dôm anih jang pơ yoa ăn kon pơ lei, tơ rĕk truh tơ drong pơ tho tơ drong jang vă kon pơ lei đei tơ drong ‘lơ̆ng, hiôk hian mưh jang xa, pơm ‘lơ̆ng ăn kon pơ lei đei tơ drong arih xa dang ăi mă ưh ‘nŏh kơ jung ƀiơ̆ kơ tơ ring oei xa adrol ki.

VOV/Dơ̆ng tơ blơ̆