VOV4.Bahnar - Giĕng âu ki, Kơ dră Kuô̆k hô̆i Vương Đình Huệ pơ gơ̆r hop akŏm trư̆k tuyê̆n tơ lĕch tơ drong jang đơ̆ng Jơ nŭm pơ gơ̆r kon pơ lei dôm dêh char, pơ lei tơm (plt) tơ̆ tơ ring găh Tu sơ năm 2022. Bơ ngai tang măt ăn dôm tơ ring, anih jang kơ pal păng hlŏh 200 'nu bơ ngai tang măt kơ 25 dêh char, plt vang hop akŏm. Nơ̆r athei đei tơ lĕch lơ̆m sơ năm 2022 'nŏh hơ nơ̆ng pơm hơ tŏk tơ drong 'lơ̆ng đơ̆ng tơ drong jang kơ Jơ nŭm pơ gơ̆r kon pơ lei jơ̆p tơ ring.

Tơ̆ hop akŏm, dôm bơ ngai tang măt pơ ma nuh găh tơ drong kăl, dôm tơ drong iŏk đei đơ̆ng tơ drong jang kơ Jơ nŭm pơ gơ̆r kon pơ lei nhen tơ drong dăr lăng, tơ ƀâp bơ ngai tăh hla, tơ chơ̆t dôm tơ drong gĭt kăl tơ̆ tơ ring; atŭm hăm ‘nŏh tơ lĕch lơ nơ̆r pơ ma, apinh vă hơ tŏk hlŏh dơ̆ng tơ drong jang đơ̆ng Jơ nŭm pơ gơ̆r kon pơ lei.

Jơ bơ̆ jang lơ̆m hop akŏm

Yă Phùng Thị Hồng Hà, Phŏ Kơ dră chĕp kơ̆l Jơ nŭm pơ gơ̆r kon pơ lei plt Hà Nội đei nơ̆r pơ ma: “Apinh Anih chĕp kơ̆l pơ gơ̆r Kuô̆k hô̆i pơ tho tơ ƀôh tơ lĕch dôm tơ drong hơ găt sek phak đơ̆ng rŏng kơ dăr lăng, chih hơ dăh hơ năp jang đơ̆ng bơ ngai chĕp kơ̆l anih đei dăr hơ len mưh pơm kiơ̆ dôm nơ̆r athei đơ̆ng rŏng kơ dăr lăng đơ̆ng Jơ nŭm pơ gơ̆r kon pơ lei plt, kuơ̆n, apŭng, thĭ xăh mă loi jĭ lơ̆m tơ drong dăr lăng tơ drong jang đơ̆ng Dơ nŏ anih vei lăng kon pơ lei, Kơ dră vei lăng kon pơ lei phương tơ̆ dôm kuơ̆n, apŭng, thĭ xăh; vă pơm 'lơ̆ng Kơ dră vei lăng kon pơ lei phương bơ̆ jang trŏ hơ năp jang, tơ drong jang đei pơ jao; vĕh ver đon ưh kơ chăng, jang ưh 'lơ 'lŏ mưh bơ̆ jang ƀât ưh đei Jơ nŭm pơ gơ̆r kon pơ lei dăr lăng”.

Ƀok Sùng A Hồ, Kơ dră jang lơ̆m Jơ nŭm pơ gơ̆r kon pơ lei dêh char Lai Châu akhan, mưh bơ̆ jang tơ pă tơ̆ yăn âu đơ̆ng Jơ nŭm pơ gơ̆r kon pơ lei, đei lơ tơ drong gĭt kăl, 'nao đei kơ plăh 2 ‘măng hop akŏm ƀơm truh tơ drong jang atŏk tơ iung mŭk drăm, tơ pôl, vei sơ đơ̆ng tĕh đak tơ̆ tơ ring kăl đei sek tơ lang hloi. Kơ plăh 'nŏh, kiơ̆ tơ drong hơ găt đơ̆ng dôm kơ luơ̆t păng hla ar chih pơ tho hơ la kơ luơ̆t, tơ drong ‘nâu găh hơ năp chih tơ chơ̆t đơ̆ng Jơ nŭm pơ gơ̆r kon pơ lei, 'nŏh athei gô truh hop akŏm Jơ nŭm pơ gơ̆r kon pơ lei dêh char set hơ len, tơ chơ̆t ăn 'mơ̆i.

Ƀok Sùng A Hồ đei nơ̆r pơ ma: “Kuô̆k hô̆i, Khŭl kơ dră tĕh đak athei tơ chĕng hơ len tơ lĕch hla ar chih hơ dăh hơ năp jang đơ̆ng Khul kơ dră chĕp kơ̆l Anih pơ gơ̆r kon pơ lei dêh char ƀơm truh tơ drong set hơ len, tơ chơ̆t dôm tơ drong vă ‘nao đei ƀât tŏk bŏk 2 ‘măng hop akŏm kơ Jơ nŭm pơ gơ̆r kon pơ lei. Hơ len năng, chih hơ dăh ƀiơ̆ dôm tơ drong kăl athei klăih song hơ năp jang dăh mă pơ jao ăn Khul kơ dră chĕp kơ̆l Jơ nŭm pơ gơ̆r kon pơ lei set hơ len, tơ chơ̆t ƀât tŏk bŏk 2 'măng hop akŏm, mă loi jĭ dôm tơ drong ƀơm truh trong tơ mât jên jang, vei lăng tĕh, jên hu, dôm tơ drong kăl 'nao đei; chih hơ dăh trong jang, tơ drong pơ gơ̆r bơ̆ jang đei Jơ nŭm pơ gơ̆r kon pơ lei pơ jao ăn vă sek tơ lang ƀât tŏk bŏk 2 'măng hop akŏm păng hơ năp jang đơ̆ng Khul kơ dră chĕp kơ̆l Jơ nŭm pơ gơ̆r kon pơ lei mưh tơ chơ̆t dôm tơ drong ‘nŏh”.

Kơ dră Kuô̆k hô̆i Vương Đình Huệ pơ ma pơ tôch hop akŏm

Pơ ma pơ tôch hop akŏm, Kơ dră Kuô̆k hô̆i Vương Đình Huệ tơ tă, hơ nơ̆ng hŏk pơ hrăm, hlôh vao hơ năp jang, tơ drong jang, tơ drong gơ̆h jang đơ̆ng Jơ nŭm pơ gơ̆r kon pơ lei, Khul kơ dră chĕp kơ̆l Jơ nŭm pơ gơ̆r kon pơ lei, dôm anih jang kơ Jơ nŭm pơ gơ̆r kon pơ lei, Grŭp bơ ngai tang măt Jơ nŭm pơ gơ̆r kon pơ lei păng bơ ngai tang măt Jơ nŭm pơ gơ̆r kon pơ lei kiơ̆ tơ drong hơ găt đơ̆ng Luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t pơ gơ̆r Khul kơ dră tĕh đak păng Luơ̆t pơ gơ̆r Khul kơ dră chĕp kơ̆l tơ̆ tơ ring, mă loi hăm dôm bơ ngai tang măt 'nao jang blŭng a 'nŏh jĭ bơ ngai tang măt Jơ nŭm pơ gơ̆r kon pơ lei:

“Hơ nơ̆ng hơ len năng, chih pơ jing dăh mă hơ met pơ 'lơ̆ng păng pơ gơ̆r bơ̆ jang Tơ drong jang hơ nơ̆ng tơ plih 'nao, hơ tŏk tơ drong 'lơ̆ng đơ̆ng Hop akŏm Jơ nŭm pơ gơ̆r kon pơ lei, tơ drong tơ ƀâp bơ ngai tăh hla, apinh jet păng tơl nơ̆r apinh jet vă bơ̆ jang 'lơ̆ng tơ drong jang, hơ năp jang đơ̆ng Jơ nŭm pơ gơ̆r kon pơ lei dêh char, plt jô̆ hloi tơ drong pơ gơ̆r păng pơm 'lơ̆ng mưh jang kiơ̆ Khôi luơ̆t tơm, luơ̆t tĕh đak; pơ jing khul kơ dră pơ gơ̆r, rơih bơ ngai jang, iŏk kơ phĭu găh đon lui; tơ chơ̆t dôm tơ drong kăl lơ̆m dôm tơ drong jang păng dăr lăng tơ drong pơm kiơ̆ Khôi luơ̆t tơm păng luơ̆t tĕh đak tơ̆ tơ ring. Tơ drong tơ plih 'nao, hơ tŏk jơ hngâm pran, rơ gei đei yoa đơ̆ng tơ drong jang kơ Jơ nŭm pơ gơ̆r kon pơ lei, athei jang kiơ̆ dôm tơ drong tơ chơ̆t đơ̆ng Hop akŏm Đảng lơ̆m tĕh đak păng hop akŏm Đảng ƀô̆ dêh char, plt. Athei năng bơ ngai tang măt Jơ nŭm pơ gơ̆r kon pơ lei 'nŏh tơm, tơ drong rơ gei, jang 'lơ̆ng đơ̆ng bơ ngai tang măt Jơ nŭm pơ gơ̆r kon pơ lei gơ̆h pơm hơ tŏk tơ drong 'lơ̆ng, rơ gei đei yoa ăn tơ drong jang đơ̆ng Jơ nŭm pơ gơ̆r kon pơ lei pơ ma atŭm. Rim tơ drong tơ chơ̆t gĭt kăl ƀơm truh tơ ring athei iŏk kon pơ lei, anih tĕch mơ dro pơm tơm, năng tơ drong đei yoa kơ tĕh đak, kơ hơ drĕch hơ drung 'nŏh kăl hlŏh păng athei jang hơ drol hlŏh”.

Kơ dră Kuô̆k hô̆i Vương Đình Huệ athei, đơ̆ng tơ drong kăl đei chih iŏk tơ̆ Kuô̆k hô̆i păng Jơ nŭm pơ gơ̆r kon pơ lei 1,2 dêh char, plt, Jơ nŭm pơ gơ̆r kon pơ lei dôm dêh char, plt pơ gơ̆r hơ len năng, chih pơ jing, tơ roi ăn anih jang đảng tơ̆ tơ ring drơ̆ng nơ̆r ăn trong jang dăh mă Jơ nŭm pơ gơ̆r kon pơ lei tơ lĕch tơ drong tơ chơ̆t găh tơ drong jang chih pơ jing dôm hla ar hơ găt luơ̆t ăn đĭ jăl jang vă kơ chăng đơ̆ng hrôih, đơ̆ng hơ tăih mưh chih pơ jing, hơ met pơ ‘lơ̆ng trong jang, tơ drong pơ gơ̆r vă pơih trong ăn tơ drong jang tŏk mŭk drăm, tơ pôl tơ̆ tơ ring; năng kăl chih hơ dăh dôm tơ drong tơ chơ̆t hơ drô̆ đơ̆ng Kuô̆k hô̆i hăm trong chĕp kơ̆l kơ Khul kơ dră pơ gơ̆r tơ ring păng trong jang hơ drô̆ ăn 1,2 dêh char, plt.

Dơ̆ng: Tơ blơ̆