Kiơ̆ đơ̆ng Hơnih tơm vei lăng Tơdrong jang, Bơngai rơka păng Tơpôl, lơ trong jang tih kơ Kuô̆k hô̆i pơjao găh Trong pơprŏ jang atŏk tơ iung mŭk drăm-tơpôl sơnăm 2024 jei iung jang keh đang nhen: Măt bơngai hiong tơdrong jang tơ̆ tơring kơdrơ̆m jơnei tim mă truh 4%, măt bơngai jang đei hŏk pơhrăm tơdrong jang jơnei 28-28,5%. Ŭnh hnam dơnuh kiơ̆ pơkăp dơnuh lơ pang hơtuch sơnăm 2024 tơjur hloh 1% pơtêng hăm hơtuch sơnăm 2023. Mă lei, Kơ iĕng Kơdră chĕp pơgơ̆r Hơnih bơ̆ jang vei lăng Tơpôl Lâm Văn Đoan athei kăl dăr lăng, tơmơ̆t dơ̆ng lơ̆m hla bơar chih tơbăt dôm tơdrong đei ƀơm kơnê̆ đơ̆ng kial hơbŭt kơsô̆ 3 pơm ăn, đơ̆ng noh hơlen rim trong tơlĕch jang mă trŏ ƀlep, trŏ lăp hloh dơ̆ng: "Kăl chih tơmơ̆t tôm dôm tơdrong hiong răm đơ̆ng kial hơbŭt kơsô̆ 3 pơm ăn, đei nơ̆r tơgop păng tơbăt hơdăh dơ̆ng rim trong tơlĕch jang hlôi jang keh đang dăh mă tim mă keh đang? Tơdrong vă jang pơm hnam oei, bơ̆n tơlĕch ăn kon jên jang Trung ương 8.000 ti hlak jên tơgum ăn dang 100.000 ŭnh hnam dơnuh, mă lei hơdrô̆ tơdrong hiong răm đơ̆ng kial hơbŭt Yagi pơm ăn ‘noh 257 pơbŭng hnam, kơ yuơ lơ loh rim trong tơlĕch jang ou kăl hơlen ming dơ̆ng".

Tơbăt tơ̆ hop akŏm đei ƀôh, sơnăm 2024, atŭm hăm tơdrong hơmet pơ ‘lơ̆ng păng atŏk tơ iung rim hơnih jang, tơdrong jang mŭk drăm, bơngai jang đei lăng kơjăp; atŏk kơtang tơgoăt dih băl găh tơdrong tơmơ̆t jang păng tơchă tơdrong jang, tơgŭm djru ăn bơngai jang tơchă tơdrong jang păng ‘măng mă blŭng tơlĕch jang pơlong năng pơgơ̆r tơbăt tơdrong jang trư̆k tuyên lơ̆m teh đak; tơtom tơgŭm djru kon pơlei, bơngai jang hiong tơdrong jang tơchă đei dơ̆ng tơdrong jang; tơjur jơ jang păng jang sa iok đei kơ bơngai jang pơtêng hăm dôm khei ou lơ̆m sơnăm 2023. Tơdrong tơgoăt dih băl tơdrong jang tơ̆ rim hơnih mơdro sa vei kơjăp sơđơ̆ng, tơdrong jang ba bơngai jang năm jang tơ̆ teh đak đe đei hơmet pơ ‘lơ̆ng. Rim tơring jang kiơ̆ tôm tong, tơtom tơgŭm djru ăn dôm bơngai đei iŏk yua ăn kĕch mang, tơgŭm djru tơpôl, ƀao hiêm tơpôl, Ƀao hiêm hiong tơdrong jang, tơjur dơnuh, vei lăng năng tông bơngai ‘lŏ kră, hơ ioh tơnap tap ...; tơdrong kla ăn ưh kơ iŏk yua hăm kon jên hmă ăn dôm bơngai đei iŏk yua sa hơpăh hơrih sa tơpôl đei iung jang ‘lơ̆ng.

Kiơ̆ đơ̆ng rim bơngai tang măt, Hơnih tơm vei lăng Tơdrong jang, Bơngai rơka păng Tơpôl, bơ̆ jang tơlĕch kon jên teh đak tơmơ̆t jang tŏk bŏk hiơ hiơ̆, lơ̆m ou đei kon jên jang đơ̆ng Tơdrong jang tơjur dơnuh kơjăp ‘lơ̆ng sơnăm 2024. Kơ iĕng Kơdră chĕp pơgơ̆r Hơnih bơ̆ jang vei lăng Tơpôl Đỗ Thị Lan athei: “Sơnăm 2024 kon jên jang, kon jên tơmơ̆t jang đơ̆ng bơ̆n tŏk bŏk oei tŏ sĕt, tơlĕch kon jên tơmơ̆t jang truh khei 8 jơnei 47%. Truh đĭ sơnăm tơchĕng lăng rŏ năng gô keh đang mơ̆n. kăl tơroi tơbăt mă hơdăh hloh dơ̆ng găh kon jên tơmơ̆t jang kơ sơnăm 2022-2023 tơmơ̆t lơ̆m iung jang lơ̆m sơnăm 2024 ‘noh tơlĕch jang lơ liơ, hăm gơ̆h vă tơlĕch pơđĭ kon jên bơ̆ jang teh đak lơ̆m sơnăm 2024 dăh mă ưh?"

Tơbăt găh tơdrong jang kiơ̆ Trong pơprŏ jang atŏk tơ iung mŭk drăm-tơpôl păng Kon jên bơ̆ jang teh đak sơnăm 2024, trong pơprŏ păng trong vă jang kon jên jang teh đak sơnăm 2025 lơ̆m găh tơdrong jang, bơngai đei iok yua ăn teh đak păng tơpôl, tang măt ăn Hơnih tơm vei lăng Tơdrong jang, Bơngai rơka păng Tơpôl tơbăt, hăm trong chĕp pơgơ̆r đơ̆ng Đảng, tơdrong pơrô̆ iung jang kơtang đơ̆ng Khul kơdră chĕp pơgơ̆r Teh đak, Thủ tướng Teh đak; hăm kơrŭn đĭ ai đơ̆ng kang ƀô̆, bơngai jang kơ rim hơnih bơ̆ jang păng tơdrong vang iung jang kơjăp đơ̆ng rim tơring tơrang, Hơnih tơm vei lăng Tơdrong jang, Bơngai rơka păng Tơpôl hlôi pơgơ̆r tơlĕch jang kiơ̆ hrơ̆p minh ‘măng, ‘lơ̆ng hơ iă, jơnei rim tơdrong jang, trong vă jang lơm rim tơdrong jang găh tơdrong jang, bơngai đei iŏk yua ăn teh đak păng tơpôl; tơtom hơmet pơ ‘lơ̆ng, iung jang ‘lơ̆ng; mĭnh păh jang kiơ̆ rim tơdrong jang kăl, adoi lăng kơjăp lơ̆m xek tơlang dôm tơdrong jang tim mă keh đang, dôm tơdrong đei ƀôh ‘nao dơ̆ng.

Tơ̆ hop akŏm, Hơnih bơ̆ jang vei lăng Tơpôl kơ Kuô̆k hô̆i athei Hơnih tơm vei lăng Tơdrong jang, Bơngai rơka păng Tơpôl pơm hơdăh hloh dơ̆ng dôm tơdrong tơhlăk tơhlĭn đei ƀơm truh hơnăp jang klăh asong kon jên jang adoi nhen rim tơdrong tơhlăk tơhlĭn găh pơm hla bơar pơtho tơbăt jang kiơ̆. Đơ̆ng noh pơchoh trong jang vă tơlĕch kon jên jang teh đak trŏ lăp hloh, sơđơ̆ng ăn vei lăng năng tông hơrih sa tơpôl ăn kon pơlei.