Lăp đơ̆ng rŏng ‘Măng hop akŏm mă 5, Đảng khul Kuô̆k hô̆i păng Khul kơdră chĕp pơgơ̆r Teh đak chĕp pơgơ̆r, pơrô̆ jang kơtang rim hơnih bơ̆ jang kơ Kuôk hô̆i, Khul kơdră teh đak iung jang hơdoi kơjăp hăm rim hơnih bơ̆ jang tĕnh koăng hơmet ăn rim tơdrong sơđơ̆ng ‘lơ̆ng hloh vă pơtruh ăn Kuôk hô̆i lăng hơlen, kĭ tơchơ̆t.

Găh mĭnh ƀar tơdrong Hơnih chĕp pơgơ̆r Kuô̆k hô̆i ƀôh tim mă đei tôm rơvơn pơtruh ăn Kuô̆k hô̆i lăng hơlen, pơdrơ̆ng kiơ̆ tơ̆ ‘Măng hop akŏm mă 6, Tổng thư ký, Kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường athei, Đảng khul Kuô̆k hô̆i păng Khul kơdră Đảng kơ Khul Kơdră chĕp pơgơ̆r Teh đak lăng hơlen, pơrô̆ athei rim hơnih bơ̆ jang hơnơ̆ng chă tơchĕng hơlen, hơmet ăn vă pơtruh ăn Kuô̆k hô̆i lăng hơlen, tơchơ̆t tơ̆ ‘Măng hop akŏm mă 7.

Iung pơma tơ̆ Hop akŏm, Thủ tướng Teh đak Phạm Minh Chính tơbăt, lăp đơ̆ng rŏng pơtôch ‘Măng hop akŏm mă 5 kơ Kuô̆k hô̆i 1 năr, Khul kơdră Teh đak hlôi hop akŏm pơjao tơdrong jang hơmet ăn rim tơdrong găh hơnih gơ̆h jang vă pơtruh ăn Kuô̆k hô̆i lăng hơlen, kĭ tơchơ̆t tơ̆ ‘Măng Hop akŏm mă 6. Thủ tướng pơma hơdăh, khei năr au ki, rim hơnih bơ̆ jang kơ Kuô̆k hô̆i hlôi iung jang hơdoi kơjăp hăm rim hơnih bơ̆ jang kơ Kuô̆k hô̆i:“Iung jang hơdoi au ưh khan lăp hơdrô̆ rim tơdrong vă jang khôi luơ̆t mă lei lơ tơdrong găh lơ̆m tơdrong jang kơ Kuô̆k hô̆i, hơnih bơ̆ jang tơm hloh, tơchơ̆t rim tơdrong kăl kơ Teh đak, dăr lăng, tơ iung pơjing khôi luơ̆t mă rim tơdrong tih kơ Kuô̆k hô̆i jei vang iung jang hơdoi kơjăp hăm Khul kơdră chĕp pơgơ̆r teh đak tôch jơnei. Ba ƀôh hơdăh tơdrong vang iung jang ‘lơ̆ng hơ iă kơ Kuô̆k hô̆i. Gơnơm đơ̆ng noh, tơdrong jang kơ Khul kơdră chĕp pơgơ̆r Teh đak ‘lơ̆ng hơ iă hloh, pơđĭ tơdrong đei ƀơm truh pơm kiơ̆ khôi luơ̆t, đei ƀơm truh rim tơdrong jang mŭk drăm-tơpôl, sơđơ̆ng-vei lăng teh đak. Âu ki, Hop akŏm Trung ương jei ƀôh hơdăh, hôn bơnê kơtang tơdrong iung jang hơdoi kơjăp ƀar păh Kuô̆k hô̆i hăm Khul kơdră chĕp pơgơ̆r Teh đak”.

Găh mĭnh ƀar tơdrong jang oei hiơ hiơ̆, tim mă tom hơmet ăn vă pơtruh ăn Kuô̆k hô̆i lăng hơlen, tơchơ̆t tơ̆ ‘Măng hop akŏm mă 6 kiơ̆ trong pơprŏ jang, Thủ tướng Teh đak ‘meh vă rim hơnih bơ̆ jang kơ Kuô̆k hô̆i, Hơnih chĕp pơgơ̆r Kuô̆k hô̆i vang lăng ba hăm rim hơnih bơ̆ jang kơ Khul kơdră chĕp pơgơ̆r Teh đak păng Khul kơdră chĕp pơgơ̆r Teh đak kơ yuơ ‘nau dôm tơdrong tơnap tap. Khei năr kơnh, Thủ tướng athei ƀar păh gô hơnơ̆ng iung jang hơdoi kơjăp vă hơmet ăn rim tơdrong au vă pơtruh ăn Kuô̆k hô̆i lăng hơlen, kĭ tơchơ̆t tơ̆ hop akŏm tơjê̆ hloh.

Iung pơma pơtôch hop akŏm, Kơdră chĕp pơgơ̆r Kuô̆k hô̆i Vương Đình Huệ tơbăt, vă hơmet ăn ‘măng hop akom mă 6, Đảng khul Kuô̆k hô̆i păng Khul kơdră Đảng kơ Khul Kơdră chĕp pơgơ̆r Teh đak hlôi pơma dơnuh tơtom, kơjăp, iung jang ƀlep trong tơlĕch jang, trŏ lăp hăm tơdrong tơlĕch ăn.

Drơ̆ng mĭnh nơ̆r hăm nơ̆r tơgop đơ̆ng rim kơdră tang măt vang hop akŏm păng Thủ tướng Teh đak Phạm Minh Chính, Kơdră chĕp pơgơ̆r Kuô̆k hô̆i Vương Đình Huệ hôn bơnê tơdrong hơmet ăn tôch brĕ đơ̆ng 2 Hơnih bơ̆ jang hlôi đei iung jang hơdoi kơjăp, rim nơ̆r tơgop trŏ lăp hăm rim trong tơlĕch ăn; adoi pơma hơdăh, kăl hơnơ̆ng hơmet ăn mă brĕ kiơ̆ trong tơlĕch jang lơ̆m blŭng khei 1/2024 gô xek tơlang keh đang dôm tơdrong jang tim mă keh đang.“ ‘Măng hop akŏm mă 6, Kuô̆k hô̆i jăl XV ‘noh tơdrong jang tôch kơ lơ pơ đĭ bơ̆ jang pơjing Khôi luơ̆t, dăr lăng, tơchơ̆t rim tơdrong kăl teh đak, jĭ ‘măng hop akŏm đei ƀơm truh iŏk kơphĭu drơ̆ng dăh mă ưh hăm rim kơchư̆k đei Kuô̆k hô̆i pôk tơmơ̆t, kĭ tơchơ̆t. Lơ tơdrong kăl đei ƀơm truh atŏk tơ iung mŭk drăm-tơpôl păng hơrih sa kơ kon pơlei. Kơdră chĕp pơgơ̆r Đảng, Teh đak, rim kơdră kăch mang so, bơngai tăh hla kon pơlei lơ̆m teh đak jei hơmŏ păng lui kơjăp lơ̆m tơdrong iŏk đei jơnei kơ ‘măng hop akŏm ‘măng mă au nhen lĕ rim ‘măng hop akŏm hơdrol au ki”.

Kơdră chĕp pơgơ̆r Kuô̆k hô̆i athei Khul kơdră Teh đak atŭm hăm rim hơnih bơ̆ jang kơ Kuô̆k hô̆i iung jang hơdoi vă hơnơ̆ng bơ̆ jang hơmet ăn vă sơđơ̆ng ‘lơ̆ng rim tơdrong vă jang tơchĕng hơlau gô pơtruh ăn Kuô̆k hô̆i tơ̆ ‘măng hop akŏm au, mă kăl dôm tơdrong vă pơjing khôi luơ̆t mơmat hloh.

Hăm dôm tơdrong kăl oei đei nơ̆r tơgop phara dih băl, kăl đei trong vă jang pha dih băl, kăl hơmet mă brĕ dôm tơdrong, tơblang pơm hơdăh tơdrong ‘lơ̆ng, tơdrong ưh kơ ‘lơ̆ng kiơ̆ trong vă jang vă Kơdră tang măt Kuô̆k hô̆i pơma dơnuh, tơgop nơ̆r, sơđơ̆ng ‘lơ̆ng bơ̆ jang pơjing khôi luơ̆t tơ̆ ‘măng hop akŏm.

Kơdră chĕp pơgơ̆r Kuô̆k hô̆i jei pơkă kăl hơnơ̆ng chih tơbăt pơre tơbăt găh tơdrong hop akŏm, mă kăl ‘noh hăm rim ‘măng pơma dơnuh, ăn tơgop nơ̆r găh dôm tơdrong mă kon pơlei lăng ba kơjăp nhen tơdrong jang iŏk kơphĭu drơ̆ng nơ̆r, apĭnh hơlen păng tơl hơdăh dôm nơ̆r apĭnh hơlen tơ̆ ‘măng hop akŏm, ưh kơ lê̆ lon chih kơtơ̆ng ang; pơchoh trong ăn chih tơbăt kơtơ̆ng ang trŏ lăp, trŏ ƀlep hăm trong jang đơ̆ng Đảng, Khôi luơ̆t kơ Teh đak, sơđơ̆ng tơbăt, tôm tong, tơtom, tơgop pơtruh tôm tong, trŏ ƀlep găh ‘măng pơgơ̆r hop akoưm truh hăm bơngai tăh hla păng Kon pơlei lơ̆m teh đak.