Trong glung rĕnh Khánh Hòa – Buôn Ma Thuột yak găn hlŏh apŭng M’Drăk atăih 17km, kơ yuơ Hơnih vei lăng kon pơlei dêh char Khánh Hòa pơm tơ-‘ngla tơmơ̆t jên jang. Hơgăt teh kăl vă iŏk tơvih vă pơm trong au ‘nŏh 127 ha 1 sao kơ 143 ŭnh hnam kon pơlei. Lơ̆m au đei rim kơloăi teh găh hơgăt teh vă iŏk tơvih tơgum hrŭ ăn ‘nŏh teh pơbĭt iŏk pơtăm ‘long keo, teh găh 3 kơ loăi bri păng teh choh jang sa. Ƀok Nguyễn Đức Thảo - Kơ iĕng Kơdră chĕp pơgơ̆r Hơnih vei lăng kon pơlei apŭng M’Drăk tơbăt, truh khei năr au, bơ̆ jang iŏk tơvih teh ‘nao lăp jang đang hơmet ming pơprŏ, pơjing trong pơprŏ iŏk yua teh, hơnih mong răk tơmam drăm ming man, jang keh đang chă pơtŏ hơgăt teh, bơ̆ jang jô̆ hơlen dơnơm ‘long pơtăm păng iung jang tơbăt vă iŏk tơvih teh hăm rim bơngai, khul jang đei teh lơ̆m hơgăt teh vă iŏk tơvih. Hrei au oei tim mă pơjao đei hơgăt teh iŏk tơvih ayơ ăn rim hơnih jang ming man ‘mơ̆i. Ƀok Nguyễn Đức Thảo tơroi găh tơdrong jang iŏk tơvih teh vă ming man trong au: “Trong pơprŏ jang tơlĕch ăn ‘nŏh 30/6 kăl pơjao đang 70% hơgăt teh, mă lei truh khei năr au tơdrong chă pơjao teh ưh kơ ƀlep hăm trong tơlĕch hơdrol. Hrei au apŭng akŏm pơjing trong vă jang, tơbăt hơdăh rim trong vă jang vă tơroi tơbăt ăn rim hơnih, rim bơngai đei hơgăt teh đei ƀơm truh vă iung jang hrŭ ăn iŏk tơvih teh.”

Ƀok Trương Thanh Tâm - Kơ iĕng Kơdră chĕp pơgơ̆r Hơnih jang Atŏk tơ iung groi teh apŭng Mdrăk tơbăt, tơdrong tơm pơm ăn hiơ hiơ̆ iŏk tơvih teh ăn jang pơm trong gre rĕnh găn hloh apŭng ‘noh kơ yuơ tơhlăk tơhlĭn lơ̆m Tơdrong tơchơ̆t 10/2023 đơ̆ng Hơnih bơ̆ jang vei lăng kon pơlei dêh char Đak Lăk. Tơchơ̆t au tơbăt hơdăh, ‘long bri pơtăm akŏm lơ̆m hơgăt teh bri kơ kon pơlei kăl iŏk tơvih vă hơlen kơjă. Tơdrong pơjing pơlăp kơjă hrŭ ăn ‘nao lăp đei tơlĕch jang kiơ̆ lơ̆m năr 30/6, dang ei tim mă đei nơ̆r pơtho tơbăt hơdăh vă sơkơ̆t hơdăh tơm a la chă teh bơbĭt iok đơ̆ng kon pơlei, hơnih jang…Vă atŏk kơtang iung jang tĕnh koăng iŏk tơvih teh, ƀok Tâm akhan, Hơnih bơ̆ jang vei lăng kon pơlei dêh char Đăk Lăk kăl tĕnh koăng hơmet pơ ‘lơ̆ng rim trong jang mă trŏ lăp hloh. Ƀok Tâm tơbăt:“Apŭng hlôi apĭnh dêh char hơmet ming Tơdrong tơchơ̆t 10 kiơ̆ trong lăp đơ̆ng rŏng hrŭ, ăn kon pơlei gơ̆h koh tĕch dôm dơnơm ‘long lơ̆m hơgăt teh iŏk tơvih au. Kon jên hrŭ ăn lăp ‘moi kiơ̆ kon jên tơmơ̆t jang pơtăm ‘long bri, ưh kơ jô̆ truh tơdrong jang sa đei iŏk yua hơnô̆ hơnăp kơnh. Pơtho tơbăt hơdăh trong jang, xơkơ̆t hơdăh khei ‘năr iŏk yua teh vă pơm kơnăl ăn tơdrong chă hrŭ ăn kon pơlei, pơm kơnăl ăn hrŭ ăn iŏk tơvih teh.”

Tơ̆ apŭng Ea Kar, tơdrong vă jang pơm trong rĕnh Khánh Hòa- Buôn Ma Thuột găn hloh hơtăih hloh 13km 500 met. Jăl trong au găh trong vă jang lơ̆m tơnô̆ 2 păng 3. Hơgăt teh vă iŏk tơvih ‘nŏh 104 ha 4 sao. Truh dang ei, bơ̆ jang chă jô̆ hơlen hlôh keh đang, kĭ tơchơ̆t păng hrŭ ăn 13 trong vă jang hrŭ ăn hăm 69 ha 2 sao, hlôi pơjao teh đei 50ha 2 sao păng jơnei 48% pơtêng hăm trong vă jang, oei hiơ hiơ̆ pơtêng hăm trong tơlech hơdrol. Ƀok Chu Vĩnh Cường - Kơdră chĕp pơgơ̆r Hơnih jang Atŏk tơ iung groi teh apŭng Ea Kar tơbăt:“Mă blŭng, hăm tơdrong hrŭ ăn iŏk tơvih teh nhôn hlôi chă apĭnh athei Hơnih vei lăng kon pơlei dêh char hrôih kĭ twochơ̆t kơjă teh ‘nao hloh kơ Jơnŭm hơlen găh dôm hơnih đei hrŭ ăn. Mă 2, apinh athei dêh char hrôih lăng hơlen ăn kon pơlei iŏk yua dôm dơnơm ‘long bri kon pơlei pơtăm ‘noh lăp đơ̆ng rŏng iŏk kon jên hrŭ ăn iŏk tơvih teh ‘nŏh hrôih pơjao teh vă hơnih au pơjao ăn hơnih tơ-‘ngla tơmơ̆t jên jang hrôih tơlĕch iung jang ming man hloi.”   

Rim tơdrong tơnap tap tơhlăk tơhlĭn jei lei lăi dih băl ‘noh kơ yuơ đơ̆ng Tơdrong tơchơ̆t 10/2023 đơ̆ng Hơnih vei lăng kon pơlei dêh char Đak Lăk, tơdrong pơjing kơjă teh hrŭ ăn, hrŭ ăn iŏk tơvih teh hiơ hiơ̆, tim mă đei hla bơar pơtho tơbăt hơdăh găh xơkơ̆t hơdăh khei ‘năr, tơm a la chă iŏk yua teh, tơgŭm djru ‘long pơtăm jang sa ... Tơdrong hơmet ming tơchơ̆t, hơmet ming rim tơdrong tơhlăk tơhlĭn kăl đei iung jang tĕnh koăng, vă bơ̆ jang iŏk tơvih teh, pơjao teh ăn tơdrong vă jang ming man trŏ ƀlep hăm tơdrong tơchơ̆t.