Chă lăng mơ̆ng ‘măng apĭnh jet đơ̆ng Kơdră tang măt Kuô̆k hô̆i hăm ƀok Hầu A Lềnh, Ƀô̆ trương-Kơdră chĕp pơgơ̆r Hơnih bơ̆ jang vei lăng kon kông tơ̆ ‘măng hop akom mă 5 Kuô̆k hô̆i jăl XV, bơngai tăh hla lơ̆m teh đak hơlen, Ƀô̆ trương hlôi tơl hơdăh dôm tơdrong mă kơdră tang măt Kuô̆k hô̆i lăng truh, tơl hơdăh dôm tơdrong tim mă ƀlep, tim mă trŏ, tim mă hơdăh, tơlĕch trong jang vă hơmet pơ ‘lơ̆ng dôm tơdrong tim mă trŏ lăp lơ̆m dôm tơdrong jang mă kơdih chĕp pơgơ̆r.

Đei ƀơm truh tơdrong tơlĕch jang kiơ̆ Tơdrong jang tơm Teh đak “atŏk tơ iung mŭk drăm-tơpôl tơring kon kông păng groi kông”, bơngai tăh hla Trương Thế Vinh, kang ƀô̆ bơ̆ jang vei lăng kon kông tơ̆ apŭng Ia Grai, dêh char Gia Lai akhan, kang ƀô̆ tơring tŏk bŏk tơnap tap tơpă lơ̆m tơlĕch jang kiơ̆ Tơdrong jang. Bơngai tăh hla Trương Thế Vinh pơma:“Đei lơ hla bơar bơ̆ jang đơ̆ng dêh char pơtruh ăn tim mă tơtom pơtêng hăm tơlĕch jang Tơdrong jang, mă kăl tơ̆ tơring tim mă sơng iŏk đei nơ̆r pơtho tơbăt hơdăh. Mă kăl Tơdrong vă jang 1 tơgŭm ăn hnam oei, teh oei, teh jang sa kiơ̆ Tơdrong tơchơ̆t 4 đơ̆ng Thủ tướng Teh đak ‘noh tơgŭm djru teh oei hăm kon jên 44 triu hlak jên lơ̆m 1 ŭnh hnam păng teh choh jang sa 22 triu hlak jên lơ̆m 1 ŭnh hnam ‘nŏh tơnap mă tơlĕch jang kĕ. Teh choh jang sa kơ kon pơlei ‘nŏh kơjă tôch kơmăt, hăm kon jên tơgŭm djru dôm noh păng kon jên ăn tŏk iŏk lơ loh kon pơlei chă răt ưh kơ đei teh vă jang sa, vă pơm hnam ôh”

Ƀok Lâm Tấn Bình – bơngai tăh hla hơdrung Chăm oei tơ̆ tơring Phan Hiệp, apŭng Bắc Bình, dêh char Bình Thuận hơlen, lơ̆m ‘măng mă blŭng đei pơma dơnuh tơ̆ ‘măng Hop akŏm, Ƀô̆ trương hlôi tơl tơpăt, hơdăh rim tơdrong, mă kăl dôm tơdrong găh trong bơ̆ jang tơgŭm djru đơ̆ng Đảng păng Teh đak đei ƀơm truh hơnăp jang kơ Hơnih tơm păng tơdrong iung jang hơdoi hăm rim hơnih tơm, hơnih bơ̆ jang anai. Bơngai tăh hla Lâm Tấn Bình jei vang tơbăt jơhngơ̆m mơnat dôm tơdrong tơhlăk tơhlĭn, tơnap tap mă Ƀô̆ trương Hầu A Lềnh hlôi tơl hơdăh đei ƀơm truh trong bơ̆ jang, mă kăl ‘nŏh tơdrong tơlĕch kon jên tơmơ̆t jang atok tơ iung mŭk drăm-tơpôl ăn tơring kon kông păng groi kông:“Hăm hơnăp jang Ƀô̆ trương jei kăl tơlĕch trong jang ăn truh au kơnh lơ liơ vă kon pơlei hlôh vao păng sơng iŏk đei trong tơlĕch jang đơ̆ng Đảng păng Teh đak tơmơ̆t jên jang tơgăl păng trŏ ƀlep kiơ̆ tơdrong ‘meh vă lơ̆m erih sa kơ kon pơlei kon kông oei tơ̆ tơring groi kông mă hơdăh nhen Ƀô̆ trương hlôi sơkơ̆t hơdăh mưh hlôi pơma tơ̆ ‘măng apĭnh jet tơ̆ kơ sơ̆ ‘noh”.

Tơ̆ hơnăp Kuô̆k hô̆i, Kơ iĕng Thủ tướng Teh đak Trần Lưu Quang tơbăt: Truh đĭ khei 5/2023, kon jên jang kơ sơnăm 2022 ăn tơdrong jang au lăp jơnei 58% kon jên tơmơ̆t jang atŏk tơ iung, kon jên jang sơnăm 2023 lăp jơnei 17% kon jên tơmơ̆t jang atŏk tơ iung. Lơ̆m mă lăp pă 2 sơnăm 1 poăt vă jang kiơ̆ jăl jang mă 1 kơ tơdrong vă jang au, hloh dơ̆ng, lơ kon kông iŏk yua sa hơpăh hăm tơdrong jang au tŏk bŏk tơƀơ̆p tôch lơ tơdrong tơnap tap. Kơ iĕng Thủ tướng tơƀôh hơdăh dôm tơdrong tơhlăk tơhlĭn lơ̆m tơlĕch jang kiơ̆ tơdrong jang ‘nŏh kơ yuơ hla bơar pơjing ăn tôch kơ lơ kơna đei hơgrop dih băl, pơm tơnap tap ăn tơdrong tơlĕch kon jên jang trung ương. Kơ iĕng Thủ tướng pơma hơdăh, khei năr kơnh atŏk kơtang hơmet pơ ‘lơ̆ng, pơm pơkeh tơdrong tơchơ̆t kơjăp vă Tơdrong jang đei tơlĕch kon jên bơ̆ jang trŏ ƀlep hăm tơdrong ‘meh vă:“Tơdrong kăl hloh ‘noh bơ̆n atŏk kơtang pơjao gơ̆h jang ăn tơring vă rim kang ƀô̆ tơ̆ au pơ̆n tơlĕch jang dôm tơdrong mă đe sư ‘nŏh băt vă pơm lơ liơ mă trŏ ƀlep hloh. Nhôn jei gô kơrŭn đĭ jơhngơ̆m vă hơnơ̆ng xek tơlang dôm tơdrong jang mă nhôn băt gô đei ƀôh dôm tơdrong hle dơ̆ng, pơm lơ liơ xek tơlang keh đang tơdrong au ƀlep khei năr pơkă kiơ̆ ƀlep tơdrong tơchơ̆t păng ƀlep hăm tơdrong mă rim bơngai hơpơi ‘meh vă”.

Pơtôch apĭnh jet găh tơdrong kon kông, Kơdră chĕp pơgơ̆r Kuô̆k hô̆i Vương Đình Huệ hôn bơnê ‘măng apĭnh jet au đei pơgơ̆r ‘lơ̆ng, tơpăt dih băl. Tơƀôh hơdăh dôm tơdrong tim mă ‘lơ̆ng, tim mă trŏ lăp mă kăl hiơ hiơ̆ tơlĕch jang rim Tơdrong jang tơm Teh đak. Mĭnh ƀar pơtho tơbăt bơ̆ jang đei pơjing hiơ hiơ̆ dăh mă ưh kơ tôm tong, tim mă hơdăh, tim mă sơkơ̆t hơdăh, Kơdră chĕp pơgơ̆r Kuô̆k hô̆i athei lơ̆m khei năr kơnh tơlĕch jang kơtang hloh dơ̆ng rim trong bơ̆ jang vă iung jang kiơ̆ tôm tong, tơtom rim trong tơlĕch jang, trong pơchoh ăn kăl găh bơ̆ jang tơgŭm djru kon kông ăn jăl jang 2021-2030. Hơvơn rim khul vă tơmơ̆t jang atŏk tơ iung mŭk drăm-tơpôl tơring kon kông păng groi kông; lơ̆m au, akŏm lơ̆m tơring tơnap tap, khul kon pơlei oei tơnap tap păng tơnap tap hloh.