‘Nao âu, yă Trương Thị Mai, Kơdră jang lơ̆m Anih tơm Chinh trĭ, Kơdră chĕp kơ̆l Ban Bí thư, Kơdră Anih Pơgơ̆r Trung ương păng khul jang năm ngôi, hơpăh tơmam têt ăn công nhân, bơngai jang tơ̆ Tơring jang kơmăy Phú Hội, apŭng Đức Trọng, dêh char Lâm Đồng. Tơ̆ jơ năm ngôi, yă Trương Thị Mai tơchĕng ‘lơ̆ng hơnăp jang păng tơdrong adrin tŏk klăih đơ̆ng pơmat tat đơ̆ng khul kăn ƀô̆, công nhân, bơngai jang tơ̆ tơring jang kơmăy Phú Hội lơ̆m tơdrong jang xa, pơm tơlĕch tơmam. Vang tơgop pơm hơtŏk tơdrong jang tŏk ăn anih choh jang xa kơ dêh char pơma hơdrô̆, lơ̆m teh đak pơma atŭm tŏk pran hlŏh lơ̆m 10 sơnăm âu ki. Tơmam ‘nhot, ƀum, plei ‘long đơ̆ng Lâm Đồng dang ei hlôi đei tĕch truh tơ̆ lơ teh đak lơ̆m apŭng plenh teh. Atŭm hăm ‘nŏh, yă Trương Thị Mai oei athei dôm tơring jang kơmăy, khul kơdră pơgơ̆r tơ̆ dêh char Lâm Đồng hơnơ̆ng tơgŭm, vei lăng năng tông tơdrong arih xa ăn bơngai jang tơ̆ dôm tơring jang kơmăy, mă loi jăh pơm pơkĕh Hnam oei tơpôl ăn đe công nhân. Ƀlep ƀât ‘măng mă âu, yă Trương Thị Mai hơpăh tơmam têt ăn tơring jang kơmăy Phú Hội; hơpăh 200 tơpu tơmam ăn công nhân, bơngai jang tơ̆ tơring jang kơmăy, 1 tơpu tơmam đei kơjă 1,3 triu hlak jên.

Tơ̆ plt Kon Tum, Phó Thủ tướng Trần Hồng Hà kŭm hăm Khul jang kơ Trung ương truh hăm tơdrong jang “Têt hơdai- Pơyan Puih mak tơgŭm băl” yoa Liên đoàn Lao động păng Anih MTTQ Việt Nam dêh char Kon Tum pơgơ̆r. Pơma tơ̆ “Têt hơdai- Pơyan Puih mak tơgŭm băl” ‘măn ăn đe công nhân bơngai jang păng unh hnam đei tơdrong arih xa pơmat tat kơ dêh char Kon Tum, Phó Thủ tướng Trần Hồng Hà pơtruh nơ̆r jet gia, pơma nuh đơ̆ng Tổng Bí thư Nguyễn Phú Trọng; dôm kơdră chĕp kơ̆l Đảng, teh đak păng jơhngâm đon ‘mêm băt đơ̆ng kơdih truh hăm đe kăn ƀô̆, đĭ đăng kon pơlei hăm nơ̆r hmach thơ thou sơnăm ‘nao ‘lơ̆ng hơiă hlŏh. Hmach thơ thou ăn rim bơngai, rim unh hnam đei 1 pơyan têt phĭ tơtŏ dơnŏ ‘lơ̆ng, hiôk chơt, 1 sơnăm ‘nao sơđơ̆ng ‘lơ̆ng păng hơnŭk hơnoa. Phó Thủ tướng pôk pơ ư dêh char Kon Tum hơnơ̆ng pơngơ̆t đe công nhân păng dôm unh hnam pơmat tat ƀât pơyan Puih mak vih, têt truh, atŭm hăm ‘nŏh athei dêh char hơnơ̆ng ‘măn tơdrong tơgŭm vă dôm bơngai đei tơdrong arih xa pơmat tat gơ̆h jang tŏk, klăih đơ̆ng tơnuh hin kơjăp 'lơ̆ng:

“Anih chĕp kơ̆l đảng, khul kơdră pơgơ̆r dêh char Kon Tum hơnơ̆ng pơngơ̆t, đei lơ tơdrong tơgŭm ăn unh hnam tơnuh, unh hnam vă jê̆ tơnuh păng pơm ‘lơ̆ng ăn tơdrong jang tŏk klăih đơ̆ng tơnuh hin kơjăp ‘lơ̆ng. Hơtŏk đon hlôh vao, bơ̆ jang gơ̆h, chă dơ̆ng tơdrong jang xa ăn bơngai tơnuh, vă jê̆ tơnuh vă gơ̆h jang tŏk lơ̆m tơdrong arih xa. Tơrek truh tĕh vă pơm hnam lơ̆m tơpôl, tơplŏng kơdâu, dôm anih pơyoa ăn công nhân tơ̆ dôm tơring jang kơmăy. Hơmet kơjăp khul pơgơ̆r jang, hơtŏk đei yoa mưh bơ̆ jang đơ̆ng Liên đoàn Lao động”.

Tơroi găh tơdrong jang mŭk drăm, tơpôl kơ teh đak, Phó Thủ tướng Trần Hồng Hà pơma hơdăh, teh đak hlôi yak hlŏh sơnăm 2023 ƀĕnh tơdrong pơmat tat, hăm kơsô̆ jang tŏk mŭk drăm hlŏh 5,05%, găh grŭp jang tŏk pran tơ̆ tơring păng lơ̆m apŭng plenh teh. Chep vei kơjăp tơdrong juăt ‘mêm băl, tơgŭm băl đơ̆ng hơdrĕch hơdrung păng jơhngâm đon ‘lơ̆ng đơ̆ng chăl chĕp kơ̆l pơgơ̆r bơ̆n, Đảng păng teh đak ling lang tơrĕk truh tơdrong arih xa kơ kon pơlei, truh tơdrong jang sut pơđĭ pơngot, tơjur tơnuh hin, năng ‘nâu jĭ tơdrong gĭt kăl hlŏh, tơdrong jang tơm hlŏh, lơ̆m trong jang tŏk hrĕnh păng pran kơjăp kơ teh đak. Ƀlep ƀât ‘măng mă âu Phó Thủ tướng Trần Hồng Hà kŭm hăm kơdră chĕp kơ̆l dêh char Kon Tum hơpăh tơmam Têt ăn 200 ‘nu công nhân, bơngai jang păng 50 unh hnam đei tơdrong arih xa pơmat tat, 1 tơpu tơmam đei kơjă 1 triu 300 rơbâu hlak jên.

Adrol kơ ‘nŏh, Phŏ Kơdră teh đak Võ Thị Ánh Xuân kŭm hăm khul jang đơ̆ng Trung ương năm ngôi, hơpăh tơmam ăn dôm unh hnam đei kŏng, công nhân pơmat tat tơ̆ apŭng Vũ Thư, dêh char Thái Bình. Truh ngôi, pơlung, hơpăh tơmam ăn công nhân đei tơdrong arih xa pơmat tat tơ̆ Công ty Bảo Hưng, Phŏ Kơdră teh đak Võ Thị Ánh Xuân akhan, sơnăm 2023 hăm tơdrong chĕp kơ̆l pơgơ̆r đơ̆ng Đảng, tơdrong adrin đơ̆ng rim anih jang chinh trĭ kŭm hăm tơdrong tơgop đơ̆ng đĭ đăng kon pơlei, anih tĕch mơdro, teh đak bơ̆n hlôi jang đei lơ tơdrong jơnei gĭt kăl găh rim tơdrong.

Pơma hơdăh, Đảng, Teh đak ling lang tơtăm, pơngơ̆t ăn, pơm hơtŏk tơdrong arih xa găh tơmam drăm, jơhngâm đon ăn kon pơlei, lơ̆m nŏh đei công nhân, bơngai jang. Phŏ Kơdră teh đak tơchĕng ‘lơ̆ng dêh char Thái Bình sơnăm âu ki iŏk đei lơ tơdrong ‘lơ̆ng mưh jang atŏk tơiung mŭk drăm, tơpôl; pơma hơdăh lơ̆m tơdrong jơnei atŭm ‘noh đei tơdrong vang tơgop tôch ‘lơ̆ng đơ̆ng khul công nhân tơ̆ dôm anih tĕch mơdro lơ̆m dêh char pơma atŭm păng tơ̆ Công ty Bảo Hưng pơma hơdrô̆. Phŏ Kơdră teh đak athei dêh char Thái Bình năng kăl tơdrong hơmet têt ăn kon pơlei, mă loi ‘noh hơlen năng dôm unh hnam tơnuh, công nhân, bơngai jang đei tơdrong arih xa pơmat tat vă kơchăng tơgŭm, ưh đei hŭt hơchăng bu tơ̆ rŏng.