Tơchĕng hơlau trong jang hơmet ming dang 33 bro groi teh apŭng păng 1.327 bro groi teh tơring lơ̆m jăl jang au.

Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ athei hơnơ̆ng pơm pơkeh Tơdrong tơchơ̆t vă kĭ tơlĕch jang kiơ̆, lơ̆m au lăng kơjăp, lăng hơlen mă hơdăh rim tơdrong joăt joe sơ̆ ki lơ̆m chăr sơnăm, tơdrong oei sa joh ayŏ, hơdrĕch hơdrung, lui khop, tơdrong joăt; adoi sơkơ̆t hơdăh tơdrong pơkăp bro groi teh đơ̆ng rŏng hơmet ming. Tơdrong tơchơ̆t đơ̆ng Hơnih chĕp pơgơ̆r Kuô̆k hô̆i găh tơdrong hơmet ming bro groi teh apŭng, tơring jăl jang 2023 – 2030 hơdrin truh sơnăm 2030, rim bro groi teh apŭng, tơring đei hơmet ming trŏ lăp hăm trong atŏk tơ iung mŭk drăm-tơpôl; trŏ lăp hăm tơdrong ‘meh vă tơ iung pơjing teh đak bơ̆n jing teh đak jang kmăi kmŏk hơgei, kiơ̆ trong xã hội chủ nghĩa.