‘Măng hơpĭnh jet đei pơgơ̆r chă hơpĭnh tôch tơpăt găh tơdrong pơtruh ŭnh hơyuh ăn choh jang sa păng iok yua lơ̆m ŭnh hnam. Bơngai tang măt Phạm Văn Hòa, khul Đồng Tháp akhan, tơdrong tơchơ̆t kơjă nhen hrei ou tim mă trŏ lăp hăm ‘meh vă kơ kon pơlei, mă kăl ‘noh găh thuê̆ 10% VAT. Bơngai tang măt athei Kơdră chĕp pơgơ̆r Hơnih tơm vei lăng Mơdro sa tơblang hơdăh găh tơdrong ou? Kơdră dơnơm Nguyễn Hồng Diên akhan: "Hơnih tơm vei lăng Mơdro sa hlôi pơm tơm hơmet ming, tơmơ̆t dơ̆ng Tơdrong tơchơ̆t 28. Kiơ̆ kơ ‘noh, lơ̆m trong vă pơjing pơtruh ăn Khul kơdră chĕp pơgơ̆r Teh đak pơgê ou ‘noh tơjur đơ̆ng 6 kơnao jur pă 5 kơnao. Lơ loh. Kơ ‘nao mă blŭng pơm hơtŏk đơ̆ng 0-50kwh truh 0 truh 100kwh. Lơ loh nơ̆r chă apthei đơ̆ng bơngai tang măt Phạm Văn Hòa hlôi đei tơgoăt iŏk păng hlôi pơtruh ăn Khul kơdră Teh đak, ƀlep nhen bơngai tang măt hơpơi ‘meh vă".

Tơl nơ̆r bơngai tang măt Dương Khắc Mai, khul Dak Nông hơpĭnh găh tơdrong ŭnh hơyuh păng tơplih ‘nao trong jang ŭnh hơyuh hle, Kơdră chĕp pơgơ̆r Nguyễn Hồng Diên pơma: "Việt Nam đei rơvơn pơjing ŭnh hơyuh, ŭnh hơyuh kial, jơng ‘năr. Kơ yuơ đei dôm tơring kial jăng, tŏ phang pơđang. Mă lei, lơ̆m tơdrong hlôh vao kih thuơ̆t nhen hrei ou kơ Việt Nam ưh kơ gơ̆h vă pơm hơtŏk kơtang ŭnh hơyuh đơ̆ng dôm tơdrong ou hloh tơdrong kĕ jang păng kon jên hu tơmơ̆t jang kơ Việt Nam. Kơ yuơ ŭnh hơyuh ou tôch kơtang kơna gô pơm ăn truh ưh sơđơ̆ng tơlei ŭnh hơyuh. Găh kih thuơ̆t bơ̆n gơ̆h iung jang tơdăh tơmơ̆t jên jang tơ iung pơjing hơnih mong răk ŭnh hơyuh; tơmơ̆t jên jang lơ̆m dăng tơlei ŭnh hơyuh, mă kăl tơlei ŭnh hơyuh gơ̆h hơgei”.

Hơpĭnh hơlen Kơdră chĕp pơgơ̆r Hơnih tơm vei lăng Choh jang sa păng Atŏk tơ iung tơring tơrang Lê Minh Hoan găh tơdrong tơ̆ Lâm Đồng lăp đơ̆ng rŏng ƀet pơgang vaccine bơ̆ng jĭ pơ-‘ngeh hơkar hlôi đei 6.631 tŏ rơmo iŏk đak tŏh jĭ hê̆ jĭ klak chroh păng 357 tŏ rơmo lôch, bơngai tang măt Trịnh Tú Anh, khul Lâm Đồng athei:"Hơpĭnh Kơdră dơnơm tơroi mă hơdăh găh trong jang pơm tơlĕch vaccine bơ̆ng jĭ pơ-‘ngeh hơkar păng tơdrong hơlen ‘lơ̆ng kơ vaccine ou hăm rơmo iŏk đak toh. Hăm găh tơdrong hiong răm đei ƀôh ‘noh kăl hrôih tơchơ̆t hơdăh hơnăp jang păng tơlĕch trong jang tơgum djru ăn kon pơlei hiong răm ‘noh, vă tơdrong hơrih sa kơ kon pơlei sơđơ̆ng".

Kiơ̆ đơ̆ng ƀok Lê Minh Hoan, dang ei, Hơnih tơm akŏm đĭ đăng Khul jang pơgang vei lăng kon tơrong tơring Pơbăh păng rim bơngai joăt jang rim năr oei tơ̆ tơring vă lăng hơlen, ming hơmet jĭ ăn rơmo: "Đĭ đei hiong răm ‘noh jei kăl đei trong tơgŭm djru. Nhôn gô iung jang hơdoi hăm Lâm Đồng hơlen mă brĕ, hơmet ăn trong jang vă trŏ lăp ăn kon pơlei pơla bơ̆n. Nhôn hlôi pơrô̆ kiơ̆ ƀar trong jang nhen tơ̆ hơla ou: Mă mĭnh ‘noh, tŏk bŏk dăr lăng, lăng hơlen, hơlen hơdăh trong pơm tơlĕch, hơpĭnh drơ̆ng nơ̆r tĕch tơlech, ƀet bơ̆ng pơgang vaccine ou. Vă sơkơ̆t hơdăh tuch luch tơdrong tơm pơm ăn đei tơdrong ‘nou ‘noh kơ yuơ ƀơ̆t yơ, bơ̆n pơchoh trong ƀôh hơdăh ăn rim hơnih mơdro sa păng truh hloi rim hơnih bơ̆ jang teh đak Trung ương truh tơ̆ tơring, ưh kơ lê̆ đei tơdrong kơnê̆ lơ lou dơ̆ng."

Trong jang pơm hơtŏk kơjă tơmam drăm choh jang sa, pơm tơgop sơđơ̆ng tĕch mơdro tơ̆ teh đak đe, hơnhăk đei iŏk yua kơjăp ăn kon pơlei đei lơ kơdră tang măt lăng kơjăp. Kơdră dơnơm Lê Minh Hoan akhan, vă atŏk tơ iung hơnăn tơmam drăm kăl đei Tơdrong tơchơ̆t đơ̆ng Kuô̆k hô̆i vă pơjao ăn Khul kơdră chĕp pơgơ̆r Teh đak pơjing tơlĕch Tơdrong tơchơ̆t găh hơnăn tơmam drăm păng kăl đei dôm tơring pơtăm să pơjing đei tơmam drăm choh jang sa lei lăi găh tơdrong ‘lơ̆ng: " ‘Meh vă lơ loh, bơ̆n kăl đei tơring pơtăm akŏm să, sơkơ̆t hơdăh tơdrong ‘lơ̆ng đĭ đăng tơmam drăm choh jang sa tơm iŏk đei ƀlep pơkăp ‘lơ̆ng hơnăn tơmam drăm teh đak. Mă pêng ‘noh atŭm hăm rim khul jang sa pơjing đei trong tơchơ̆t vă vei lăng năng tông tơmam drăm choh jang sa Việt Nam bơ̆n lơ̆m hơnih tĕch mơdro tơ̆ teh đak đe. Hơnih tơm vei lăng Choh jang sa păng Atŏk tơiung tơring tơrang atŭm hăm Hơnih tơm vei lăng Mơdro sa tŏk bŏk chă hơpĭnh Thủ tướng Teh đak pơjing Khul hơlen phe ƀa teh đak. Đơ̆ng rŏng ‘noh nhôn jei hơnơ̆ng chă tơchĕng hơlen rim tơmam drăm choh jang sa tơm nhen sâu riêng, chehphe, tiu..."

Pơtôch ‘măng hơpĭnh păng tơl nơ̆r hơpĭnh lơm 3 tơdrong jang: Choh jang sa păng atŏk tơ iung tơring tơrang; mơdro sa; joh ayŏ kơdŏ soang, đă ƀŏng lŏng tơplŏng kơdou păng tơmang pơhiơ̆, Kơ iĕng Kơdră chĕp pơgơ̆r Kuôk hô̆i Nguyễn Đức Hải sơkơ̆t hơdăh: ‘măng hơpĭnh đei pơgơ̆r ‘lơ̆ng hơ iă, pơma tơpăt păng ‘lơ̆ng hơ iă. Hơnih bơ̆ jang Kuô̆k hô̆i hôn bơnê kơtang rim Kơdră dơnơm, Kơdră chĕp pơgơ̆r Hơnih jang hlôi hơmet ‘lơ̆ng dôm tơdrong, tơl hơdăh rim tơdrong mă bơngai tang măt Kuô̆k hô̆i chă hơpĭnh; tơblang hơdăh tôm tong găh rim tơdrong tim mă lăp, tim mă ‘lơ̆ng. Adoi, hôn bơnê dôm tơdrong hơdrin đơ̆ng rim Kơdră dơnơm lơ̆m tơdrong tơlĕch jang kiơ̆ rim tơdrong tơchơ̆t đơ̆ng Hơnih bơ̆ jang Kuô̆k hô̆i păng tơlĕch rim trong jang hơmet pơ ‘lơ̆ng dôm tơdrong tim mă lăp găh kơ dih chĕp pơgơ̆r.