Đơ̆ng rŏng lơ ‘măng ming hơmet, truh dang ei tơdrong kăl lơ̆m trong vă pơjing Khôi luơ̆t groi teh (hơmet ming) hlôi tơchơ̆t hơdăh găh trong tơgŭm djru groi teh ăn kon kông. Kiơ̆ kơ ‘noh, tơchơ̆t hơdăh trong jang pơjao teh, ăn mơng teh oei, teh chŏh jang sa ăn kon kông găh ŭnh hnam dơnuh lơ̆m tơring tơnap tap hloh vă sơđơ̆ng tơdrong hơrih sa.

Hăm trong jang pơjao teh oei, teh jang sa, trong vă pơjing Khôi luơ̆t sơkơ̆t hơdăh pơjao teh, ăn mơng teh ‘măng mă blŭng păng hơnơ̆ng pơjao teh, ăn mơng teh ăn kon kông pă đei teh dăh mă ưh kơ măh teh jang sa pơtêng hăm tơdrong pơkăp lăp đơ̆ng rŏng hlôi đei pơjao ăn teh, ăn mơng teh. Trong vă pơjing Khôi luơ̆t jei hơmet ming trong tơchơ̆t găh dôm bơngai pơm kiơ̆ pơm tơ-‘ngla teh. Kiơ̆ kơ ‘nŏh, bơngai kon kông gơ̆h pôk ăn kon hơ ‘lơ̆p, kôn mon kon sau lơ̆m ŭnh hnam hơnơ̆ng iŏk yua jang sa teh đei pơjao, ăn mơng. Adoi tơmơ̆t dơ̆ng tơdrong tơchơ̆t găh iŏk tơvih teh vă jang rim tơdrong vă jang pơ prŏ ăn teh oei, teh jang sa ăn kon pơlei kon kông.