‘Nau jing tơdrong jang lăng truh Khei iung jang kơ yuơ hơ ioh sơnăm 2023 hăm hơnăn “Vang iung jang pơm dă ƀiơ̆ đei ƀơm kơnê̆ hăm hơ ioh”. Khei năr au ki, Đảng, Teh đak Việt Nam păng pơđĭ khul chinh trĭ hlôi iung jang kơtang vă vei lăng năng tông ‘lơ̆ng hơ iă ăn hơ iŏh lơ̆m Internet.

Tơdrong tơchơt khôi luơ̆t găh vei lăng năng tông hơ iŏh lơ̆m mạng đei Việt Nam pơjing, pơjing đei tơdrong pơkăp kăl nhen: Khôi luơ̆t Hơ ioh, Khôi luơ̆t sơđơ̆ng kơtơ̆ng ang mạng, Khôi luơ̆t mơ̆t lăng mạng. Khul kơdră chĕp pơgơ̆r Teh đak, Thủ tướng Teh đak hlôi pơjing mĭnh ƀar hlabơar tơchơt kăl vă vei lăng năng tông đe hơ iŏh lơ̆m mạng. Lơ̆m au, Thủ tướng Teh đak hlôi kĭ tơchơ̆t Tơdrong jang teh đak kơ yuơ hơ iŏh jăl jang 2021-2030; păng Tơdrong jang “Vei lăng năng tông păng tơgŭm djru hơ ioh chă plôih lăng, chă tơchăr ‘lơ̆ng hơ iă lơ̆m mạng jăl sơnăm 2021 – 2025.