‘Năr 6/12, Kơdră chĕp kơ̆l Công an dêh char Dak Nông truh pơlung, hơpăh tơmam ăn đe kăn ƀô̆, linh tơ̆ Anih vei sơđơ̆ng mang păng tang găn tơdrong pơm yoch hăm kơmăy kơmŏk ‘nao kŭm hăm Công an 2 apŭng Đak R’lấp păng Đak Glong, 1 anih đei hơpăh 5 triu hlak jên, yoa jang đei jơnei ‘lơ̆ng lơ̆m tơdrong tang găn, phă hŭt 3 tơdrong pơm ƀĕng ƀŏng kiơ̆ trong đăk jên kă đô̆ đe đă ƀŏng lŏng. Adrol kơ ‘nŏh, dôm anih Công an dêh char đei Bí thư đảng dêh char Đăk Nông hơpăh 120 triu hlak jên đơ̆ng rŏng kơphă đei đe kă đô̆ đă ƀŏng lŏng, hăm kơsô̆ jên đăk vă jê̆ 600 ti.

Bơ̆ jang khei tơm tang găn, phă hŭt tơdrong yoch, vei sơđơ̆ng ƀât Tết Nguyên đán Qúy Mão 2023, mă loi lơ̆m khei đă World Cup, Công an dêh char Dak Nông hlôi phă đei tơdrong pơm ƀĕng ƀŏng kiơ̆ trong đăk jên kă đô̆ đe đă ƀŏng lŏng hăm Internet tih hlŏh đơ̆ng sơ̆ truh dang ei tơ̆ dêh char ‘nâu. Công an Dak Nông rôp vei 17 ‘nu, thu iŏk 04 tŏ kơmăy tinh chĕp ti, lơ kơsô̆ tài khoản tơ̆ anih mong jên, điên thoăi, gre ôtô…, blŭng a hlôi chih hơdăh kơsô̆ jên đăk vă jê̆ truh 600 ti. Kăl pơma ‘nŏh lơ̆m kơsô̆ dôm bơngai đei rôp vei đei Lương Ngọc Thành – bơngai juăt jang tơ̆ Anih vei lăng tơmam drăm, cham char dêh char Dak Nông, păng Nguyễn Ngọc Trung – Bơngai juăt jang tơ̆ Anih jang khoa hŏk, kơmăy kơmŏk dêh char Dak Nông. Lơ̆m nŏh, Lương Ngọc Thành (rơnĕh sơnăm 1993) đei năng jĭ 1 lơ̆m dôm ‘nu bơngai chĕp kơ̆l, pơgơ̆r vei lăng tơdrong kă đô̆ đe đă ƀŏng long, hăm kơsô̆ jên đăk vă truh 600 ti âu.