Vang năm hop akŏm đei kơdră tang măt ăn rim hơnih tơm, hơnih bơ̆ jang , Trung ương; Bí thư Đảng dêh char, Kơdră chĕp pơgơ̆r Hơnih bơ̆ jang vei lăng kon pơlei 5 dêh char tơring Tây Nguyên (Đak Lak, Gia Lai, Kon Tum, Lâm Đồng, Đak Nông) păng 9 dêh char tơjê̆ (Quảng Nam, Quảng Ngãi, Bình Định, Phú Yên, Khánh Hòa, Ninh Thuận, Bình Thuận, Đồng Nai, Bình Phước).

Iung pơma pơgơ̆r blŭng a hop akŏm. Kơ iĕng Thủ tướng teh đak Trần Lưu Quang pơma hơdăh: Mŭk drăm-tơpôl tơring Tây Nguyên atŏk tơ iung hơ iă; tơdrong oei sa joh ayŏ rim hơdrung đei vei răk păng jang kiơ̆; trong jang kon pơlei vang vei lăng sơđơ̆ng teh đak, sơđơ̆ng tơring, jơhngơ̆m đon lui kiơ̆ đei hơmet pơ ‘lơ̆ng; sơđơ̆ng tơpôl đei vei lăng kơjăp.

Mă lei, atŏk tơ iung mŭk drăm-tơpôl tơring Tây Nguyên oei tim mă tơgăl hăm hơnih dơ̆ng, hơnăp jang, tơdrong đei, tơdrong rơvơn kơ tơring. Vă atŏk tơ iung kơjăp ‘lơ̆ng tơring Tây Nguyên, kon  pơlei đei tơdrong hơrih sa phĭ tơtŏ dơnŏ ‘lơ̆ng, hơnŭk hơnoa, hơmet pơ ‘lơ̆ng sơđơ̆ng dơ̆ng kơjăp, sơđơ̆ng teh đak kiơ̆ ƀlep trong tơlĕch ăn, nơ̆r athei iung jang đơ̆ng Tơdrong tơchơ̆t kơsô̆ 23-NQ/TW đơ̆ng Hơnih tơm Chinh trĭ, Thủ tướng teh đak hlôi tơchơ̆t tơlĕch ăn Tơdrong vă jang atŏk tơ iung mŭk drăm-tơpôl tơklep hăm vei lăng sơđơ̆ng tơring, sơđơ̆ng teh đak lơ̆m tơring Tây Nguyên.

Tơdrong jang tơm kơ Tơdrong vă jang atŏk tơ iung mŭk drăm-tơpôl tơklep hăm vei lăng sơđơ̆ng tơring, sơđơ̆ng teh đak lơ̆m tơring Tây Nguyên ‘noh atŏk iŏk jơnei atŏk tơ iung mŭk drăm-tơpôl tơklep hăm vei lăng sơđơ̆ng tơring, sơđơ̆ng teh đak lơ̆m tơring Tây Nguyên lơ̆m khei năr kơnh. ‘Moi kiơ̆ trong ‘noh, rim kơdră tang măt akŏm chă pơma dơnuh trong vă jang vă tơlĕch jang kiơ̆, hrôih hơnhăk Tơdrong tơchơ̆t kơsô̆ 23-NQ/TW păng Tơdrong vă jang mơ̆t lơ̆m hơrih sa, tơgop atŏk tơ iung tơring Tây Nguyên kơjăp iăp kơtang, vei lăng sơđơ̆ng dơ̆ng kơjăp.

Tơ̆ Hop akŏm, Đại tướng Tô Lâm sơkơ̆t hơdăh: Đảng, Teh đak ling lang lăng ba kơjăp găh rim tơdrong păng hlôi pơjing đei tơdrong tơchơ̆t, nơ̆r pơma pơtôch vă atŏk tơ iung tơring Tây Nguyên. Tơdrong tơm tơjê̆ au ‘nŏh, Tơdrong tơchơ̆t kơsô̆ 23-NQ/TW đơ̆ng Hơnih tơm Chinh trĭ găh “Trong vă atŏk tơ iung mŭk drăm-tơpôl tơklep hăm vei lăng sơơ̆ng tơring, sơđơ̆ng teh đak lơ̆m tơring Tây Nguyên truh sơnăm 2030, lăng truh sơnăm 2045” păng Tơdrong vă jang atŏk tơ iung mŭk drăm-tơpôl tơklep hăm vei lăng sơđơ̆ng tơring, sơđơ̆ng teh đak lơ̆m tơring Tây Nguyên đơ̆ng Khul kơdră Teh đak.

Đại tướng Tô Lâm athei rim Hơnih jang, hơnih tơm, tơring drơ̆ng mĭnh nơ̆r, lăp đon, iung jang kơtang, jang mă keh đang rim trong pơrô̆ jang; akŏm rim trong jang, tơdrong hơdrin jang kiơ̆ jơnei rim trong tơlĕch jang vă jang kiơ̆ rim trong tơlĕch jang hơdăh lơ̆m Tơdrong vă jang hlôi tơlĕch ăn hăm trong “5 iung jang kơtang”. Mă hơdăh, iung jang kơtang hơmet pơ ‘lơ̆ng tơnap tap, tơhlăk tơhlĭn; kơrŭn đĭ jơhngơ̆m jang keh đang, tơlĕch jang kiơ̆ jơnei rim trong jang kăl hăm tơring Tây Nguyên; atŏk kơtang pơtrŭt tơlĕch jang kơtang, iung jang dôm tơdrong đei, jang kiơ̆ dôm tơdrong oei sa joăt joe sơ̆ ki, chăl sơnăm, kon bơngai kơ tơring Tây Nguyên, jơhngơ̆m đon nuih mơng pran kơtang nhen jơhngơ̆m đon Dăm Săn sơ̆ ki jing jơhngơ̆m pran ăn atŏk tơ iung mŭk drăm, jŏh ayŏ, tơpôl, atŏk kơtang tơdrong hơrih sa ‘lơ̆ng kơ kon pơlei rim hơdrung tơring Tây Nguyên, “ưh kơ lê̆ bơngai bu hơchăng hŭt tơ̆ rŏng”; xek tơlang kơtang đơ̆ng hrôih, đơ̆ng hơtăih, đơ̆ng tơring dôm tơdrong ưh sơđơ̆ng, ‘nĕ lê̆ ưh kơ tom băt; iung jang kơtang hơmet pơ ‘lơ̆ng khul jang chinh trĭ tơring pran kơjăp iăp kơtang, trŏ lăp hăm tơdrong athei, trong jang; atŏk kơtang hơnăp jang kơ kang ƀô̆ lơ̆m bơ̆ jang, trŏ ƀlep hăm trong chĕp pơgơ̆r đơ̆ng Tổng Bí thư Nguyễn Phú Trọng, Thủ tướng Teh đak Phạm Minh Chính ‘noh “Bơngai bu ưh kơ pơ̆n jang, bơngai bu jang ưh kơ kĕ ‘noh dăh veh ăn bơngai nai jang”.

Đại tướng Tô Lâm pơma hơdăh: athei khul kơdră đảng, kơdră chĕp pơgơ̆r rim dêh char tơjê̆ iung jang hơdoi kơjăp hăm rim dêh char tơring Tây Nguyên lơ̆m tơlĕch jang kiơ̆ Tơdrong vă jang đơ̆ng Khul kơdră Teh đak, atŏk kơtang jang hơdoi, tơgoăt dih băl iung jang atŏk tơ iung tơmang pơhiơ̆, trong nơnăm, hơvơn tơmơ̆t jên jang, iung jang jơnei dôm tơdrong cham char-kon jên hu-bơngai jang, tơdrong hơ iă kơ Tây Nguyên. Đơ̆ng đunh đai tai sơnăm, tơdrong joăt joe nuih mơng, pran kơtang lơ̆m tơblăh vang păng pran kơtang, tơchăr atŏk tơ iung hơdrin lơ̆m tơplih ‘nao, jơhngơ̆m đon tơgoăt tơgoăl, mĭnh jơhngơ̆m đon kiơ̆ Đảng, kiơ̆ Ƀok Hô kơ kon pơlei rim hơdrung Tây Nguyên, Đại tướng Tô Lâm lui akhan: Đảng ƀô̆, kơdră chĕp pơgơ̆r, khul ƀô̆ đô̆i kŏng ang păng kon pơlei rim dêh char Tây Nguyên gô yak hloh rim tơdrong tơnap tap, tơdrong long, jang kiơ̆ jơnei tơdrong jang atŏk tơ iung mŭk drăm-tơpôl, sơđơ̆ng tơring, sơđơ̆ng teh đak, hrôih ba Tây Nguyên atŏk tơ iung pran kơtang, tôm tong păng kơjăp ‘lơ̆ng.