Hop akŏm drơ̆ng nơ̆r akhan, Tây Nguyên jĭ tơring tôch gĭt kăl găh tơdrong vei sơđơ̆ng tĕh đak; hơnơ̆ng đei lơ tơdrong krê găh tơdrong sơđơ̆ng; oei tơdrong sơđơ̆ng ‘nŏh jĭ tơdrong tôch gĭt vă vei lăng kơjăp ‘lơ̆ng tơdrong sơđơ̆ng lơ̆m tĕh đak. Jang atŏk tơiung mŭk drăm, jŏh ayŏ kơ dŏ xoang, tơpôl, vei lăng kơjăp ‘lơ̆ng tơdrong sơđơ̆ng tĕh đak, jang tơbôl ‘nŏh jĭ trong jang kăl hlŏh vă vei kơjăp tơdrong sơđơ̆ng ‘lơ̆ng tơ̆ Tây Nguyên.

Pơma nơ̆r pơtho tơ̆ hop akŏm, Kơdră chĕp kơ̆l Ban Bí thư Trương Thị Mai pơma hơdăh, tơdrong ưh đei sơđơ̆ng đei lơ̆m ‘năr 11/6 âu ki ƀơm truh tơdrong arih xa kơ kon pơlei kon kông tơ̆ Dak Lak păng dôm dêh char Tây Nguyên. Kơdră chĕp kơ̆l Đảng, Tĕh đak athei tơrĕk, chĕp kơ̆l pơgơ̆r mă ‘lơ̆ng tơdrong jang atŏk tơiung mŭk drăm, tơpôl, vei lăng kơjăp ‘lơ̆ng tơdrong sơđơ̆ng tơ̆ tơring Tây Nguyên.