Dêh char Dak Lăk đei 49 hơdrĕch hơdrung vang hơrih sa, măt bơngai kon pơlei đei 2 triu ‘nu, lơ̆m ou bơngai kon kông tơmơ̆t 34%. Jăl jang 2021-2025, dêh char Dak Lăk đei Trung ương klăh asong vă jê̆ 5.600 ti hlak jên, dêh char hlôi hơmet ăn hloh 1.400 ti hlak jên ăn iung jang 3 Tơdrong jang tơm Teh đak. Kon jên tơmơ̆t jang kăl ou hlôi pơm tơplih hơ iă ăn tơring kon kông, trong nơnăm đei ming man ‘lơ̆ng, tơdrong hơrih sa, jang sa kơ kon pơlei roi sơđơ̆ng, ŭnh hnam dơnuh roi năr roi tŏ sĕt. Hop akŏm Bơngai tang măt kon kông dêh char Dak Lăk ‘măng mă IV tơlĕch rim trong vă jang kăl ‘noh: sơnăm 2029, atŏk jang sa iŏk đei jô̆ hơtŏ măt bơngai kon kông iŏk đei lơ hloh 1,5-2 ‘măng pơtêng hăm dang ei, ŭnh hnam dơnuh tơring kon kông tơjur đơ̆ng 3-4% lơ̆m sơnăm, hơdrin truh sơnăm 2030 pă đei apŭng dơnuh, tơring tơnap tap.