Rim nơ̆r pơma tơ̆ hop akŏm sơkơ̆t hơdăh jơhngơ̆m đon ‘lơ̆ng “Ƀô̆ đô̆i Ƀok Hô” sơkơ̆t hơdăh jơhngơ̆m đon mĭnh nơ̆r ƀơ̆r đon hăm Đảng, Teh đak đơ̆ng Khul Ƀô̆ đô̆i bơ̆n, jing tơdrong kăl hlŏh tơm hloh kơ Khul Ƀô̆ đô̆i kon pơlei Việt Nam. Jơhngơ̆m đon ‘lơ̆ng “Ƀô̆ đô̆i Ƀok Hô” ‘noh mĭnh trong pơkăp kăl, tơdrong gĭt kăl jơhngơ̆m đon ‘lơ̆ng kơ bơngai ƀô̆ đô̆i kĕch mang, Khil Ƀô̆ đô̆i jei mĭnh nơ̆r ƀơ̆r đon hăm Đảng, hăm kon pơlei, iung tơblăh ưh kơ hli lôch răm kơ yuơ tơdrong rơngei hiôk hian pơm tơm kơ dih kơ Teh đak, kơ yuơ chủ nghĩa xã hội. Dôm tơdrong kăp gĭt ‘nŏh đei jing păng atŏk tơ iung lơ̆m prăt chăl sơnăm tơ iung pơjing, iung tơblăh păng atŏk tơ iung kơ Khul Ƀô̆ đô̆i kon pơlei Việt Nam. Kiơ̆ đơ̆ng GS. TS Hoàng Chí Bảo, sơ̆ jang lơ̆m Jơnŭm Lý Luận trung ương hơlen hơnăn hơnăn “Ƀô̆ đô̆i Ƀok Hô”:“Ƀô̆ đô̆i Ƀok Hô” hlôi jing khul ưh khan lăp lơ̆m tơdrong chă tơchĕng hơlen khoa hok, mă lei oei jing khul pơm pơchoh ăn tơdrong chih pơcheh lơ̆m văn hŏk, joh ayŏ kơdŏ soang tăp dăr khul au mă tơ̆ nai hui kơ đei. Ƀô̆ đô̆i Ƀok Hô akŏm đei lơ tơdrong ‘nŏh, jơhngơ̆m đon ‘lơ̆ng, nuih mơng, pran kơtang kơ khul ƀô̆ đô̆i bơ̆n. Tơƀô̆h hơdăh găh tơdrong oei sa joh ayơ Việt Nam lơ̆m chăl Hồ Chí Minh, mă lơ̆m au đei tơdrong oei sa joh ayŏ tơblăh vang, oei sa kơ Khul ƀô̆ đô̆i bơ̆n.”         

Iung pơma tơ̆ hop akŏm, Trung tướng Trịnh Văn Quyết, Kơ iĕng Kơdră chĕp pơgơ̆r Hơnih tơm Chĭnh trĭ, Khul Ƀô̆ đô̆i kon pơlei Việt Nam sơkơ̆t hơdăh: hơnăn gĭt kăl nuih mơng “Ƀô̆ đô̆i Ƀok Hô” đei kon pơlei lui kiơ̆, ‘mêm kơ eng pôk ăn khul ƀô̆ đô̆i bơ̆n đơ̆ng lơ̆m ‘măng iung tơblăh tang găn Phalăng sơ̆. Mă đơ̆ng lơ̆m chăl ayơ, mă đơ̆ng tơnap tap truh dang yơ, mă đơ̆ng tơdrong lôch răm kơ dih, mă lei kang ƀô̆ ƀô̆ đô̆i kơ khul ƀô̆ đô̆i khei năr au ki oei ling lang pơm ‘lơ̆ng rŏ hơbŏ nhen hloh dơ̆ng um rup Ƀô̆ đô̆i Ƀok Hô, sa roi tơnap tap, sa roi hơdăh ang rang ‘lơ̆ng. Tơ̆ hơnăp dôm tơdrong long hrei au, jơhngơ̆m đon au kăl đei kiơ̆ yok rok jơ̆ng pơm kiơ̆ kơjăp hloh dơ̆ng:“Lơ̆m chăl hle, tơdrong jang tơ iung pơjing Khul Ƀô̆ đô̆i, hơmet pơ ‘lơ̆ng vei lăng sơlam teh đak, vei lăng kơjăp iăp kơtang Teh đak hăm trong pơkoĕl roi năr roi kơtang. Lơ̆m mă noh, rim hơyăt tŏk bŏk atŏk kơtang “tơchă trong pơrăm”, pơm hơtŏk “jơhngơ̆m đon hul hơl”, “hơreh dih băl” lơ̆m hơnih jang”, pơma hơlĕnh pơdăr, pơma kơnê̆ trong chĕp pơgơ̆r đơ̆ng Đảng, Khôi luơ̆t Teh đak păng tơdrong joăt joe kơ Khul ƀô̆ đô̆i kon pơlei Việt Nam nuih mơng, jơhngơ̆m đon ‘lơ̆ng “Ƀô̆ đô̆i Ƀok Hô”. Mă đơ̆ng dang yơ, tơdrong kăp gĭt kơ jơhngơ̆m đon ‘lơ̆ng “Ƀô̆ đô̆i Ƀok Hô” kăl vei kơjăp păng kiơ̆ yok rok jơ̆ng kơtang, vă tơgăl hăm tơdrong pơkoăl, tơdrong jang lơ̆m chăl hle.”       

Tơ̆ hơnăp dôm tơdrong long “Pơm tơdrong pơjei” hrei au, lơ nơ̆r tơgop tơlĕch rim trong jang vă atŏk jơhngơ̆m đon ‘mĕh vă plang jơhngơ̆m đon, hŏk pơhrăm, atŏk jơhngơ̆m đon ‘lơ̆ng “Ƀô̆ đô̆i Ƀok Hô” lơ̆m chăl hle.Lơ̆m au đei atŏk kơtang chĕp pơgơ̆r kơjăp, kơtă găh lơ tơdrong đơ̆ng Đảng; atŏk kơtang tơdrong oei sa joh ayŏ ‘lơ̆ng hơ iă lơ̆m Khul Ƀô̆ đô̆i; vei kơjăp kiơ̆ yok rok jơ̆ng jơhngơ̆m đon ‘lơ̆ng gĭt kăl Ƀô̆ đô̆i Ƀok Hô, đĭ jơhngơ̆m đon iung tơ jră tang găn jơhngơ̆m đon kơnê̆.

Hop akŏm hăm lơ nơ̆r pơma pơm hơdăh dôm tơdrong kăl kơ Jơhngơ̆m đon ‘lơ̆ng “Ƀô̆ đô̆i Ƀok Hô” ‘noh tơdrong kơnăl vă Khul kơdră chĕp pơgơ̆r Đảng Ƀô̆ đô̆i Trung uơng, Hơnih tơm Ƀô̆ đô̆i vei lăng sơlam Teh đak, Hơnih tơm Chĭnh trĭ păng rim hơnih đảng ƀô̆ đô̆i, kơdră chĕp pơgơ̆r rim hơnih ƀô̆ đô̆i sơkơ̆t hơdăh trong tơlĕch jang, trong chĕp pơgơ̆r, pơrô̆ jang pơđĭ khul Ƀô̆ đô̆i vei kơjăp, kiơ̆ yok rok jơ̆ng tơdrong kăp gĭt oei sa ‘lơ̆ng rŏ “Ƀô̆ đô̆i Ƀok Hô” lơ̆m chăl hle; jang kiơ̆ jơnei tơdrong jang tơ iung pơjing Khul Ƀô̆ đô̆i, hơmet pơ ‘lơ̆ng vei lăng sơlam teh đak, vei lăng Teh đak; Adoi, tơdrong pơkăp jơhngơ̆m đon ‘lơ̆ng kĕch mang vă kang ƀô̆, đang viên lơ̆m Khul Ƀô̆ đô̆i trĕng lăng kơ dih, hơmet ming, hŏk pơhrăm, pơm hơtŏk jơhngơ̆m đon ‘lơ̆ng kĕch mang,lang să tơdrong kăp gĭt oei sa ‘lơ̆ng rŏ “Ƀô̆ đô̆i Ƀok Hô” lơ̆m chăl hle.

Tơdrong kăp gĭt oei sa ‘lơ̆ng “Ƀô̆ đô̆i Ƀok Hô” ‘nŏh akŏm đei dôm tơdrong kăp gĭt lơ̆m tơdrong oei sa kơ khul ƀô̆ đô̆i Việt Nam, đei rim jơhnơr kang ƀô̆, ƀô̆ đô̆i kơ Khul Ƀô̆ đô̆i Kon pơlei Việt Nam tơgoăt iŏk, pơm kiơ̆, hơmet pơ ‘lơ̆ng hăm trong chĕp pơgơ̆r, pơtho pơhrăm đơ̆ng Đảng bơ̆n păng Kơdră chĕp pơgơ̆r Hồ Chí Minh. Kiơ̆ yok rok jơ̆ng păng pơm ăn tơdrong kăp gĭt oei sa ‘lơ̆ng rŏ “Ƀô̆ đô̆i Ƀok Hô” đei vei kơjăp păng ling lang hơdăh ang rang ‘lơ̆ng, tơgop tơ iung pơjing Khul Ƀô̆ đô̆i Kon pơlei Việt Nam pran kơtang găh chinh trĭ, pơm trong kơnăl atŏk ‘lơ̆ng, jơhngơ̆m pran kơtang iung tơblăh, jang keh đang tơdrong jang mă Đảng, Teh đak păng kon pơlei pơjao ăn.